2 Kings 6

Lahu Bible Edited © Thailand Bible Society and Bible Society of Myanmar, 2010, 2020.

1Teˇ nyi htaˇ, Eˇliˇshehˇ ve awˬ la‸ gʼawˇ tcuh kaˍ paˍ oˇ ve teˇ hpaˍ Eˇliˇshehˇ geh laˬ leh, Ngaˬ hui ve chehˇ kuiˬ chi a ciˉ maˇ kʼehˬ.

2Hkʼe te leh, Yawˇdanˍ iˉ kaˆ lawˬ paˇ lo kʼai leh chehˇ kuiˬ awˬ suhˉ ca nyi tuˬ ngaˬ hui hta‸ a hkaw-anˬ pe‸ laˇ-oˆ, teh‸ yawˇ hta‸ kʼoˆ piˇ ve yoˬ. Kʼai loˬ, teh‸ Eˇliˇshehˇ yawˇ hui hta‸ kʼoˆ piˇ ve yoˬ.

3Oˇ htaˇ, yawˇ hui awˬ hkʼaw lo teˇ gʼaˇ Eˇliˇshehˇ hta‸ ka‸ yawˇ hui geh kʼai tuˬ lawˬ ve hkʼe, yawˇ htawˇ kʼai tuˬ nyi ma cawˇ ve yoˬ.

4Hkʼe te leh, yawˇ hui hkʼa peu-eˬ tawˆ kʼai ve yoˬ. Yawˇ hui oˇ kaˬ lo gaˬ leh kanˉ tanˬ te ve yoˬ.

5Yawˇ hui awˬ hkʼaw lo ve tcuh kaˍ paˍ teˇ gʼaˇ, iˉ kaˆ lawˬ paˇ lo suhˆ htu chehˇ ve teˇ yanˇ, ceˉ ceˇ kʼehˆ tawˆ-e leh iˉ kaˆ hkʼaw ce lo‸-e ve yoˬ. Hkʼe te leh, yawˇ Eˇliˇshehˇ geh laˬ leh, Saˍla‸ lonˉ-oˬ, ngaˬ hkʼaˬ hkʼe gʼa te tuˬ le. Ceˉ ceˇ oˇ ve lehˬ, ngaˬ shu geh ca ngaˍ veu laˇ taˍ ve ceˉ ceˇ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

6Oˇ htaˇ Eˇliˇshehˇ lehˬ, Ceˉ ceˇ oˇ ve hkʼaˬ lo ce ve le, teh‸ yawˇ hta‸ na nyi ve yoˬ. Chaw oˇ ve lehˬ ceˉ ceˇ ce lo‸-e ve chehˇ kuiˬ Eˇliˇshehˇ hta‸ maˍ piˇ ve yoˬ. Eˇliˇshehˇ lehˬ, suhˆ taˬ teˇ maˬ tawˆ leh iˉ kaˆ hkʼaw baˬ keu ve yoˬ. Oˇ htaˇ ceˉ ceˇ oˇ ve iˉ kaˆ hkʼoˆ lo fuˇ tawˆ la ve yoˬ.

7Haˆ yuˬ tawˆ-oˆ, teh‸ Eˇliˇshehˇ yawˇ hta‸ kʼoˆ piˇ leh, chaw oˇ ve haˆ gʼawˆ yuˬ ve yoˬ.

8Suˇriˆ jawˇmawˇ lehˬ, Iˉsaˍreˍlaˆ chaw hui hta‸ ma‸ bawˆ da‸ chehˇ ve yoˬ. Yawˇ lehˬ yawˇ ve ma‸ poˍ lonˉ hui hta‸ jehˬ da‸ leh, yawˇ hui ca deh tuˬ ve chehˇ kuiˬ hta‸ leuˆ yuˬ ve yoˬ.

9Oˇ htaˇ Eˇliˇshehˇ lehˬ, yawˇ hui deh chehˇ taˍ kuiˬ awˬ paˇ lo maˇ gʼa kʼai tuˬ, Iˉsaˍreˍlaˆ jawˇmawˇ hta‸ shaˍ ti‸ piˇ ve yoˬ. Awˬ lawn kʼo, Suˇriˆ chaw teˇ hpaˍ Iˉsaˍreˍlaˆ chaw hui hta‸ hkʼawˇ bawˆ tuˬ awˬ hkʼaˇ gu taˍ ve pa taw yoˬ.

10Hkʼe te leh Iˉsaˍreˍlaˆ jawˇmawˇ lehˬ, yawˇ ve ma‸ yaˇ teˇ hpaˍ hta‸ oˇ kaˬ lo maˇ gʼa kʼai tuˬ shaˍ ti‸ piˇ leh, hkʼa deh‸ shaw tcuh taˍ ve yoˬ. Chi hkʼe tiˉ te da‸ chehˇ ve awˬ yanˇ maw la peuˬ ve yoˬ.

