2 Kings 13

Lahu Bible Edited © Thailand Bible Society and Bible Society of Myanmar, 2010, 2020.

← Chapter 12 Jump to: Chapter 14 →

1Yuˇda‸ mvuhˇmiˬ hta‸ Aˍhaˍziˆ ve yaˇ Yawˇshaˆ jawˇmawˇ te chehˇ ve 23 hkʼaw‸ teˇ hkʼaw‸ htaˇ, Iˉsaˍreˍlaˆ mvuhˇmiˬ hta‸ Yeˍhuˆ ve yaˇ Yawˇhkaˆ jawˇmawˇ te leh, Saˍmaˍriˆ venˇ hta‸ 17 hkʼaw‸ uˉ peunˍ taˉ ve yoˬ.

2Jawˇmawˇ Yeˍyawˇbaoˍ hkʼa shuˍ, yawˇ lehˬ Gʼuiˬsha hta‸ te ya‸ jaˇ leh, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ. Yawˇ venˇbaˆ te chehˇ ve hta‸ maˇ dawˇ hpfuhˆ.

3Hkʼe te leh, Gʼuiˬsha Iˉsaˍreˍlaˆ chaw hui hta‸ nyi ma zuhˆ jaˇ leh, Suˇriˆ jawˇmawˇ Haˍzeˍlaˆ leh yawˇ ve yaˇ Beˍhaˍdaˆ, yawˇ hui hta‸ teˇ hkui teˇ hkui ca bawˆ la tcuh ve yoˬ.

4Oˇ htaˇ, Yawˇhkaˆ Gʼuiˬsha geh bon lawˬ ve yoˬ. Suˇriˆ jawˇmawˇ lehˬ, Iˉsaˍreˍlaˆ chaw hui hta‸ hkʼaˬ ma fawˉ mehˍ piˇ chehˇ ve hta‸ yawˇ gʼa mawˬ ve teˇ yanˇ, Yawˇhkaˆ ve bon lawˬ hkawˇ hta‸ na yuˬ piˇ ve yoˬ.

5Gʼuiˬsha lehˬ, Iˉsaˍreˍlaˆ chaw hui hta‸ sheh kʼai piˇ tuˬ ve awˬ hoˉ teˇ gʼaˇ peu laˇ piˇ leh, yawˇ lehˬ Iˉsaˍreˍlaˆ chaw hui hta‸ htaiˍ hkʼaw‸ piˇ ve yoˬ. Hkʼe te leh, yawˇ hui ponˬ laˬ htaˇ hkʼe gawˬ lehˍ gʼa chehˇ ve yoˬ.

6Ya‸ hkʼaˇ, yawˇ hui lehˬ jawˇmawˇ Yeˍyawˇbaoˍ te taˉ ve haiˬ ve kanˉ teˇ hpaˍ hta‸ maˇ baˬ taˉ. Venˇbaˆ kʼaw‸ caˉ te chehˇ ve yoˬ. Aˍsheˍraˆ gʼuiˬsha ma ve shaˉ ho‸ Saˍmaˍriˆ venˇ hkʼaw cawˬ taˍ sheˍ ve yoˬ.

7Jawˇmawˇ Haˍzeˍlaˆ lehˬ, Iˉsaˍreˍlaˆ ma‸ yaˇ teˇ hpaˍ hta‸ je‸ meu-e hkʼa shuˍ shawˍ leh laiˉ pawˆ naˆ nehˆ piˇ peuˬ ve pa taw, jawˇmawˇ Yawˇhkaˆ geh ma‸ yaˇ a ciˉ ceh tiˉ cawˬ taˉ ve yoˬ. Iˉ mvuhˇ ciˇ ve ma‸ yaˇ 50 gʼaˇ, iˉ mvuhˇ lawˬ 10 maˬ, ma‸ yaˇ 10,000 hkʼe ceh tiˉ cawˬ ve yoˬ.

8Yawˇhkaˆ hkʼa te ve kanˉ hkʼa peu-eˬ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

9Yawˇ suh-e leh, shu yawˇ hta‸ Saˍmaˍriˆ venˇ hkʼaw tuˍ piˇ ve yoˬ. Hkʼe te leh, yawˇ ve yaˇ Yeˍhawˇshaˆ yawˇ awˬ tan jawˇmawˇ kʼaw‸ te ve yoˬ.

