2 Kings 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Eˇliˇshehˇ lehˬ, mvuhˇmiˬ hkʼaw 7 hkʼaw‸ hkʼa gaˬ meu‸ lonˉ kaˆ lonˉ gaˬ la tuˬ ve awˬ lawn maˇ kʼoˆ, awˬ yanˇ chi hkʼaw awˬ nu ve chehˇ kuiˬ teˇ kaˬ kaˬ lo ca jiˆ chehˇ taˍ cawˇ ve awˬ lawn maˇ kʼoˆ, Suˆnenˍ venˇ hkʼaw chehˇ ve yaˇ miˇ ma oˇ ve hta‸ kʼoˆ piˇ ve yoˬ. Yawˇ lehˬ yaˇ miˇ ma oˇ ve yaˇ paˍ hta‸ kʼaw‸ te‸ la piˇ taˍ peuˬ ve yoˬ.

2Hkʼe te leh yaˇ miˇ ma oˇ ve lehˬ, Eˇliˇshehˇ kʼoˆ ve hkʼe yawˇ ve yehˬ yaˇ kʼa yaˇ hui hta‸ shiˍ veu leh Hpiˇliˇtiˆ mvuhˇmiˬ hkʼaw 7 hkʼaw‸ ca hpaw chehˇ kʼai ve yoˬ.

3Suhˍ hkʼaw‸ biˇ peuˬ hkʼaw‸ nawˉ, yawˇ Iˉsaˍreˍlaˆ mvuhˇmiˬ lo kʼaw‸ la leh, jawˇmawˇ geh yawˇ ve yehˬ leh yawˇ ve miˬguiˬ ca kʼaw‸ lawˬ hkʼaw‸ ve yoˬ.

4Jawˇmawˇ lehˬ, Eˇliˇshehˇ ve awˬ ceˬ paˍ Geˍhaˍziˆ hta‸ na‸ uˉ te da‸ chehˇ taˍ laˇ ve hta‸ yawˇ gʼa mawˬ ve yoˬ. Eˇliˇshehˇ te ve anˇ tuˬ teˇ hpaˍ hta‸ jawˇmawˇ shiˍ gaˇ leh, yawˇ hta‸ na nyi chehˇ ve yoˬ.

5Gaˍhaˍziˆ lehˬ, Eˇliˇshehˇ suh taˍ ve chaw hta‸ hkʼaˬ hkʼe te kʼaw‸ te‸ la piˇ ve awˬ lawn kʼoˆ maˍ piˇ chehˇ htaˇ, yaˇ miˇ oˇ ve lehˬ jawˇmawˇ geh yawˇ ve yehˬ leh miˬguiˬ teˇ hpaˍ kʼaw‸ lawˬ yuˬ ve yoˬ. Oˇ htaˇ Geˍhaˍziˆ lehˬ, Jawˇmawˇ-oˬ Eˇliˇshehˇ kʼaw‸ te‸ tu la piˇ ve chaw lehˬ, yaˇ miˇ ma chi ve yaˇ paˍ yoˬ, teh‸ jawˇmawˇ hta‸ kʼoˆ piˇ ve yoˬ.

6Jawˇmawˇ na nyi ve hkʼe, yaˇ miˇ ma chi ve htawˇ Eˇliˇshehˇ yawˇ ve yaˇ paˍ hta‸ hkʼaˬ hkʼe kʼaw‸ te‸ la piˇ ve awˬ lawn jawˇmawˇ hta‸ kʼoˆ maˍ piˇ ve yoˬ. Hkʼe te leh, jawˇmawˇ lehˬ yawˇ ve ma‸ poˍ lonˉ teˇ gʼaˇ hta‸ kuˬ yuˬ leh, yawˇ ve mawˇ hkʼa peu-eˬ leh, yawˇ hpaw-e hkʼaw‸ nawˉ yawˇ ve ti mi hkʼaw hkʼa tawˆ la ve caˬ shiˍ teˇ hpaˍ awˬ hpfuhˇ hpu kʼaw‸ shawˍ piˇ tcuh ve yoˬ.

