2 Kings 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Gʼuiˬsha lehˬ mvuhˇ haw aˉ caw law hta‸ cuˇ leh, Eˇliˇya‸ hta‸ mvuhˇ naw ma hkʼoˆ lo yuˬ taˆ-e piˇ tuˬ ve awˬ yanˇ gaˬ la ve yoˬ. Hkʼe te leh, Eˇliˇya‸ leh Eˇliˇshehˇ yawˇ huiˉ maˬ Giˇlaˍgaˍ venˇ hkʼaw tawˆ-e ve yoˬ.

2Ya‸ kʼaw kʼaˉ teˇ tawn gaˬ leh Eˇliˇya‸ lehˬ, Nawˬ choˬ kaˬ chehˇ taˍ-oˬ, Gʼuiˬsha ngaˬ hta‸ Beˍteˍlaˆ venˇ lo kʼai tcuh laˇ ve yoˬ, teh‸ Eˇliˇshehˇ hta‸ kʼoˆ piˇ ve yoˬ. Ya‸ hkʼaˇ Eˇliˇshehˇ lehˬ, Ngaˬ nawˬ hta‸ hpaˆ da‸ maˇ hpeh‸. Gʼuiˬsha ve awˬ meh hta‸ cuˇ leh ngaˬ hkanˍ ve yoˬ, teh‸ Eˇliˇya‸ hta‸ kʼaw‸ yaw hkʼaw‸ piˇ ve yoˬ. Hkʼe te leh, yawˇ huiˉ maˬ Beˍteˍlaˆ venˇ lo kʼai ve yoˬ.

3Oˇ htaˇ, oˇ kaˬ lo chehˇ taˍ ve tcuh kaˍ paˍ teˇ moˍ Eˇliˇshehˇ geh laˬ leh, Ya‸ nyi nawˬ ve awˬ shehˍ hpaˇ hta‸ Gʼuiˬsha shiˍ kʼo‸-e tuˬ ve hta‸ nawˬ shiˍ-aw laˇ, teh‸ yawˇ hta‸ kʼoˆ piˇ ve yoˬ. Yoˬ, ngaˬ shiˍ taˍ ve yoˬ. Ya‸ hkʼaˇ, awˬ lawn chi hta‸ ngaˬ hui maˇ kʼaw‸ caˉ kʼoˆ da‸ cawˇ hehˉ, teh‸ Eˇliˇshehˇ yawˇ hui hta‸ kʼoˆ piˇ ve yoˬ.

4Oˇ htaˇ Eˇliˇya‸ lehˬ, Nawˬ choˬ kaˬ chehˇ taˍ-o‸. Gʼuiˬsha ngaˬ hta‸ Yeˍriˆhkoˇ venˇ lo kʼai tcuh laˇ ve yoˬ, teh‸ Eˇliˇshehˇ hta‸ kʼoˆ piˇ ve yoˬ. Ya‸ hkʼaˇ Eˇliˇshehˇ lehˬ, Ngaˬ nawˬ hta‸ hpaˆ da‸ maˇ hpeh‸. Gʼuiˬsha ve awˬ meh hta‸ cuˇ leh ngaˬ hkanˍ ve yoˬ, teh‸ Eˇliˇya‸ hta‸ kʼaw‸ yaw hkʼaw‸ piˇ ve yoˬ. Hkʼe te leh yawˇ huiˉ maˬ Yeˍriˆhkoˇ venˇ lo kʼai ve yoˬ.

5Oˇ htaˇ, oˇ kaˬ lo chehˇ taˍ ve tcuh kaˍ paˍ teˇ moˍ Eˇliˇshehˇ geh laˬ leh, Ya‸ nyi nawˬ ve awˬ shehˍ hpaˇ hta‸ Gʼuiˬsha shiˍ kʼo‸-e tuˬ ve hta‸ nawˬ shiˍ-aw laˇ, teh‸ yawˇ hta‸ kʼoˆ piˇ ve yoˬ. Yoˬ, ngaˬ shiˍ taˍ ve yoˬ. Ya‸ hkʼaˇ, awˬ lawn chi hta‸ ngaˬ hui maˇ kʼaw‸ caˉ kʼoˆ da‸ cawˇ hehˉ, teh‸ Eˇliˇshehˇ yawˇ hui hta‸ kʼoˆ piˇ ve yoˬ.

