2 Kings 24

Lahu Bible Edited © Thailand Bible Society and Bible Society of Myanmar, 2010, 2020.

← Chapter 23 Jump to: Chapter 25 →

1Yawˇyaˍkenˍ jawˇmawˇ te chehˇ htaˇ, Baˍbuˍlonˍ jawˇmawˇ Neˍbuˍhkaˍneˍzaˍ Yuˇda‸ mvuhˇmiˬ hta‸ ca bawˆ la leh shehˆ hkʼaw‸ hkʼa gaˬ Yawˇyaˍkenˍ hta‸ Baˍbuˍlonˍ jawˇmawˇ uˉ peunˍ ve hawˉ chehˇ tcuh ve yoˬ. Oˇ ve hkʼaw‸ nawˉ, Yawˇyaˍkenˍ Baˍbuˍlonˍ jawˇmawˇ hta‸ kʼaw‸ hpfuhˆ ve yoˬ.

2Gʼuiˬsha lehˬ, yawˇ ve tcuh kaˍ paˍ teˇ hpaˍ hta‸ cuˇ leh kʼoˆ taˍ peuˬ ve hkʼe, Yuˇda‸ mvuhˇmiˬ hta‸ te luˬ piˇ tuˬ, Baˍbuˍlonˍ chaw, suˇriˆ chaw, Mawˇbaˆ chaw leh Aˍmonˍ chaw teˇ hpaˍ hta‸ peu laˇ piˇ ve yoˬ.

3Chi hkʼe hpeh‸ la ve lehˬ, jawˇmawˇ Maˍnaˍseˍ Gʼuiˬsha hta‸ te ya‸ jaˇ peuˬ ve pa taw, Yuˇda‸ chaw hui hta‸ gʼa‸ kʼoˬ piˇ tuˬ awˬ pon hpeh‸ ve yoˬ.

4Maˍnaˍseˍ lehˬ, te‸ chiˉ venˇbaˆ maˇ cawˬ ve chaw hui hta‸ tiˇ pehˍ piˇ taˍ peuˬ ve yoˬ. Yawˇ oˇ hkʼe te ve hta‸ Gʼuiˬsha a ciˉ ka‸ nyi ma maˇ cawˇ.

5Yawˇyaˍkenˍ hkʼa te ve kanˉ hkʼa peu-eˬ, Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

6Yawˇyaˍkenˍ suh-e leh, yawˇ ve yaˇ paˍ Yeˍhkawˇniˆ yawˇ awˬ tan jawˇmawˇ kʼaw‸ te ve yoˬ.

7Eˇjiˇtu‸ jawˇmawˇ lehˬ, yawˇ ve mvuhˇmiˬ hkʼaw teˇ pawˆ ka‸ kʼaw‸ tawˆ la maˇ gaˬ. Awˬ lawn kʼo, Baˍbuˍlonˍ jawˇmawˇ lehˬ, Uˇhpaˍraˆ iˉ kaˆ lawˬ hta‸ te leh, Eˇjiˇtu‸ miˬ tcuhˉ lo hkʼa gaˬ, Eˇjiˇtu‸ chaw hui bawˆ yuˬ taˍ ve mvuhˇmiˬ hkʼa peu-eˬ ve hta‸ kʼaw‸ bawˆ yuˬ taˍ peuˬ ve pa taw yoˬ.

8Yeˍhkawˇniˆ jawˇmawˇ hpeh‸ la htaˇ, yawˇ ve a sha‸ 18 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ ha pa shehˆ maˬ uˉ peunˍ taˉ ve yoˬ. Yawˇ ve awˬ e lehˬ, Yeˍruˆsaˍlehnˍ venˇ yaˇ Eˇlaˍnaˍtanˍ ve yaˇ miˇ Neˍhuˇtaˆ hpeh‸ ve yoˬ.

9Yawˇ ve awˬ puˍ lonˉ teˇ hpaˍ hkʼa shuˍ, yawˇ htawˇ Gʼuiˬsha hta‸ te ya‸ jaˇ ve yoˬ.

10Yeˍhkawˇniˆ jawˇmawˇ te chehˇ htaˇ, Baˍbuˍlonˍ chaw teˇ hpaˍ Yeˍruˆsaˍlehnˍ venˇ hta‸ ca bawˆ la ve yoˬ.

11Jawˇmawˇ lonˉ Neˍbuˍhkaˍneˍzaˍ awˬ to Yeˍruˆsaˍlehnˍ venˇ lo laˬ ve yoˬ.