7Teˇ pawˆ htaˇ Eˇliˇshehˇ Daˍmaˍsehˆ venˇ lo kʼai ve yoˬ. Awˬ yanˇ oˇ ve hkʼaw Suˇriˆ jawˇmawˇ Beˍhaˍdaˆ lehˬ naˬ jaˇ chehˇ ve yoˬ. Eˇliˇshehˇ Daˍmaˍsehˆ venˇ hkʼaw chehˇ taˍ ve awˬ hkawˇ hta‸ jawˇmawˇ gʼa kaˇ htaˇ,

8yawˇ ve ma‸ poˍ lonˉ Haˍzeˍlaˆ hta‸ kuˬ yuˬ leh, Chi beu‸ nawˬ la‸ shawnˍ teˇ hpaˍ yuˬ veu leh, tcuh kaˍ paˍ geh kʼai-o. Ngaˬ kʼaw‸ chehˇ sha la tuˬ leh naˍ, yawˇ hta‸ ca na nyi-o, teh‸ kʼoˆ piˇ ve yoˬ.

9Hkʼe te leh, Haˍzeˍlaˆ lehˬ Daˍmaˍsehˆ venˇ hkʼaw tawˆ ve da‸ jaˇ ve mawˇ teˇ hpaˍ kaˍlaˍoˆ 40 hkeh hta‸ taˆ tcuh leh, Eˇliˇshehˇ geh kʼai ve yoˬ. Yawˇ Eˇliˇshehˇ hta‸ hpuˇ da‸ ve teˇ yanˇ, Nawˬ ve awˬ ceˬ jawˇmawˇ Beˍhaˍdaˆ kʼaw‸ chehˇ sha la tuˬ ve laˇ. Yawˇ ngaˬ hta‸ nawˬ geh laˬ peu laˇ ve yoˬ, teh‸ Haˍzeˍlaˆ yawˇ hta‸ kʼoˆ piˇ ve yoˬ.

10Oˇ htaˇ Eˇliˇshehˇ lehˬ, Yawˇ gʼa suh tuˬ yoˬ teh‸ Gʼuiˬsha ngaˬ hta‸ kʼoˆ laˇ taˍ peuˬ. Ya‸ hkʼaˇ, yawˇ geh kʼaw‸ kʼo‸-e leh, nawˬ kʼaw‸ chehˇ sha la tuˬ yoˬ, teh‸ ca kʼaw‸ kʼoˆ piˇ-oˆ, teh‸ Eˇliˇshehˇ yawˇ hta‸ kʼoˆ piˇ ve yoˬ.

11Oˇ hkʼe kʼoˆ peuˬ hkʼaw‸ nawˉ, Eˇliˇshehˇ lehˬ Haˍzeˍlaˆ ve mehˆ hpfuhˇ hta‸ hkʼa deh‸ nyi tiˍ taˍ piˇ ve pa taw, Haˍzeˍlaˆ mehˆ hpfuhˇ haw jaˇ ve yoˬ. Oˇ htaˇ, Eˇliˇshehˇ mehˆ gʼuiˬ ya‸ la ve yoˬ.

12Aˬ hto‸ ma pa taw nawˬ hawˬ ve le, teh‸ Haˍzeˍlaˆ yawˇ hta‸ kʼoˆ piˇ ve yoˬ. Awˬ lawn kʼo, nawˬ Iˉsaˍreˍlaˆ chaw hui hta‸ hkʼaˬ hkʼe te piˇ tuˬ ve hta‸ ngaˬ shiˍ ve pa taw yoˬ. Nawˬ lehˬ, yawˇ hui ve ta‸ yehˬ teˇ hpaˍ hta‸ aˬ miˍ tuˉ baˬ leh, yawˇ hui ve yaˇ teˇ hpaˍ hta‸ tiˇ pehˍ piˇ tuˬ yoˬ. Yawˇ hui ve yaˇ ehˉ teˇ hpaˍ hta‸ miˬ chaˇ hkʼoˆ lo baˬ pehˍ leh, yaˇ hu chehˇ ve yaˇ miˇ teˇ hpaˍ ve gʼoˇ peˬ hta‸ shawˆ hkoˇ piˇ tuˬ yoˬ, teh‸ Eˇliˇshehˇ yawˇ hta‸ kʼoˆ piˇ ve yoˬ.