6Oˇ ve hkʼaw‸ nawˉ Eˇliˇya‸ lehˬ, Nawˬ choˬ kaˬ chehˇ taˍ-oˆ. Gʼuiˬsha ngaˬ hta‸ Yawˇdanˍ iˉ kaˆ lawˬ lo kʼaw‸ kʼai tcuh laˇ ve yoˬ, teh‸ Eˇliˇshehˇ hta‸ kʼoˆ piˇ ve yoˬ. Ya‸ hkʼaˇ Eˇliˇshehˇ lehˬ, Ngaˬ nawˬ hta‸ hpaˆ da‸ maˇ hpeh‸. Gʼuiˬsha ve awˬ meh hta‸ cuˇ leh ngaˬ hkanˍ ve yoˬ, teh‸ Eˇliˇya‸ hta‸ kʼaw‸ yaw hkʼaw‸ piˇ ve yoˬ. Hkʼe te leh yawˇ huiˉ maˬ tawˆ kʼai ve yoˬ.

7Tcuh kaˍ paˍ 50 gʼaˇ htawˇ yawˇ huiˉ maˬ hkʼaˇ suh Yawˇdanˍ iˉ kaˆ lawˬ lo gʼa‸ kʼai ve yoˬ. Eˇliˇya‸ leh Eˇliˇshehˇ yawˇ huiˉ maˬ iˉ kaˆ lawˬ pfuhˍ lo huˉ taˍ ve yoˬ. Tcuh kaˍ paˍ teˇ hpaˍ lehˬ, yawˇ huiˉ maˬ hta‸ a ciˉ vuiˇ kuiˬ lo huˉ taˍ ve yoˬ.

8Oˇ htaˇ Eˇliˇya‸ yawˇ ve aˉ po‸ hta‸ kʼehˆ leh lo‸ peuˬ hkʼaw‸ nawˉ, iˉ kaˆ lawˬ hta‸ dawˆ ve yoˬ. Teˇ cawˬ haˉ iˉ kaˆ nyiˇ hkoˇ hpeh‸ sheˬ leh, yawˇ huiˉ maˬ iˉ kaˆ lawˬ coˇ paˉ lo tawˆ-e ve yoˬ.

9Oˇ ve hkʼaw‸ nawˉ Eˇliˇya‸ lehˬ, Ngaˬ hta‸ Gʼuiˬsha maˇ shiˍ kʼo‸-e sheˍ htaˇ, nawˬ ngaˬ hta‸ aˬ hto‸ ma te tcuh laˇ gaˇ ve le, teh‸ Eˇliˇshehˇ hta‸ kʼoˆ piˇ ve yoˬ. Nawˬ awˬ tan tcuh kaˍ paˍ kʼaw‸ te tuˬ, nawˬ ve kanˇ paˆ ngaˬ hta‸ pe‸ taˉ laˇ-oˆ, teh‸ Eˇliˇshehˇ yawˇ hta‸ kʼoˆ piˇ ve yoˬ

10Oˇ htaˇ Eˇliˇya‸ lehˬ, Nawˬ lawˬ ve chi hta‸ piˇ laˇ tuˬ haˍ jaˇ ve yoˬ. Ya‸ hkʼaˇ, Gʼuiˬsha ngaˬ hta‸ shiˍ kʼo‸-e chehˇ ve hta‸ nawˬ gʼa mawˬ ve kʼo, nawˬ lawˬ ve hkʼe gʼa tuˬ yoˬ. Nawˬ maˇ gʼa mawˬ ve kʼo gʼa tuˬ ve maˇ heˆ, teh‸ Eˇliˇya‸ yawˇ hta‸ kʼaw‸ yaw hkʼaw‸ piˇ ve yoˬ.

11Yawˇ huiˉ maˬ na‸ uˉ te da‸ leh awˬ gʼuˇ suhˍ kʼaw‸ kʼai chehˇ ve teˇ yanˇ, teˇ cawˬ haˉ aˬ miˍ ha iˉ mvuhˇ lawˬ yawˇ huiˉ maˬ awˬ kaˍ lo lo‸ la leh, Eˇliˇya‸ hta‸ mvuhˇ haw aˉ caw law hkʼaw mvuhˇ naw ma hkʼoˆ lo shiˍ taˆ-e sheˬ ve yoˬ.

