2 Kings 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Yuˇda‸ mvuhˇmiˬ hta‸ jawˇmawˇ Yawˇshaˍhpaˆ uˉ peunˍ ve 18 hkʼaw‸ teˇ hkʼaw‸ htaˇ, Iˉsaˍreˍlaˆ mvuhˇmiˬ hta‸ Aˍhaˆ ve yaˇ Yawˇranˍ kʼaw‸ uˉ peunˍ ve yoˬ. Yawˇ lehˬ, Saˍmaˍriˆ venˇ hkʼaw 12 hkʼaw‸ uˉ peunˍ ve yoˬ.

2Yawˇ lehˬ Gʼuiˬsha hta‸ te ya‸ jaˇ ve yoˬ. Ya‸ hkʼaˇ, yawˇ ve awˬ pa leh yawˇ ve awˬ e Yeˍsaˍbeˍlaˆ hkʼe taw maˇ haiˬ. Baˍlaˆ gʼuiˬsha hta‸ oˉ kʼoˍ pui kuiˬ, yawˇ awˬ pa te taˉ ve shaˉ ho‸ teˇ hpaˍ hta‸ yawˇ te luˬ piˇ ve yoˬ.

3Ya‸ hkʼaˇ, yawˇ htawˇ Neˍbaˆ yaˇ Yeˍyawˇbaoˍ hkʼa shuˍ, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.

4Mawˇbaˆ jawˇmawˇ Meˍshaˆ lehˬ, yawˬ maˇ maˇ hu taˍ leh, teˇ hkʼaw‸ le le Iˉsaˍreˍlaˆ jawˇmawˇ hta‸ yawˬ ehˉ 100,000 hkeh leh, yawˬ 100,000 ve awˬ mvuh teˇ hpaˍ gʼa tanˇ piˇ chehˇ ve yoˬ.

5Ya‸ hkʼaˇ, jawˇmawˇ Aˍhaˆ suh peuˬ hkʼaw‸ nawˉ, jawˇmawˇ Meˍshaˆ Iˉsaˍreˍlaˆ chaw hui hta‸ kʼaw‸ hpfuhˆ ve yoˬ.

6Oˇ htaˇ, jawˇmawˇ Yawˉranˍ Saˍmaˍriˆ venˇ hkʼaw teˇ cawˬ haˉ tawˆ kʼai leh, yawˇ ve ma‸ yaˇ teˇ hpaˍ hta‸ shawˍ hpoˆ ve yoˬ.

7Peuˬ hkʼaw‸ nawˉ, yawˇ Yuˇda‸ jawˇmawˇ Yawˇshaˍhpaˆ hta‸ li‸ chi hkʼe bvuh‸ feu piˇ ve, Mawˇbaˆ jawˇmawˇ ngaˬ hta‸ kʼaw‸ hpfuhˆ peuˬ. Hkʼe te leh, nawˬ ngaˬ hta‸ ma‸ ga bawˆ laˇ tuˬ laˇ, teh‸ bvuh‸ feu piˇ ve yoˬ. Oˇ htaˇ Yuˇda‸ jawˇmawˇ lehˬ, Ngaˬ awˬ to, ngaˬ ve ma‸ yaˇ teˇ hpaˍ leh, ngaˬ ve iˉ mvuhˇ teˇ hpaˍ nawˬ geh ma‸ gʼa ga bawˆ laˇ tuˬ yoˬ.

8Ngaˬ hui hkʼaˬ hpawˇ lo gʼa ca bawˆ tuˬ le, teh‸ tawˇ kʼaw‸ yaw hkʼaw‸ feu piˇ ve yoˬ. Ngaˬ hui vuiˇ jaˇ ve Eˇdonˍ mvuhˇmiˬ hpawˇ lo ca caw bawˆ tuˬ yoˬ, teh‸ Yawˇranˍ tawˇ kʼaw‸ shanˍ feu piˇ ve yoˬ.

9Hkʼe te leh, jawˇmawˇ Yawˇranˍ, Yuˇda‸ jawˇmawˇ leh Eˇdonˍ jawˇmawˇ chi teˇ hpaˍ ma‸ bawˆ tuˬ tawˆ kʼai ve yoˬ. Yawˇ hui suhˍ nyi te toˇ peuˬ leh, pfuhˇ taˍ ve iˉ kaˆ peuˬ sheˬ ve yoˬ. Ma‸ yaˇ teˇ hpaˍ leh iˉ mvuhˇ teˇ hpaˍ ka‸ iˉ kaˆ maˇ gʼa dawˬ.

10Oˇ htaˇ, Yuˇda‸ jawˇmawˇ lehˬ, Ngaˬ hui hkʼaˬ hkʼe gʼa te tuˬ le. Gʼuiˬsha lehˬ, ngaˬ hui shehˆ gʼaˇ hta‸ Mawˇbaˆ jawˇmawˇ ve la‸ sheh hkʼaw lo chiˇ a‸ piˇ peuˬ, teh‸ kʼoˆ ve yoˬ.