12Hkʼe te leh, jawˇmawˇ Yeˍhkawˇniˆ, yawˇ ve awˬ e, yawˇ ve yaˇ teˇ hpaˍ, yawˇ ve ma‸ poˍ lonˉ teˇ hpaˍ, leh yawˇ ve a ma‸ lonˉ hkʼa peu-eˬ, Baˍbuˍlonˍ jawˇmawˇ hta‸ la‸ caˉ ya‸ piˇ ve yoˬ. Neˍbuˍhkaˍneˍzaˍ jawˇmawˇ te chehˇ ve hiˉ hkʼaw‸ teˇ hkʼaw‸ htaˇ, yawˇ lehˬ jawˇmawˇ Yeˍhkawˇniˆ hta‸ Baˍbuˍlonˍ mvuhˇmiˬ lo shiˍ kʼai ve yoˬ.

13Bon yehˬ leh hawˉ yehˬ hkʼaw cawˬ ve mawˇ hkʼa peu-eˬ hta‸ htawˇ, Baˍbuˍlonˍ mvuhˇmiˬ lo yuˬ kʼai ve yoˬ. Gʼuiˬsha kʼoˆ taˍ peuˬ ve hkʼe, Neˍbuˍhkaˍneˍzaˍ lehˬ, bon yehˬ lonˉ hkʼaw lo jawˇmawˇ Sawˉla‸monˍ te keu taˍ ve mawˇ hkʼa peu-eˬ hta‸ te luˬ piˇ ve yoˬ.

14Yawˇ lehˬ, Yeˍruˆsaˍlehnˍ venˇ yaˇ teˇ hpaˍ, jawˇmawˇ awˬ ceuˬ awˬ hkʼaˇ teˇ hpaˍ, awˬ hoˉ awˬ naˬ teˇ hpaˍ, chaw hkʼa peu-eˬ 10,000 gʼaˇ hta‸ Baˍbuˍlonˍ mvuhˇmiˬ lo shiˍ kʼai ve yoˬ. Chi hkʼoˆ ka‸, yawˇ lehˬ ca liˉ paˍ hta‸ te leh, la‸ meuˇ puiˉ ve chaw hkʼa peu-eˬ hta‸ htawˇ shiˍ kʼai leh, haˍ gʼawˇ jaˇ ve chaw hui hta‸ ceh tiˉ Yuˇda‸ mvuhˇmiˬ hkʼaw teh taˉ ve yoˬ.

15Neˍbuˍhkaˍneˍzaˍ lehˬ, jawˇmawˇ Yeˍhkawˇniˆ, yawˇ ve awˬ e, yawˇ ve awˬ miˇ ma teˇ hpaˍ, yawˇ ve ma‸ poˍ lonˉ teˇ hpaˍ leh awˬ hoˉ awˬ naˬ hkʼa peu-eˬ hta‸ Baˍbuˍlonˍ mvuhˇmiˬ lo shiˍ kʼai ve yoˬ.

16Yawˇ shiˍ kʼai ve chaw uiˍ chaw mvuh 7,000 gʼaˇ cawˬ leh, la‸ meuˇ puiˉ ve chaw teˇ hinˉ gʼaˇ cawˬ ve yoˬ.

17Neˍbuˍhkaˍneˍzaˍ lehˬ, Yeˍhkawˇniˆ ve aˉ shuˍ paˍ Maˍtaˍniˆ hta‸ Yuˇda‸ jawˇmawˇ te tcuh taˉ leh, awˬ meh awˬ suhˉ Zeˍdaˍkiˆ teh‸ kʼaw‸ meh piˇ taˉ ve yoˬ.

18Zeˍdaˍkiˆ Yuˇda‸ jawˇmawˇ hpeh‸ la htaˇ, yawˇ ve a sha‸ 21 hkʼaw‸ gaˬ peuˬ leh Yeˍruˆsaˍlehnˍ venˇ hta‸ 11 hkʼaw‸ uˉ peunˍ ve yoˬ. Yawˇ ve awˬ e lehˬ, Liˆbaˍnaˍ venˇ yaˇ Yeˍraˍmiˆ ve yaˇ miˇ Haˍmuˇtaˍlaˆ hpeh‸ ve yoˬ.

19Jawˇmawˇ Yawˇyaˍkenˍ hkʼa shuˍ, yawˇ htawˇ Gʼuiˬsha hta‸ te ya‸ jaˇ ve yoˬ.

20Gʼuiˬsha lehˬ, Yeˍruˆsaˍlehnˍ leh Yuˇda‸ chaw teˇ hpaˍ hta‸ nyi ma zuhˆ jaˇ ve pa taw, yawˇ hui hta‸ gʼa‸ kʼoˬ piˇ ve yoˬ.

← Chapter 23 Jump to: Chapter 25 →