10Yuˇda‸ mvuhˇmiˬ hta‸ Yawˇshaˆ uˉ peunˍ chehˇ ve 37 hkʼaw‸ teˇ hkʼaw‸ htaˇ, Iˉsaˍreˍlaˆ mvuhˇmiˬ hta‸ Yawˇhkaˆ ve yaˇ Yeˍhawˇshaˆ jawˇmawˇ kʼaw‸ te leh, Saˍmaˍriˆ venˇ hta‸ 16 hkʼaw‸ uˉ peunˍ ve yoˬ.

11Yawˇ htawˇ, jawˇmawˇ Yeˍyawˇbaoˍ hkʼa shuˍ Gʼuiˬsha hta‸ te ya‸ jaˇ leh, Iˉsaˍreˍlaˆ chaw hui hta‸ ya‸ kʼaw sheh ya‸ piˇ ve yoˬ.

12Yeˍhawˇshaˆ hkʼa te ve kanˉ hkʼa peu-eˬ, leh yawˇ ha‸ hanˉ ve hkʼaw Yuˇda‸ jawˇmawˇ Aˍmaˍziˆ hta‸ bawˆ da‸ ve awˬ lawn teˇ hpaˍ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

13Yeˍhawˇshaˆ suh-e leh, shu yawˇ hta‸ Saˍmaˍriˆ venˇ hkʼaw tuˍ piˇ ve yoˬ. Hkʼe te leh, yawˇ ve yaˇ Yeˍyawˇbaoˍ jawˇmawˇ kʼaw‸ te ve yoˬ.

14Tcuh kaˍ paˍ Eˇliˇshehˇ naˬ jaˇ leh, suh la paˇ neˇ ve yoˬ. Oˇ htaˇ, Iˉsaˍreˍlaˆ jawˇmawˇ Yeˍhawˇshaˆ yawˇ geh ca guiˇ-e ve yoˬ. Ngaˬ pa-oˬ, ngaˬ pa-oˬ, nawˬ lehˬ Iˉsaˍreˍlaˆ chaw hui ve awˬ gʼaˇ awˬ shaˉ hpeh‸ ve yoˬ, teh‸ kʼoˆ leh hawˬ ve yoˬ.

15Oˇ htaˇ Eˇliˇshehˇ lehˬ, Hkaˆ leh hkaˆ ce teˇ hpaˍ ca yuˬ-o‸, teh‸ jawˇmawˇ hta‸ kʼoˆ piˇ ve yoˬ. Hkʼe te leh, jawˇmawˇ lehˬ hkaˆ leh hkaˆ ce teˇ hpaˍ yuˬ laˬ leh,

16hkaˆ ce teˇ maˬ hta‸ bawˆ peu tuˬ, Eˇliˇshehˇ yawˇ hta‸ kʼoˆ piˇ ve yoˬ. Jawˇmawˇ lehˬ hkaˆ ce teˇ maˬ hta‸ bawˆ peu tuˬ gu chehˇ ve teˇ yanˇ, Eˇliˇshehˇ lehˬ yawˇ ve la‸ sheh jawˇmawˇ ve la‸ sheh hkʼoˆ taˍ ve yoˬ.

17Eˇliˇshehˇ kʼoˆ piˇ ve hkʼe, jawˇmawˇ lehˬ Suˇriˆ mvuhˇmiˬ hpawˇ lo cawˬ ve yehˬ miˉ ehˉ teˇ maˬ hpaw leh, bawˆ peu ve yoˬ. Peuˬ hkʼaw‸ nawˉ Eˇliˇshehˇ kʼoˆ ve, Nawˬ lehˬ Gʼuiˬsha ve hkaˆ ce hpeh‸ ve yoˬ. Nawˬ hta‸ cuˇ leh Yawˇ Suˇriˆ mvuhˇmiˬ hta‸ bawˆ yuˬ tuˬ yoˬ. Nawˬ lehˬ Suˇriˆ chaw hui hta‸ Aˍhpehˆ venˇ hkʼaw gʼa bawˆ da‸ leh, nawˬ ma‸ bawˆ gʼaˇ tuˬ yoˬ, teh‸ jawˇmawˇ hta‸ kʼoˆ piˇ ve yoˬ.

