2 Kings 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to: Chapter 15 →

1Iˉsaˍreˍlaˆ mvuhˇmiˬ hta‸ Yawˇhkaˆ ve yaˇ Yeˍhawˇshaˆ uˉ peunˍ chehˇ ve nyiˇ hkʼaw‸ teˇ hkʼaw‸ htaˇ, Yuˇda‸ mvuhˇmiˬ hta‸ Yawˇshaˆ ve yaˇ Aˍmaˍziˆ kʼaw‸ uˉ peunˍ ve yoˬ.

2Aˍmaˍziˆ jawˇmawˇ tanˬ te htaˇ, yawˇ ve a sha‸ 25 hkʼaw‸ gaˬ peuˬ leh Yeˍruˆsaˍlehnˍ venˇ hta‸ 29 hkʼaw‸ uˉ peunˍ ve yoˬ. Yawˇ ve awˬ e lehˬ, Yeˍruˆsaˍlehnˍ venˇ yaˇ Yuˇdanˍ hpeh‸ ve yoˬ.

3Yawˇ lehˬ, Gʼuiˬsha nyi ma cawˇ ve kanˉ hta‸ tiˉ te ve yoˬ. Ya‸ hkʼaˇ, yawˇ lehˬ yawˇ ve awˬ puˍ lonˉ Daˍviˆ hkʼe maˇ heˆ. Yawˇ ve awˬ pa Yawˇshaˆ te ve hkʼe gʼa‸ te ve yoˬ.

4Awˬ nu ve gʼuiˬsha teˇ hpaˍ ve bon yehˬ hta‸ yawˇ maˇ te luˬ piˇ. Hkʼe te leh, chaw yaˇ teˇ hpaˍ gʼuiˬsha oˇ ve teˇ hpaˍ hta‸ tuˉ tanˇ piˇ chehˇ sheˍ ve yoˬ.

5Aˍmaˍziˆ jawˇmawˇ hpeh‸ la peuˬ hkʼaw‸ nawˉ, yawˇ ve awˬ pa hta‸ tiˇ pehˍ ve ma‸ poˍ lonˉ teˇ hpaˍ hta‸ yawˇ kʼaw‸ tiˇ pehˍ piˇ ve yoˬ.

6Ya‸ hkʼaˇ, yawˇ lehˬ ma‸ poˍ lonˉ oˇ ve teˇ hpaˍ ve yaˇ teˇ hpaˍ hta‸ maˇ tiˇ pehˍ piˇ. Moˉseˍ awˬliˇtawˇhkawˇ awˬ hkʼaw lo kʼoˆ taˍ ve Gʼuiˬsha ve tawˇ chi teˇ hkawˇ hta‸ yawˇ hkʼa deh‸ na yuˬ ve yoˬ. Yaˇ teˇ hpaˍ te ya‸ ve venˇbaˆ awˬ tan, awˬ pa awˬ e hta‸ maˇ gʼa tiˇ pehˍ. Awˬ pa awˬ e te ya‸ ve venˇbaˆ awˬ tan, yaˇ teˇ hpaˍ hta‸ maˇ gʼa tiˇ pehˍ. Te ya‸ ve chaw hta‸ tiˉ gʼa tiˇ pehˍ ve yoˬ, teh‸ kʼoˆ taˍ ve yoˬ.

7Aˍmaˍziˆ lehˬ, Aˉ leh‸ lawˬ hkʼo‸ teh‸ kʼoˆ ve chehˇ kuiˬ lo Eˇdonˍ chaw teˇ meunˍ gʼaˇ hta‸ tiˇ pehˍ piˇ ve yoˬ. Sheˍlaˆ venˇ hta‸ htawˇ yawˇ bawˆ yuˬ leh, awˬ meh awˬ suhˉ Yuˆteˍlaˆ teh‸ kʼaw‸ meh piˇ ve yoˬ. Ya‸ nyi hkʼa gaˬ oˇ hkʼe meh taˍ sheˍ ve yoˬ.

8Oˇ ve hkʼaw‸ nawˉ, Aˍmaˍziˆ lehˬ Iˉsaˍreˍlaˆ jawˇmawˇ Yeˍhawˇshaˆ geh lo yawˇ ve chaw hta‸ hpehˇ peu leh, yawˇ hta‸ ca bawˆ la tuˬ ca hto piˇ tcuh ve yoˬ.