11Oˇ htaˇ jawˇmawˇ Yawˇshaˍhpaˆ lehˬ, Ngaˬ hui awˬ pon Gʼuiˬsha hta‸ na nyi laˇ tuˬ ve choˬ kaˬ lo yawˇ ve tcuh kaˍ paˍ teˇ gʼaˇ gʼaˇ maˇ chehˇ laˇ, teh‸ kʼoˆ ve yoˬ. Jawˇmawˇ Yawˇranˍ ve ma‸ poˍ teˇ gʼaˇ kʼaw‸ yaw hkʼaw‸ leh, Shaˍhpaˆ ve yaˇ Eˇliˇshehˇ choˬ kaˬ lo chehˇ taˍ ve yoˬ. Yawˇ lehˬ, Eˇliˇya‸ ve awˬ la‸ gʼawˇ hpeh‸ ve yoˬ, teh‸ kʼoˆ ve yoˬ.

12Yawˇ lehˬ awˬ tehˬ awˬ na Gʼuiˬsha ve tcuh kaˍ paˍ teˇ gʼaˇ hpeh‸ ve yoˬ, teh‸ Yawˇshaˍhpaˆ kʼoˆ ve yoˬ. Hkʼe te leh, jawˇmawˇ oˇ ve shehˆ gʼaˇ Eˇliˇshehˇ geh kʼai ve yoˬ.

13Oˇ htaˇ Eˇliˇshehˇ lehˬ, Hkʼaˬ hkʼe te ngaˬ nawˬ hta‸ ga laˇ hpeh‸ tuˬ le. Nawˬ pa nawˬ e gʼaˇ va jaw ve tcuh kaˍ paˍ oˇ ve teˇ hpaˍ hta‸ ca na nyi-o, teh‸ Iˉsaˍreˍlaˆ jawˇmawˇ hta‸ kʼoˆ piˇ ve yoˬ. Yawˇranˍ kʼaw‸ yaw hkʼaw‸ leh kʼoˆ ve, Maˇ heˆ. Ngaˬ hui jawˇmawˇ shehˆ gʼaˇ hta‸ Mawˇbaˆ jawˇmawˇ la‸ hkʼaw chiˇ a‸ laˇ ve lehˬ Gʼuiˬsha hpeh‸ ve yoˬ, teh‸ Eˇliˇshehˇ hta‸ kʼaw‸ yaw hkʼaw‸ piˇ ve yoˬ.

14Oˇ htaˇ Eˇliˇshehˇ kʼoˆ ve, Te‸ chehˇ ve Gʼuiˬsha ve awˬ meh hta‸ cuˇ leh ngaˬ hkanˍ ve yoˬ. Yuˇda‸ jawˇmawˇ Yawˇshaˍhpaˆ ve mehˆ hpfuhˇ hta‸ ngaˬ maˇ nyi ve hkʼe kʼo, ngaˬ nawˬ hta‸ te‸ chiˉ ga laˇ tuˬ ve maˇ heˆ. Chi beu‸ tinˍ hteˆ puiˉ ve chaw teˇ gʼaˇ hta‸ ngaˬ geh shiˍ veu laˇ-oˆ, teh‸ Yawˇranˍ hta‸ kʼoˆ piˇ ve yoˬ.

15Tinˍ hteˆ puiˉ ve chaw tinˍ hteˆ chehˇ ve teˇ yanˇ, Gʼuiˬsha ve kanˇ paˆ Eˇliˇshehˆ awˬ hkʼoˆ lo ya‸ la ve yoˬ.

16Hkʼe te leh yawˇ kʼoˆ ve, Gʼuiˬsha chi hkʼe kʼoˆ ve yoˬ. Lawˬ hkʼo‸ chi ve hkʼaw gʼuiˬ hkʼaˇ duˇ taˍ-o‸.

17Mvuhˇ yeˬ maˇ laˬ, mvuhˇ haw maˇ meuˆ ve htawˇ, lawˬ hkʼo‸ chi ve hkʼaw iˉ kaˆ biˇ la tuˬ yoˬ. Nawˬ hui leh nawˬ hui ve iˉ mvuhˇ teˇ hpaˍ iˉ kaˆ hkʼa bvuhˆ gʼa dawˬ tuˬ yoˬ.

18Ya‸ hkʼaˇ, chi lehˬ Gʼuiˬsha awˬ pon sha jaˇ ve kanˉ teˇ maˬ ceh hpeh‸ ve yoˬ. Yawˇ lehˬ, Mawˇbaˆ chaw hui hta‸ nawˬ hui ve la‸ sheh hkʼaw lo chiˇ a‸ laˇ tuˬ sheˍ ve yoˬ.