18Oˇ ve hkʼaw‸ nawˉ Eˇliˇshehˇ lehˬ, hkaˆ ce teˇ maˬ hta‸ kʼaw‸ yuˬ leh miˬguiˬ hta‸ jaw‸ tuˬ tawˇ piˇ ve yoˬ. Jawˇmawˇ lehˬ miˬguiˬ hta‸ shehˆ hkʼe jaw‸ peuˬ leh hpehˇ sheˬ ve yoˬ.

19Chi hkʼe te ve hta‸ Eˇliˇshehˇ nyi ma zuhˆ ve yoˬ. Hkʼe te leh yawˇ kʼoˆ ve, Nawˬ miˬguiˬ hta‸ ngaˇ hkʼe, hkaw‸ hkʼe jaw‸ cawˇ ve yoˬ. Nawˬ oˇ hkʼe te ve hkʼe kʼo, Suˇriˆ mvuhˇmiˬ hkʼa peu-eˬ ve hta‸ nawˬ bawˆ gʼaˇ tuˬ yoˬ. Ya‸ hkʼaˇ, chi beu‸ nawˬ shehˆ pawˆ tiˉ ma‸ bawˆ gʼaˇ tuˬ yoˬ, teh‸ jawˇmawˇ hta‸ kʼoˆ piˇ ve yoˬ.

20Oˇ ve hkʼaw‸ nawˉ Eˇliˇshehˇ suh-e leh, shu yawˇ hta‸ tuˍ piˇ ve yoˬ. Teˇ hkʼaw‸ le le, Mawˇbaˆ chaw teˇ hpaˍ Iˉsaˍreˍlaˆ chaw hui hta‸ ca bawˆ la ve yoˬ.

21Teˇ pawˆ htaˇ, Iˉsaˍreˍlaˆ chaw teˇ gʼaˇsuh-e leh ca tuˍ piˇ chehˇ htaˇ, Mawˇbaˆ chaw teˇ hpaˍ ca bawˆ la leh, yawˇ hui kawˆ jaˇ ve pa taw, chaw suh ku hta‸ Eˇliˇshehˇ ve tuˍ hpfuh hkʼaw baˬ keu taˉ leh gʼuiˇ hpaw-e ve yoˬ. Chaw suh ku oˇ ve Eˇliˇshehˇ ve awˬ mu‸ ku hta‸ daw‸ htaˇ, teˇ cawˬ haˉ kʼaw‸ te‸ la leh huˉ sheˬ ve yoˬ.

22Iˉsaˍreˍlaˆ mvuhˇmiˬ hta‸ Yawˇhkaˆ uˉ peunˍ chehˇ ve awˬ yanˇ hkʼaw, Suˇriˆ jawˇmawˇ Haˍzeˍlaˆ lehˬ, Iˉsaˍreˍlaˆ chaw hui hta‸ gʼaˇ hte‸ fawˉ mehˍ piˇ chehˇ ve yoˬ.

23Ya‸ hkʼaˇ, Gʼuiˬsha lehˬ yawˇ ve chaw teˇ hpaˍ hta‸ ha kʼaˉ piˇ leh luˬ kuiˬ sheˆ kuiˬ lo maˇ gaˬ tcuh piˇ. Aˍbraˍhanˍ, Iˉcaˆ, Yaˍkoˆ hui hta‸ yawˇ ka ti‸ te piˇ taˍ ve hkʼe, yawˇ hui hta‸ ga piˇ chehˇ ve yoˬ. Yawˇ ve chaw teˇ hpaˍ hta‸ yawˇ teˇ pawˆ ka‸ maˇ leunˇ.

24Suˇriˆ jawˇmawˇ Haˍzeˍlaˆ suh-e ve teˇ yanˇ, yawˇ ve yaˇ Beˍhaˍdaˆ yawˇ awˬ tan jawˇmawˇ kʼaw‸ te ve yoˬ.

25Oˇ htaˇ, Iˉsaˍreˍlaˆ jawˇmawˇ Yeˍhawˇshaˆ, Beˍhaˍdaˆ hta‸ shehˆ pawˆ hkʼa gaˬ ma‸ bawˆ gʼaˇ leh, yawˇ ve awˬ pa Yawˇhkaˆ awˬ co-e htaˇ Beˍhaˍdaˆ bawˆ yuˬ kʼai taˍ ve venˇ teˇ hpaˍ hta‸ kʼaw‸ yuˬ hkʼaw‸ gʼa ve yoˬ.

← Chapter 12 Jump to: Chapter 14 →