2 Kings 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to: Chapter 17 →

1Iˉsaˍreˍlaˆ mvuhˇmiˬ hta‸ Reˍmaˍliˆ ve yaˇ Peˍkaˍ uˉ peunˍ chehˇ ve 17 hkʼaw‸ teˇ hkʼaw‸ htaˇ, Yuˇda‸ mvuhˇmiˬ hta‸ Yawˇtanˍ ve yaˇ Aˍhkaˆ kʼaw‸ uˉ peunˍ ve yoˬ.

2Yawˇ jawˇmawˇ tanˬ te htaˇ, yawˇ ve a sha‸ 20 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 16 hkʼaw‸ uˉ peunˍ ve yoˬ. Yawˇ lehˬ, yawˇ ve awˬ puˍ lonˉ Daˍviˆ hkʼa shuˍ da‸ ve kanˉ hta‸ maˇ te. Gʼuiˬsha a loˍ maˇ cawˇ ve kanˉ hta‸ tiˉ te ve yoˬ.

3Awˬ nu ve Iˉsaˍreˍlaˆ jawˇmawˇ teˇ hpaˍ te ve hkʼe gʼa‸ te ve yoˬ. Iˉsaˍreˍlaˆ chaw teˇ hpaˍ Hkaˍnanˍ mvuhˇmiˬ hkʼaw lo‸ la htaˇ, Gʼuiˬsha gʼa‸ kʼoˬ piˇ taˍ ve chaw hui te ve awˬ liˇ hta‸ henˇ yuˬ leh, yawˇ ve yaˇ paˍ shaˉ ho‸ teˇ hpaˍ hta‸ tuˉ tanˇ piˇ ve yoˬ.

4Awˬ nu ve gʼuiˬsha teˇ hpaˍ ve bon yehˬ hkʼaw maˇ kʼoˆ, hkʼaw hkʼoˆ lo leh suhˆ cehˬ hawˉ lo maˇ kʼoˆ, sha hawnˉ leh awˬ nu ve tuˉ tanˇ tuˬ teˇ hpaˍ tuˉ tanˇ piˇ ve yoˬ.

5Suˇriˆ jawˇmawˇ Reˍsenˍ leh, Iˉsaˍreˍlaˆ jawˇmawˇ Peˍkaˍ hui Yeˍruˆsaˍlehnˍ venˇ hta‸ ca bawˆ la ve yoˬ. Ya‸ hkʼaˇ, yawˇ hui bawˆ yuˬ maˇ gʼa.

6(Awˬ yanˇ oˇ ve hkʼaw, Eˇdonˍ jawˇmawˇ lehˬ Eˇlaˆ venˇ hta‸ kʼaw‸ bawˆ yuˬ leh, oˇ kaˬ lo chehˇ taˍ ve Yuˇda‸ chaw hta‸ gʼa‸ kʼoˬ piˇ ve yoˬ. Hkʼe te leh, Eˇdonˍ chaw hui Eˇlaˆ venˇ hkʼaw chehˇ taˍ ve yoˬ.)

7Aˍhkaˆ lehˬ Aˍsuˇriˆ jawˇmawˇ Tiˉgaˍlaˆpaˍleˍsaˍ hta‸ li‸ chi hkʼe bvuh‸ feu piˇ ve yoˬ. Ngaˬ lehˬ nawˬ ve awˬ ceˬ hpeh‸ ve yoˬ. Chi beu‸ Suˇriˆ jawˇmawˇ leh Iˉsaˍreˍlaˆ jawˇmawˇ hui ngaˬ hta‸ ca bawˆ la chehˇ ve yoˬ. Ngaˬ hta‸ a ciˉ ca ga la-o, teh‸ kʼoˆ feu piˇ ve yoˬ.

8Chi hkʼoˆ ka‸, Aˍhkaˆ lehˬ bon yehˬ leh hawˉ yehˬ hkʼaw cawˬ ve hpu shi teˇ hpaˍ yuˬ tawˆ leh, yawˇ hta‸ la‸ shawnˍ te feu piˇ ve yoˬ.

9Jawˇmawˇ Tiˉgaˍlaˆpaˍleˍsaˍ li‸ oˇ ve hta‸ gʼa mawˬ htaˇ, yawˇ ve ma‸ moˍ hta‸ shiˍ veu laˇ leh, Daˍmaˍsehˆ venˇ hta‸ ca bawˆ la ve yoˬ. Yawˇ jawˇmawˇ Reˍsenˍ hta‸ tiˇ pehˍ leh venˇ yaˇ teˇ hpaˍ hta‸ Kiˇraˆ venˇ lo shiˍ kʼai ve yoˬ.