11Chi hta‸ pa taw, Suˇriˆ jawˇmawˇ nyi ma luˬ la ve yoˬ. Hkʼe te leh yawˇ ma‸ poˍ lonˉ teˇ hpaˍ hta‸ kuˬ leh, Nawˬ hui teˇ hpaˍ hkʼaw, a shu teˇ gʼaˇ Iˉsaˍreˍlaˆ chaw hpawˇ lo chehˇ ve le, teh‸ yawˇ hui hta‸ na nyi ve yoˬ.

12Ngaˬ hui teˇ gʼaˇ ka‸ yawˇ hui hpawˇ lo maˇ chehˇ. Tcuh kaˍ paˍ Eˇliˇshehˇ lehˬ nawˬ hkʼa kʼoˆ ve tawˇ hkʼa peu-eˬ hta‸ yuˬ leh, Iˉsaˍreˍlaˆ jawˇmawˇ hta‸ hkʼawˇ kʼoˆ piˇ chehˇ ve yoˬ, teh‸ yawˇ hui jawˇmawˇ hta‸ kʼoˆ piˇ ve yoˬ.

13Yawˇ hta‸ ca hpfuhˆ nyi-o. Ngaˬ yawˇ hta‸ hpeh yuˬ tuˬ yoˬ, teh‸ jawˇmawˇ yawˇ hui hta‸ kʼoˆ piˇ ve yoˬ. Eˇliˇshehˇ Dawˇtanˍ venˇ hkʼaw chehˇ taˍ ve awˬ hkawˇ hta‸ jawˇmawˇ gʼa kaˇ ve teˇ yanˇ,

14yawˇ lehˬ iˉ mvuhˇ lawˬ ciˇ ve ma‸ yaˇ teˇ moˍ lonˉ hta‸ oˇ kaˬ lo kʼai peu ve yoˬ. Mvuhˇ hpeu‸ htaˇ yawˇ hui Dawˇtanˍ venˇ lo gaˬ la leh, venˇ hta‸ caw hoˆ taˍ ve yoˬ.

15Shawˉ pawˍ mvuhˇ shawˉ teˇ na‸ Eˇliˇshehˇ ve awˬ ceˬ paˍ tu la leh, yehˬ baˬ lo tawˆ-e ve teˇ yanˇ, Suˇriˆ ma‸ yaˇ teˇ hpaˍ venˇ hta‸ caw hoˆ taˍ peuˬ ve hta‸ gʼa mawˬ ve yoˬ. Hkʼe te leh, yawˇ Eˇliˇshehˇ geh kʼaw‸ kʼo‸-e leh, Ngaˬ hui gʼa luˬ gʼa sheˆ tuˬ yoˬ. Hkʼaˬ hkʼe gʼa te tuˬ le, teh‸ yawˇ hta‸ kʼoˆ piˇ ve yoˬ.

16Oˇ htaˇ Eˇliˇshehˇ lehˬ, Taˇ kawˆ. Ngaˬ hui hpawˇ lo chehˇ ve chaw lehˬ, yawˇ hui hpawˇ lo chehˇ ve chaw a‸ kehˉ maˇ jaˇ ve yoˬ, teh‸ yawˇ ve awˬ ceˬ paˍ hta‸ kʼoˆ piˇ ve yoˬ.

17Oˇ ve hkʼaw‸ nawˉ yawˇ bon lawˬ leh kʼoˆ ve, Gʼuiˬsha-oˬ, yawˇ ve mehˆ shiˍ hta‸ hpaw piˇ leh, yawˇ hta‸ a ciˉ mawˬ tcuh piˇ-oˆ, teh‸ kʼoˆ ve yoˬ. Gʼuiˬsha lehˬ Eˇliˇshehˇ ve bon lawˬ hkawˇ hta‸ na yuˬ ve yoˬ. Eˇliˇshehˇ ve awˬ ceˬ paˍ chiˇ nyi leh, hkʼaw hkʼoˆ lo aˬ miˍ ha iˉ mvuhˇ lawˬ hkʼa biˇ chehˇ taˍ ve hta‸ gʼa mawˬ ve yoˬ.

18Suˇriˆ ma‸ yaˇ teˇ hpaˍ venˇ hta‸ lo‸ bawˆ ve teˇ yanˇ, Eˇliˇshehˇ bon lawˬ leh kʼoˆ ve, Gʼuiˬsha-oˬ, chaw chi teˇ hpaˍ hta‸ mehˉ cuˉ piˇ law‸-o‸, teh‸ kʼoˆ ve yoˬ. Gʼuiˬsha yawˇ ve bon lawˬ hkawˇ hta‸ na yuˬ leh, yawˇ hui hta‸ mehˆ cuˉ piˇ lawˬ ve yoˬ.