9Hkʼe te leh, jawˇmawˇ Yeˍhawˆshaˆ yawˇ hta‸ chi hkʼe kʼaw‸ kʼoˆ hkʼaw‸ feu piˇ ve yoˬ. Teˇ pawˆ htaˇ, Leˍbaˍnonˍ hkʼaw hkʼoˆ lo cawˬ ve aˉ chuˇ buiˇ teˇ maˬ lehˬ, htawˇ cehˬ lonˉ teˇ cehˬ hta‸, Nawˬ ve yaˇ miˇ ngaˬ ve yaˇ paˍ hta‸ ka piˇ-oˆ, teh‸ kʼoˆ piˇ ve yoˬ. Oˇ htaˇ haiˬ ve to nuˇ to shaˆ teˇ hkeh oˇ kaˬ lo hpanˍ kʼai cawˇ leh, aˉ chuˇ buiˇ oˇ ve hta‸ naˆ nehˆ sheˬ ve yoˬ ceˇ.

10Aˍmaˍziˆ-oˬ, chi beu‸ nawˬ lehˬ Eˇdonˍ chaw hta‸ ma‸ bawˆ gʼaˇ ve pa taw, nyi ma uiˍ chehˇ ve yoˬ. Nawˬ ve yehˬ hkʼaw lo ta‸ iˉ gawˬ lehˍ chehˇ taˍ leh, awˬ me‸ awˬ hponˇ yuˬ chehˇ-oˆ. Aˬ hto‸ ma pa taw, nawˬ sho‸ sha‸ ve awˬ ceuˬ hta‸ heuˆ gaˇ ve le. Oˇ hkʼe te ve kʼo, nawˬ leh nawˬ ve chaw teˇ hpaˍ tiˉ gʼa hkanˍ tuˬ yoˬ, teh‸ Aˍmaˍziˆ hta‸ kʼaw‸ kʼoˆ hkʼaw‸ feu piˇ ve yoˬ.

11Ya‸ hkʼaˇ, Aˍmaˍziˆ maˇ na yuˬ. Hkʼe te leh, jawˇmawˇ Yeˍhawˇshaˆ yawˇ ve ma‸ yaˇ teˇ hpaˍ hta‸ shiˍ laˬ leh, Yuˇda‸ mvuhˇmiˬ hkʼaw cawˬ ve Behˆseˍmehˆ venˇ hkʼaw lo, jawˇmawˇ Aˍmaˍziˆ hta‸ bawˆ da‸ ve yoˬ.

12Aˍmaˍziˆ ma‸ bawˆ shonˇ leh, yawˇ ve ma‸ yaˇ hkʼa peu-eˬ a shu yawˇ ve chehˇ kuiˬ lo gʼuiˇ kʼo‸-e ve yoˬ.

13Yeˍhawˇshaˆ lehˬ, jawˇmawˇ Aˍmaˍziˆ hta‸ hpeh yuˬ peuˬ hkʼaw‸ nawˉ, Yeˍruˆsaˍlehnˍ venˇ hkʼaw lo‸-e leh, lanˇ venˇ 400 shaw‸ hkʼe te luˬ piˇ taˉ ve yoˬ. Lanˇ venˇ oˇ ve lehˬ, Eˇhpaˍrenˍ taˍ meu‸ hpe‸ lo te leh, awˬ ceˍ kʼaweh‸ ve taˍ meu‸ hpe‸ lo hkʼa gaˬ hpeh‸ ve yoˬ.

14Yawˇ lehˬ, hkʼa mawˬ ve hpu shi hkʼa peu-eˬ, leh bon yehˬ hkʼaw cawˬ ve mawˇ hkʼa peu-eˬ hta‸ Saˍmaˍriˆ venˇ lo yuˬ kʼo‸-e ve yoˬ. Chaw laiˉ gʼaˇ hta‸ htawˇ shiˍ kʼai ve yoˬ.

15Yeˍhawˇshaˆ hkʼa te ve kanˉ hkʼa peu-eˬ, leh yawˇ Yuˇda‸ jawˇmawˇ Aˍmaˍziˆ hta‸ bawˆ gʼaˇ ve awˬ lawn, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

16Yeˍhawˇshaˆ suh-e leh, shu yawˇ hta‸ Saˍmaˍriˆ venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Yeˍyawˇbaoˍ (2) yawˇ awˬ tan jawˇmawˇ kʼaw‸ te ve yoˬ.

17Yuˇda‸ jawˇmawˇ Aˍmaˍziˆ lehˬ, Iˍsaˍreˍlaˆ jawˇmawˇ Yeˍhawˇshaˆ suh peuˬ hkʼaw‸ nawˉ ka‸, 15 hkʼaw‸ a sha‸ te‸ chehˇ sheˍ ve yoˬ.