13Hkʼaˬ hkʼe te leh, ngaˬ oˇ hkʼe te gʼa law‸ law‸ kanˇ paˆ cawˬ la tuˬ ve le, teh‸ Haˍzeˍlaˆ Eˇliˇshehˇ hta‸ kʼoˆ piˇ ve yoˬ. Nawˬ lehˬ Suˇriˆ chaw hui ve jawˇmawˇ hpeh‸ la tuˬ ve awˬ lawn Gʼuiˬsha ngaˬ hta‸ kʼoˆ laˇ taˍ peuˬ, teh‸ Eˇliˇshehˇ yawˇ hta‸ kʼoˆ piˇ ve yoˬ.

14Oˇ ve hkʼaw‸ nawˉ, Haˍzeˍlaˆ jawˇmawˇ Beˍhaˍdaˆ geh kʼaw‸ kʼo‸-e ve yoˬ. Eˇliˇshehˇ hkʼaˬ hkʼe kʼoˆ laˇ le, teh‸ jawˇmawˇ yawˇ hta‸ na nyi piˇ ve yoˬ. Nawˬ kʼaw‸ chehˇ sha la tuˬ ceˇ, teh‸ yawˇ jawˇmawˇ hta‸ kʼoˆ piˇ ve yoˬ.

15Ya‸ hkʼaˇ, shawˉ pawˍ gaˬ htaˇ Haˍzeˍlaˆ lehˬ aˉ boˆ teˇ hkʼoˆ yuˬ leh iˉ kaˆ tiˆ nehˆ peuˬ hkʼaw‸ nawˉ, jawˇmawˇ ve mehˆ hpfuhˇ hta‸ hoˆ piˇ leh, jawˇmawˇ suh-e ve yoˬ. Hkʼe te leh, yawˇ Beˍhaˍdaˆ awˬ tan jawˇmawˇ kʼaw‸ te ve yoˬ.

16Iˉsaˍreˍlaˆ mvuhˇmiˬ hta‸ Aˍhaˆ ve yaˇ paˍ Yawˇranˍ uˉ peunˍ ve 5 hkʼaw‸ teˇ hkʼaw‸ htaˇ, Yuˇda‸ mvuhˇmiˬ hta‸ Yawˇshaˍhpaˆ ve yaˇ Yeˍhawˇranˍ kʼaw‸ uˉ peunˍ ve yoˬ.

17Yawˇ jawˇmawˇ tanˬ te htaˇ yawˇ ve a sha‸ 32 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 8 hkʼaw‸ uˉ peunˍ ve yoˬ.

18Yawˇ ve awˬ miˇ ma lehˬ, Aˍhaˆ ve yaˇ miˇ hpeh‸ ve yoˬ. Aˍhaˆ ve yehˬ yaˇ kʼa yaˇ teˇ hpaˍ hkʼa shuˍ, yawˇ htawˇ haiˬ ve kanˉ hta‸ te leh Gʼuiˬsha hta‸ te ya‸ jaˇ ve yoˬ.

19Ya‸ hkʼaˇ, Gʼuiˬsha lehˬ Yuˇda‸ mvuhˇmiˬ hta‸ maˇ te luˬ piˇ gaˇ. Awˬ lawn kʼo, yawˇ Daˍviˆ ve awˬ ceuˬ awˬ hkʼaˇ teˇ gʼaˇ peuˬ teˇ gʼaˇ hta‸ jawˇmawˇ te tcuh tuˬ yoˬ, teh‸ Daˍviˆ hta‸ ka ti‸ te piˇ taˍ peuˬ ve pa taw yoˬ.

20Yeˍhawˇranˍ jawˇmawˇ te chehˇ htaˇ, Eˇdonˍ chaw hui Yuˇda‸ chaw hta‸ kʼaw‸ hpfuhˆ leh, a shu yawˇ mvuhˇmiˬ yawˇ uˉ peunˍ kʼai ve yoˬ.