19Nyi sha ve ta‸ yehˬ teˇ hpaˍ hta‸ nawˬ hui bawˆ yuˬ gʼa leh, yawˇ hui ve iˉ shiˍ cehˬ teˇ hpaˍ hta‸ ka‸ duˇ baˬ piˇ tuˬ yoˬ. Yawˇ hui ve iˉ kaˆ nanˬ bawˍ teˇ hpaˍ hta‸ nawˬ hui je‸ duˇ keu leh, yawˇ hui ve ti mi teˇ hpaˍ hkʼaw nawˬ hui haˉ pui shiˍ taˆ keu piˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

20Shawˉ pawˍ mvuhˇ shawˉ Gʼuiˬsha hta‸ tuˉ tanˇ piˇ ve awˬ yanˇ gaˬ htaˇ, Eˇdonˍ mvuhˇmiˬ hpawˇ lo iˉ kaˆ ya‸ la leh lawˬ hkʼo‸ oˇ ve hkʼaw biˇ sheˬ ve yoˬ.

21Mawˇbaˆ chaw hui lehˬ, jawˇmawˇ shehˆ gʼaˇ yawˇ hui hta‸ ca bawˆ la chehˇ ve awˬ hkawˇ hta‸ gʼa kaˇ ve teˇ yanˇ, ma‸ hkʼa bawˆ puiˉ ve hawˉ hkʼaˆ paˍ hkʼa peu-eˬ ve hta‸ kuˬ yuˬ leh, yawˇ hui ve miˬ tcuhˉ lo shaw taˍ ve yoˬ.

22Shawˉ pawˍ mvuhˇ shawˉ mvuhˇ nyi tawˆ la leh, yawˇ hui tu nyi ve teˇ yanˇ, iˉ kaˆ hta‸ mvuhˇ nyi gʼeuˆ ba ve awˬ suhˍ hkʼe hpeh‸ chehˇ ve hta‸ yawˇ hui gʼa mawˬ ve yoˬ.

23Oˇ htaˇ yawˇ hui kʼoˆ ve, Oˇ ve lehˬ awˬ suhˍ hpeh‸ ve yoˬ. Jawˇmawˇ oˇ ve shehˆ gʼaˇ yawˇ hui hkʼaˇ yawˇ hui bawˆ da‸ leh suh peuˬ ve yoˬ. Hkeu‸, ngaˬ hui yawˇ hui ve mawˇ ca gʼawˆ yuˬ-a veuˬ, teh‸ kʼoˆ ve yoˬ.

24Yawˇ hui oˇ kaˬ lo gʼuiˇ gaˬ la htaˇ, Iˉsaˍreˍlaˆ chaw hui yawˇ hui hta‸ gʼa‸ bawˆ kʼoˬ piˇ ve yoˬ. Yawˇ hui hta‸ tiˇ pehˍ leh, yawˇ hui ve venˇ teˇ hpaˍ hta‸ htawˇ te luˬ piˇ ve yoˬ.

25Yawˇ hui ti mi hkʼaw hpanˍ kʼai ve teˇ yanˇ, Iˉsaˍreˍlaˆ chaw hui haˉ pui shiˍ teˇ gʼaˇ teˇ shiˍ yuˬ leh ti mi oˇ ve teˇ hpaˍ hkʼaw baˬ keu piˇ ve yoˬ. Hkʼe te leh ti mi oˇ ve teˇ hpaˍ, haˉ pui de lonˉ hpeh‸ sheˬ ve yoˬ. Yawˇ hui lehˬ, nanˬ bawˍ teˇ hpaˍ hkʼaw htawˇ je‸ duˇ keu piˇ leh, hkʼa mawˬ ve iˉ shiˍ cehˬ teˇ hpaˍ hta‸ htu baˬ piˇ ve yoˬ. Awˬ leh meuˇ Kiˇraˆhaˍrehˆ venˇ lonˉ ceh tiˉ cawˬ taˉ ve yoˬ. Venˇ oˇ ve hta‸ htawˇ, hawˉ ma bawˆ puiˉ ve chaw hui caw hoˆ taˍ leh hawˉ ma bawˆ keu piˇ ve yoˬ.

26Mawˇbaˆ jawˇmawˇ lehˬ, yawˇ ma‸ bawˆ shonˇ la paˇ neˇ ve hta‸ gʼa shiˍ ve teˇ yanˇ, aˉhtaw pfuhˇ ve ma‸ yaˇ 700 gʼaˇ hta‸ shiˍ veu leh, Suˇriˆ jawˇmawˇ geh hpaw-e tuˬ coˇ caˇ ve yoˬ. Ya‸ hkʼaˇ yawˇ hpaw maˇ ponˬ.

27Hkʼe te leh, yawˇ lehˬ awˬ hkʼaw‸ nawˉ yawˇ awˬ tan jawˇmawˇ te tuˬ ve yawˇ ve yaˇ paˍ uiˍ hta‸ yuˬ leh, lanˇ venˇ hkʼoˆ lo Mawˇbaˆ gʼuiˬsha hta‸ tuˉ tanˇ piˇ ve yoˬ. Oˇ hkʼe te ve hta‸ Iˉsaˍreˍlaˆ chaw gʼa mawˬ htaˇ kawˆ jaˇ leh, yawˇ hui a shu yawˇ mvuhˇmiˬ lo kʼaw‸ hpfuhˆ kʼo‸-e ve yoˬ.

← Chapter 2 Jump to: Chapter 4 →