19Oˇ htaˇ Eˇliˇshehˇ yawˇ hui geh kʼai leh, Nawˬ hui ya‸ kʼaw ya‸ chehˇ ve yoˬ. Nawˬ hui ca nyi chehˇ ve venˇ lehˬ, venˇ chi ve maˇ heˆ. Ngaˬ hkʼaˇ suh laˬ-o‸. Nawˬ hui ca chehˇ ve chaw geh ngaˬ shiˍ kʼai laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ. Hkʼe te leh, yawˇ yawˇ hui hta‸ Saˍmaˍriˆ venˇ lo shiˍ kʼai piˇ ve yoˬ.

20Yawˇ hui venˇ hkʼaw lo‸-e ve teˇ yanˇ, Eˇliˇshehˇ bon kʼaw‸ lawˬ leh, Gʼuiˬsha-oˬ, yawˇ hui ve mehˆ shiˍ hta‸ hpaw piˇ leh kʼaw‸ mawˬ la tcuh piˇ-oˆ, teh‸ kʼoˆ ve yoˬ. Gʼuiˬsha lehˬ yawˇ ve bon lawˬ hkawˇ hta‸ na yuˬ leh, yawˇ hui hta‸ mehˆ kʼaw‸ mawˬ la piˇ ve yoˬ. Oˇ htaˇ yawˇ hui lehˬ, Saˍmaˍriˆ venˇ hkʼaw gaˬ taˍ peuˬ ve hta‸ gʼa mawˬ ve yoˬ.

21Iˉsaˍreˍlaˆ jawˇmawˇ lehˬ, Suˇriˆ ma‸ yaˇ oˇ ve teˇ hpaˍ hta‸ gʼa mawˬ ve teˇ yanˇ, Ngaˬ yawˇ hui hta‸ gʼa tiˇ pehˍ tuˬ ve laˇ, teh‸ Eˇliˇshehˇ hta‸ na nyi ve yoˬ.

22Oˇ htaˇ Eˇliˇshehˇ lehˬ, Nawˬ maˇ gʼa tiˇ pehˍ. Ma‸ bawˆ kuiˬ hkʼaw hpeh gʼa ve canˇ paˍ teˇ hpaˍ hta‸ ka‸ maˇ gʼa tiˇ pehˍ. Yawˇ hui hta‸ caˍ piˇ taw piˇ leh, yawˇ hui ve jawˇmawˇ geh kʼaw‸ kʼo‸-e peu-o, teh‸ yawˇ hta‸ kʼoˆ piˇ ve yoˬ.

23Hkʼe te leh Iˉsaˍreˍlaˆ jawˇmawˇ lehˬ, yawˇ hui awˬ pon hti caˇ hti dawˬ ve pawehˇ teˇ maˬ te piˇ peuˬ hkʼaw‸ nawˉ, yawˇ hui hta‸ kʼo‸-e peu ve yoˬ. Oˇ ve teˇ nyi hta‸ te leh, Suˇriˆ chaw lehˬ Iˉsaˍreˍlaˆ chaw hta‸ maˇ ca kʼaw‸ bawˆ la ve yoˬ.

24Oˇ ve hkʼaw‸ nawˉ awˬ yanˇ maw la leh, Suˇriˆ jawˇmawˇ Beˍhaˍdaˆ Iˉsaˍreˍlaˆ mvuhˇmiˬ hta‸ ca kʼaw‸ bawˆ la leh, Saˍmaˍriˆ venˇ hta‸ caw hoˆ taˍ ve yoˬ.

25Chi hta‸ pa taw, venˇ hkʼaw lo caˇ tuˬ dawˬ tuˬ haˍ jaˇ la ve yoˬ. Piˉ laˬ oˉ kʼoˍ teˇ shiˍ ve 150 gʼa piˇ leh, guˇ hkʼehˇ teˇ panˇ ve hta‸ 9 hteh‸ gʼa vuiˬ caˇ ve yoˬ.

26Teˇ nyi htaˇ, Iˉsaˍreˍlaˆ jawˇmawˇ lanˇ venˇ hkʼoˆ lo ya‸ kʼaw te toˇ chehˇ htaˇ, Jawˇmawˇ-oˬ, ngaˬ hta‸ a ciˉ ga laˇ-oˆ, teh‸ yaˇ miˇ teˇ gʼaˇ yawˇ hta‸ kʼoˆ piˇ ve yoˬ.

27Oˇ htaˇ jawˇmawˇ kʼaw‸ yaw hkʼaw‸ leh, Gʼuiˬsha nawˬ hta‸ maˇ ga laˇ ve kʼo, ngaˬ nawˬ hta‸ hkʼaˬ hkʼe te ga laˇ hpeh‸ tuˬ le. Ngaˬ geh lo ka‸ caˬ shiˍ leh a pehˉ meuˇ gʼuiˬ cawˬ taˍ ve leh laˇ.