21Hkʼe te leh, Yeˍhawˇranˍ lehˬ Zaˍiˇraˆ venˇ hta‸ ca bawˆ yuˬ tuˬ, yawˇ ve iˉ mvuhˇ lawˬ hkʼa peu-eˬ hta‸ shiˍ tawˆ-e ve yoˬ. Oˇ kaˬ lo Eˇdonˍ chaw teˇ hpaˍ yawˇ hta‸ caw hoˆ taˍ ve yoˬ. Tanˇ hkuinˇ htaˇ yawˇ leh yawˇ ve ma‸ poˍ lonˉ teˇ hpaˍ hpaw tawˆ-e leh, yawˇ ve ma‸ yaˇ teˇ hpaˍ htawˇ a shu yawˇ ve yehˬ lo hpaw kʼo‸-e ve yoˬ.

22Oˇ ve teˇ nyi hta‸ te leh, Eˇdonˍ chaw hui lehˬ a shu yawˇ mvuhˇmiˬ hta‸ yawˇ uˉ peunˍ kʼai ve yoˬ. Awˬ yanˇ oˇ ve hkʼaw, Liˇbaˍnaˆ mvuhˇmiˬ htawˇ Yuˇda‸ mvuhˇmiˬ hta‸ kʼaw‸ hpfuhˆ ve yoˬ.

23Yeˍhawˇranˍ hkʼa te taˉ ve kanˉ hkʼa peu-eˬ, Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

24Yeˍhawˇranˍ suh-e leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Oˇ ve hkʼaw‸ nawˉ, yawˇ ve yaˇ paˍ Aˍhaˍziˆ yawˇ awˬ tan jawˇmawˇ kʼaw‸ te ve yoˬ.

25Iˉsaˍreˍlaˆ mvuhˇmiˬ hta‸ Aˍhaˆ ve yaˇ Yawˉranˍ uˉ peunˍ chehˇ ve 12 hkʼaw‸ teˇ hkʼaw‸ htaˇ, Yuˇda‸ mvuhˇmiˬ hta‸ Yeˍhawˇranˍ ve yaˇ Aˍhaˍziˆ kʼaw‸ uˉ peunˍ ve yoˬ.

26Yawˇ jawˇmawˇ tanˬ te htaˇ yawˇ ve a sha‸ 22 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ teˇ hkʼaw‸ ceh gʼa uˉ peunˍ taˉ ve yoˬ. Yawˇ ve awˬ e lehˬ, Aˍhaˆ yaˇ miˇ Aˍtaˍliˆ hpeh‸ leh, Iˉsaˍreˍlaˆ jawˇmawˇ Awˇmaˍriˆ ve awˬ hawehˍ hpeh‸ ve yoˬ.

27Aˍhaˍziˆ lehˬ, jawˇmawˇ Aˍhaˆ ve awˬ maˉ paˍ hpeh‸ leh, Aˍhaˆ ve yehˬ yaˇ kʼa yaˇ teˇ hpaˍ hkʼa shuˍ, yawˇ htawˇ Gʼuiˬsha hta‸ te ya‸ jaˇ ve yoˬ.

28Jawˇmawˇ Aˍhaˍziˆ lehˬ, Iˉsaˍreˍlaˆ jawˇmawˇ Yawˇranˍ hta‸ pawnˇ da‸ leh, Suˇriˆ jawˇmawˇ Haˍzeˍlaˆ hta‸ ca bawˆ ve yoˬ. Giˇlaˆ mvuhˇmiˬ hkʼaw cawˬ ve Raˍmoˆ teh‸ kʼoˆ ve chehˇ kuiˬ lo yawˇ hui bawˆ da‸ leh, Yawˇranˍ hta‸ hkaˆ ce heuˆ ve yoˬ.

29Hkʼe te leh, yawˇ Yeˍzaˍreˍlaˆ venˇ lo kʼaw‸ la leh naˆ tsuhˇ gu chehˇ htaˇ, Aˍhaˍziˆ yawˇ geh ca guiˇ la ve yoˬ.

← Chapter 7 Jump to: Chapter 9 →