18Aˍmaˍziˆ hkʼa te ve kanˉ hkʼa peu-eˬ, Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

19Aˍmaˍziˆ hta‸ tiˇ pehˍ tuˬ, Yeˍruˆsaˍlehnˍ venˇ hkʼaw shu hkʼawˇ jehˬ da‸ ve yoˬ. Hkʼe te leh, Aˍmaˍziˆ Laˍhkiˇshaˆ venˇ lo hpaw-e ve yoˬ. Ya‸ hkʼaˇ, yawˇ ve canˇ paˍ teˇ hpaˍ yawˇ hkʼaˇ suh gʼa‸ kʼai leh, yawˇ hta‸ oˇ kaˬ lo tiˇ pehˍ piˇ ve yoˬ.

20Shu yawˇ hta‸ Yeˍruˆsaˍlehnˍ venˇ lo kʼaw‸ yuˬ hkʼaw‸ veu laˇ leh, Daˍviˆ ve venˇ hkʼaw tuˍ piˇ ve yoˬ.

21Oˇ ve hkʼaw‸ nawˉ, Yuˇda‸ chaw teˇ hpaˍ lehˬ a sha‸ 16 hkʼaw‸ tiˉ gaˬ sheˍ ve yawˇ ve yaˇ paˍ Awˇziˆ hta‸ jawˇmawˇ kʼaw‸ te tcuh ve yoˬ.

22Yawˇ ve awˬ pa suh peuˬ hkʼaw‸ nawˉ, Awˇziˆ lehˬ Eˇlaˆ venˇ hta‸ kʼaw‸ gu te ve yoˬ.

23Yuˇda‸ mvuhˇmiˬ hta‸ Yawˇshaˆ ve yaˇ Aˍmaˍziˆ uˉ peunˍ chehˇ ve 15 hkʼaw‸ teˇ hkʼaw‸ htaˇ, Iˉsaˍreˍlaˆ mvuhˇmiˬ hta‸ Yeˍhawˇshaˆ ve yaˇ Yeˍyawˇbaoˍ kʼaw‸ uˉ peunˍ ve yoˬ. Yawˇ Saˍmaˍriˆ venˇ hta‸ 41 hkʼaw‸ uˉ peunˍ ve yoˬ.

24Yawˇ lehˬ Neˍbaˆ ve yaˇ Yeˍyawˇbaoˍ hkʼa shuˍ, Gʼuiˬsha hta‸ te ya‸ jaˇ leh, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.

25Yawˇ lehˬ, awˬ na hpawˇ lo cawˬ ve Haˍmaˆ kʼaˍ le‸ hta‸ te leh, awˬ hawˉ hpawˇ lo cawˬ ve Suh ve laˇ tsuhˇ gʼuiˬ lo hkʼa gaˬ, Iˉsaˍreˍlaˆ mvuhˇmiˬ hkʼa peu-eˬ ve hta‸ kʼaw‸ bawˆ yuˬ ve yoˬ. Chi hkʼe hpeh‸ la ve lehˬ, Gaˍheˍhpaˍ venˇ hkʼaw chehˇ ve tcuh kaˍ paˍ Aˍmiˆtehˇ ve yaˇ Yoˇna‸ hta‸ Gʼuiˬsha cuˇ leh kʼoˆ taˍ ve tawˇ biˇ la tuˬ te ve yoˬ.

26Iˉsaˍreˍlaˆ chaw hui gʼa tu‸ gʼa hkanˍ chehˇ ve hta‸ Gʼuiˬsha gʼa mawˬ ve yoˬ. Yawˇ hui hta‸ ga piˇ paˍ teˇ gʼaˇ ka‸ maˇ cawˬ.

27Yawˇ hui luˬ kʼai sheˆ kʼai ve hta‸ Gʼuiˬsha nyi ma maˇ cawˇ. Chi hta‸ pa taw, yawˇ Jawˇmawˇ Yeˍyawˇbaoˬ (2) hta‸ cuˇ leh, yawˇ hui hta‸ htaiˍ hkʼaw‸ piˇ ve yoˬ.

28Yeˍyawˇbaoˍ (2) hkʼa te ve kanˉ hkʼa peu-eˬ, leh Daˍmaˍsehˆ venˇ leh Haˍmaˆ venˇ teˇ hpaˍ hta‸ yawˇ hkʼaˬ hkʼe te kʼaw‸ bawˆ yuˬ ve awˬ lawn teˇ hpaˍ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

29Yeˍyawˇbaoˍ suh-e leh, shu yawˇ hta‸ tuˍ piˇ ve yoˬ. Hkʼe te leh, yawˇ ve yaˇ Zaˍhkaˍriˆ yawˇ awˬ tan jawˇmawˇ kʼaw‸ te ve yoˬ.

← Chapter 13 Jump to: Chapter 15 →