12Oˇ hkʼe hpeh‸ la ve hta‸ Eˇliˇshehˇ gʼa mawˬ htaˇ, Ngaˬ pa-oˬ, ngaˬ pa-oˬ, nawˬ lehˬ Iˉsaˍreˍlaˆ chaw hui hta‸ ha‸ shaˉ shehˍ hpaˇ awˬ gʼaˇ uiˍ jaˇ ve chaw hpeh‸ ve yoˬ. Chi beu‸ nawˬ mehˉ kʼai peuˬ, teh‸ kʼoˆ ve yoˬ. Oˇ ve hkʼaw‸ nawˉ, yawˇ Eˇliˇya‸ hta‸ teˇ pawˆ ka‸ maˇ gʼa kʼaw‸ mawˬ ve yoˬ.

13Oˇ htaˇ Eˇliˇshehˇ dawˇ haˍ jaˇ leh, yawˇ ve aˉ po‸ hta‸ nyiˇ hkoˇ tzuh‸ suhˍ ve yoˬ. Oˇ hkʼe te peuˬ hkʼaw‸ nawˉ, Eˇliˇya‸ ve aˉ po‸ hta‸ yuˬ veu leh, Yawˇdanˍ iˉ kaˆ lawˬ lo kʼaw‸ kʼo‸-e ve yoˬ.

14Yawˇ lehˬ aˉ po‸ oˇ ve hta‸ yuˬ leh iˉ kaˆ lawˬ hta‸ dawˆ peuˬ hkʼaw‸ nawˉ, Eˇliˇya‸ ve Gʼuiˬsha hkʼaˬ lo le, teh‸ kʼoˆ ve yoˬ. Yawˇ oˇ hkʼe kʼoˆ peuˬ hkʼaw‸ nawˉ, iˉ kaˆ lawˬ hta‸ teˇ pawˆ kʼaw‸ dawˆ ve yoˬ. Iˉ kaˆ nyiˇ hkoˇ hpeh‸ kʼai leh, yawˇ coˇ paˉ lo kʼaw‸ tawˆ-e ve yoˬ.

15Yeˍriˆhkoˇ venˇ hkʼaw chehˇ ve tcuh kaˍ paˍ oˇ ve 50 gʼaˇ yawˇ hta‸ mawˬ leh, Eˇliˇya‸ ve kanˇ paˆ Eˇliˇshehˇ hkʼoˆ lo gaˬ la peuˬ, teh‸ kʼoˆ ve yoˬ. Yawˇ hui yawˇ geh kʼai leh, yawˇ mehˆ gʼuˇ suhˍ lo boˆ taˍ ve yoˬ.

16Ngaˬ hui chaw 50 gʼaˇ cawˬ ve yoˬ. Ngaˬ hui lehˬ awˬ gʼaˇ uiˍ jaˇ ve yoˬ. Nawˬ ve awˬ shehˍ hpaˇ hta‸ ca nyi-a veuˬ. Gʼuiˬsha ve Awˬ ha hpu yawˇ hta‸ hkʼaw hkʼoˆ lawˬ hkʼoˆ teˇ kaˬ kaˬ lo ca yuˬ faˉ taˍ ve hehˉ, teh‸ yawˇ hui yawˇ hta‸ kʼoˆ piˇ ve yoˬ. Nawˬ hui maˇ gʼa kʼai, teh‸ Eˇliˇshehˇ yawˇ hui hta‸ kʼoˆ piˇ ve yoˬ.

17Ya‸ hkʼaˇ, yawˇ hui lawˬ jaˇ ve pa taw, yawˇ yawˇ hui hta‸ ca nyi tcuh ve yoˬ. Tcuh kaˍ paˍ oˇ ve 50 gʼaˇ lehˬ, shehˆ nyi hkʼa gaˬ Eˇliˇya‸ hta‸ gʼa‸ ca ve yoˬ. Ya‸ hkʼaˇ, yawˇ hui ca maˇ mawˬ.