28Nawˬ aˬ hto‸ ma hpeh‸ ve le, teh‸ yaˇ miˇ oˇ ve hta‸ kʼoˆ piˇ ve yoˬ. Yaˇ miˇ kʼaw‸ yaw hkʼaw‸ leh kʼoˆ ve, Aˉ nyi htaˇ choˬ kaˬ lo chehˇ taˍ ve yaˇ miˇ ma chi ngaˬ geh laˬ leh, ya‸ nyi nawˬ ve yaˇ hta‸ tiˇ caˇ leh, shawˉ pawˍ kʼo ngaˬ ve yaˇ hta‸ kʼaw‸ tiˇ caˇ-a, teh‸ kʼoˆ laˇ ve yoˬ.

29Hkʼe te leh, aˉ nyi htaˇ ngaˬ ve yaˇ hta‸ tiˇ caˇ ve yoˬ. Ya‸ nyi yawˇ ve yaˇ hta‸ tiˇ caˇ tuˬ awˬ yanˇ gaˬ htaˇ, yawˇ ve yaˇ hta‸ ca shiˍ faˉ taˍ ve yoˬ, teh‸ jawˇmawˇ hta‸ kʼoˆ piˇ ve yoˬ.

30Tawˇ oˇ ve hta‸ jawˇmawˇ gʼa kaˇ ve teˇ yanˇ, dawˇ haˍ jaˇ leh yawˇ ve veu‸ kʼaˇ hta‸ tzuh‸ suhˍ ve yoˬ. Lanˇ venˇ oˇ ve paˇ lo chehˇ taˍ ve chaw teˇ hpaˍ lehˬ, jawˇmawˇ meh htuˉ pui hpa veu‸ deh taˍ ve hta‸ gʼa mawˬ ve yoˬ.

31Ya‸ nyi mvuhˇ maˇ hpeu‸ sheˍ htaˇ, Eˇliˇshehˇ ve oˉ kʼoˍ hta‸ ngaˬ maˇ gʼa tawˆ cheˆ ve kʼo, Gʼuiˬsha ngaˬ hta‸ tiˇ pehˍ laˇ piˇ-oˆ, teh‸ kʼoˆ ve yoˬ.

32Hkʼe te leh, yawˇ chaw teˇ gʼaˇ hta‸ hpehˇ leh Eˇliˇshehˇ hta‸ ca kuˬ tcuh ve yoˬ. Awˬ yanˇ oˇ ve hkʼaw, Eˇliˇshehˇ lehˬ yawˇ ve yehˬ lo ca guiˇ la ve awˬ hoˉ awˬ naˬ teˇ hpaˍ geh na‸ uˉ te da‸ chehˇ ve yoˬ. Jawˇmawˇ tcuh peu ve chaw oˇ ve Eˇliˇshehˇ geh maˇ gaˬ la sheˍ gʼuˇ suhˍ, Eˇliˇshehˇ lehˬ awˬ hoˉ awˬ naˬ oˇ ve teˇ hpaˍ hta‸ chi hkʼe kʼoˆ piˇ chehˇ ve yoˬ. Chaw hta‸ tiˇ pehˍ shehˍ hpaˇ oˇ ve lehˬ, ngaˬ hta‸ ca tiˇ pehˍ piˇ tuˬ chaw teˇ gʼaˇ hta‸ peu laˇ chehˇ ve yoˬ. Aˬ muiˬ teˇ hkui yawˇ choˬ kaˬ gaˬ la ve kʼo, yawˇ hta‸ yehˬ hkʼaw taˇ lo‸ la tcuh. Yehˬ miˉ hkʼa deh‸ hoˆ taˍ-o‸. Jawˇmawˇ ka‸ yawˇ hkʼaˇ suh gʼa‸ laˬ tuˬ yoˬ, teh‸ yawˇ hui hta‸ kʼoˆ piˇ ve yoˬ.

33Yawˇ oˇ hkʼe kʼoˆ chehˇ ve teˇ hkui, jawˇmawˇ awˬ to gaˬ la leh, Ngaˬ hui chi hkʼe gʼa hkanˍ ve lehˬ, Gʼuiˬsha hta‸ pa taw yoˬ. Yawˇ teˇ ceuˬ ceuˬ kʼaw‸ te laˇ tuˬ ve hta‸, aˬ hto‸ ma pa taw ngaˬ gʼa kʼaw‸ law nyi chehˇ tuˬ sheˍ ve le, teh‸ Eˇliˇshehˇ hta‸ kʼoˆ piˇ ve yoˬ.

← Chapter 5 Jump to: Chapter 7 →