10Jawˇmawˇ Aˍhkaˆ lehˬ, jawˇmawˇ lonˉ Tiˉgaˍlaˆpaˍleˍsaˍ hta‸ ca hpuˇ da‸ tuˬ Daˍmaˍsehˆ venˇ lo gaˬ ve teˇ yanˇ, oˇ kaˬ lo cawˬ ve tuˉ tanˇ kuiˬ teˇ maˬ hta‸ yawˇ gʼa mawˬ ve yoˬ. Hkʼe te leh, yawˇ lehˬ tuˉ tanˇ kuiˬ oˇ ve hta‸ shuˍ da‸ ve awˬ han teˇ maˬ nyi te leh, paw hkuˇ Uˇriˇya‸ hta‸ hkʼaw‸ feu piˇ ve yoˬ.

11Paw hkuˇ Uˇriˇya‸ lehˬ awˬ han oˇ ve hta‸ nyi taˍ leh, tuˉ tanˇ kuiˬ teˇ maˬ te ve yoˬ. Aˍhkaˆ maˇ kʼaw‸ gaˬ la sheˍ htaˇ ka‸, yawˇ tuˉ tanˇ kuiˬ oˇ ve hta‸ te peuˬ ve yoˬ.

12Aˍhkaˆ kʼaw‸ gaˬ la htaˇ, tuˉ tanˇ kuiˬ te peuˬ taˍ laˇ ve hta‸ yawˇ gʼa mawˬ ve yoˬ.

13Hkʼe te leh, Aˍhkaˆ lehˬ tuˉ tanˇ tuˬ awˬ ceuˬ teˇ hpaˍ yuˬ laˬ leh, tuˉ tanˇ kuiˬ oˇ ve awˬ hkʼoˆ lo tuˉ tanˇ ve yoˬ.

14Gʼuiˬsha hta‸ tuˉ tanˇ kuiˬ lehˬ, tuˉ tanˇ kuiˬ awˬ suhˉ oˇ ve lehˬ bon yehˬ awˬ kaˍ lo cawˬ ve yoˬ. Hkʼe te leh Aˍhkaˆ lehˬ, Gʼuiˬsha hta‸ tuˉ tanˇ kuiˬ oˇ ve hta‸ awˬ suhˉ kʼaw‸ te teh taˍ ve tuˉ tanˇ kuiˬ awˬ na hpawˇ lo kʼaw‸ jiˆ teh ve yoˬ.

15Oˇ ve hkʼaw‸ nawˉ, Yawˇ Uˇriˇya‸ hta‸ chi hkʼe kʼoˆ piˇ ve yoˬ. Mvuhˇ shawˉ mvuhˇ hpeu‸ nawˬ hui tuˉ tanˇ ve teˇ yanˇ, chi beu‸ te taˍ ve tuˉ tanˇ kuiˬ awˬ suhˉ chi awˬ hkʼoˆ lo ceh tiˉ tuˉ tanˇ piˇ-oˆ. To nuˇ to shaˆ teˇ hpaˍ ve awˬ suhˍ hta‸ htawˇ, tuˉ tanˇ kuiˬ awˬ suhˉ chi ve awˬ hkʼoˆ lo tiˉ ngeuˍ pfuhˍ-o‸. Kuiˇ yuˬ te taˍ ve tuˉ tanˇ kuiˬ awˬ piˍ chi teˇ maˬ lehˬ, ngaˬ Gʼuiˬsha hta‸ na nyi tuˬ cawˬ la htaˇ yehˇ tuˬ awˬ pon teh taˍ-o‸, teh‸ yawˇ hta‸ kʼoˆ piˇ ve yoˬ.

16Jawˇmawˇ kʼoˆ ve hkʼe, Uˇriˇya‸ na yuˬ leh te ve yoˬ.

17Jawˇmawˇ Aˍhkaˆ lehˬ, kuiˇ yuˬ te taˍ ve lawˬ ehˉ teˇ hpaˍ hta‸ hpaˆ baˬ leh, hkehˇ pe le teˇ hpaˍ hta‸ htawˇ yuˬ baˬ ve yoˬ. Kuiˇ yuˬ te taˍ ve nuˇ paˍ lonˉ 12 hkeh awˬ hkʼoˆ lo teh taˍ ve, kuiˇ iˉ kaˆ punˇ hta‸ htawˇ yawˇ yuˬ ya‸ leh, haˉ pui shiˍ hkʼoˆ kʼaw‸ teh taˍ ve yoˬ.

18Aˍsuˇriˆ jawˇmawˇ lonˉ nyi ma cawˇ tuˬ, Aˍhkaˆ lehˬ bon yehˬ hkʼaw cawˬ ve jawˇmawˇ laˬ htaˇ mui ve kʼaw jaw leh, jawˇmawˇ awˬ pon fuiˍ teh taˍ ve ya‸ kʼaw hta‸ hoˆ baˬ ve yoˬ.

19Jawˇmawˇ Aˍhkaˆ hkʼa te ve kanˉ hkʼa peu-eˬ Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

20Aˍhkaˆ suh-e leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Heˍsaˍkiˆ yawˇ awˬ tan jawˇmawˇ kʼaw‸ te ve yoˬ.

← Chapter 15 Jump to: Chapter 17 →