18Oˇ ve hkʼaw‸ nawˉ, yawˇ hui Yeˍriˆhkoˇ venˇ lo Eˇliˇshehˇ geh kʼaw‸ la ve yoˬ. Oˇ htaˇ Eˇliˇshehˇ lehˬ, Ngaˬ nawˬ hui hta‸ taˇ kʼai loˬ, teh‸ kʼoˆ piˇ ve maˇ heˆ laˇ, teh‸ yawˇ hui hta‸ kʼoˆ piˇ ve yoˬ.

19Yeˍriˆhkoˇ venˇ yaˇ teˇ hpaˍ hpaˍ Eˇliˇshehˇ geh kʼai leh, Jawˇmawˇ-oˬ, nawˬ shiˍ taˍ ve hkʼe venˇ chi lehˬ da‸ jaˇ ve venˇ hpeh‸ ve yoˬ. Ya‸ hkʼaˇ, choˬ kaˬ lo tawˆ ve iˉ kaˆ lehˬ cha‸ chiˆ jaˇ leh, yaˇ hu ma teˇ hpaˍ hta‸ yaˇ shawˆ-e piˇ ve yoˬ, teh‸ yawˇ hta‸ kʼoˆ piˇ ve yoˬ.

20Oˇ htaˇ Eˇliˇshehˇ lehˬ, Hkehˇ awˬ suhˉ teˇ maˬ hkʼaw aˉ leh‸ keu leh ngaˬ geh yuˬ veu laˇ-oˆ, teh‸ yawˇ hui hta‸ kʼoˆ piˇ ve yoˬ. Yawˇ hui lehˬ yawˇ kʼoˆ ve hkʼe te leh, yawˇ geh yuˬ kʼai piˇ ve yoˬ.

21Eˇliˇshehˇ lehˬ hkehˇ oˇ ve hta‸ iˉ kaˆ nanˬ bawˍ hkʼaw ngeuˍ keu peuˬ hkʼaw‸ nawˉ, Gʼuiˬsha kʼoˆ ve, iˉ kaˆ chi ve hta‸ ngaˬ da‸ kehˬ la piˇ peuˬ. Ya‸ nyi hkʼaw‸ nawˉ, iˉ kaˆ chi hta‸ dawˬ ve chaw maˇ gʼa suh. Yaˇ ka‸ maˇ gʼa shawˆ-e, teh‸ kʼoˆ ve yoˬ.

22Oˇ ve teˇ nyi hta‸ tanˬ leh iˉ kaˆ nanˬ bawˍ oˇ ve Eˇliˇshehˇ kʼoˆ ve hkʼe kʼaw‸ da‸ la kehˬ la ve yoˬ.

23Oˇ ve hkʼaw‸ nawˉ Eˇliˇshehˇ Yeˍriˆhkoˇ venˇ hkʼaw tawˆ-e leh, Beˍteˍlaˆ venˇ lo kʼai ve yoˬ. Ya‸ kʼaw kʼaˉ lo yaˇ ehˉ teˇ hpaˍ gʼuiˇ tawˆ la leh, Oˉ kʼoˍ nyiˉ paˍ-oˬ, choˬ kaˬ lo tawˆ kʼai-o, teh‸ yawˇ hta‸ maˇ shawˍ maˇ caˆ kʼoˆ piˇ ve yoˬ.

24Eˇliˇshehˇ yawˇ hui hta‸ kʼaw‸ hpfuhˆ nyi leh, Gʼuiˬsha ve awˬ meh hkʼaw yawˇ hui hta‸ hkeu piˇ ve yoˬ. Oˇ htaˇ, yehˬ miˉ tawˍ awˬ ma peuˍ nyiˇ hkeh tawˆ la leh, yaˇ ehˉ oˇ ve 42 gʼaˇ hkʼa peu-eˬ ve hta‸ che‸ pehˍ piˇ ve yoˬ.

25Eˇliˇshehˇ lehˬ, Kaˍmeˍlaˆ hkʼaw hkʼoˆ lo kʼai taˉ peuˬ hkʼaw‸ nawˉ, Saˍmaˍriˆ venˇ lo kʼaw‸ la ve yoˬ.

← Chapter 1 Jump to: Chapter 3 →