2 Kings 23

Lahu Bible Edited © Thailand Bible Society and Bible Society of Myanmar, 2010, 2020.

1Jawˇmawˇ Yawˇshiˆ lehˬ, Yeˍruˆsaˍlehnˍ leh Yuˇda‸ mvuhˇmiˬ hkʼaw chehˇ ve awˬ hoˉ awˬ naˬ teˇ hpaˍ hta‸ kuˬ hpawnˬ ve yoˬ.

2Oˇ htaˇ, jawˇmawˇ leh paw hkuˇ teˇ hpaˍ, tcuh kaˍ paˍ teˇ hpaˍ leh awˬ nu ve chaw hkʼa peu-eˬ hta‸ bon yehˬ hkʼaw shiˍ kʼai leh, bon yehˬ hkʼaw hpfuhˆ mawˬ taˍ ve li‸ daw oˇ ve teˇ daw hkʼa peu-eˬ yawˇ hui hta‸ gʼaw maˍ piˇ ve yoˬ.

3Yawˇ lehˬ, yehˬ hkuiˉ daw paˇ lo huˉ taˍ leh, Gʼuiˬsha ve awˬliˇtawˇhkawˇ oˇ ve hkʼa peu-eˬ hta‸ nyi ma awˬ tawˬ hkʼa gaˬ na yuˬ leh te tuˬ, Gʼuiˬsha hta‸ ka ti‸ shaˉ caˆ te ve yoˬ. Chaw hkʼa peu-eˬ htawˇ, ka ti‸ oˇ hkʼe te ve yoˬ.

4Oˇ ve hkʼaw‸ nawˉ, jawˇmawˇ lehˬ bon yehˬ hkʼaw cawˬ taˍ ve Baˍlaˆ gʼuiˬsha, Aˍsheˍraˆ gʼuiˬsha ma leh meu‸ keu shiˍ teˇ hpaˍ hta‸ oˉ kʼoˍ pui htaˇ yehˇ ve mawˇ hkʼa peu-eˬ hta‸ bon yehˬ hkʼaw yuˬ tawˆ tuˬ, paw hkuˇ lonˉ Hiˇlaˍhkiˆ, awˬ nu ve paw hkuˇ teˇ hpaˍ leh, bon yehˬ hta‸ shaw chehˇ ve ma‸ yaˇ hui hta‸ tawˇ piˇ ve yoˬ. Jawˇmawˇ lehˬ, mawˇ oˇ ve teˇ hpaˍ hta‸ venˇ baˬ lo cawˬ ve Kiˇdronˍ lawˬ hkʼo‸ lo yuˬ kʼai leh, aˬ miˍ tuˉ baˬ piˇ ve yoˬ. Peuˬ hkʼaw‸ nawˉ, cawˬ taˉ ve hkʼaw‸ laˉ teˇ hpaˍ hta‸ Beˍteˍlaˆ venˇ lo yuˬ kʼai ve yoˬ.

5Ponˬ laˬ htaˇ Yeˍruˆsaˍlehnˍ venˇ leh awˬ nu ve Yuˇda‸ venˇ teˇ hpaˍ hkʼaw lo, Yuˇda‸ jawˇmawˇ teˇ hpaˍ leuˆ teh taˍ ve Baˍlaˆ gʼuiˬsha, mvuhˇ nyi, ha pa, leh meu‸ keu shiˍ teˇ hpaˍ ve paw hkuˇ hkʼa peu-eˬ hta‸ jawˇmawˇ Yawˇshiˆ gʼa‸ kʼoˬ piˇ ve yoˬ.

6Bon yehˬ hkʼaw teh taˍ ve Aˍsheˍraˆ gʼuiˬsha ma ve shaˉ ho‸ hta‸ yawˇ Kiˉdronˍ lawˬ hkʼo‸ lo yuˬ kʼai leh aˬ miˍ tuˉ baˬ peuˬ hkʼaw‸ nawˉ, kʼaw‸ teˍ meu-e leh chaw tuˍ kuiˬ lo hkaˆ sheˍ ve yoˬ.

7Bon yehˬ hkʼaw lo, chaw yaˇ teˇ hpaˍ haˉ chawˇ haˉ paˆ te ve chehˇ kuiˬ hta‸ yawˇ te luˬ piˇ ve yoˬ. (Bawehˇ oˇ ve hkʼaw lo, yaˇ miˇ teˇ hpaˍ lehˬ Aˍsheˍraˆ gʼuiˬsha ma hta‸ oˉ kʼoˍ pui htaˇ veu‸ deh tuˬ ve veu‸ kʼaˇ te chiˇ ve yoˬ.)

8Yawˇ lehˬ, awˬ nu ve Yuˇda‸ venˇ teˇ hpaˍ hkʼaw chehˇ taˍ ve paw hkuˇ hkʼa peu-eˬ hta‸ Yeˍruˆsaˍlehnˍ venˇ hkʼaw kuˬ hkʼaw‸ leh, venˇ oˇ ve teˇ hpaˍ hkʼaw cawˬ ve tuˉ tanˇ kuiˬ teˇ hpaˍ hta‸ cha‸ chiˆ kʼai piˇ lawˬ ve yoˬ. Yawˇ lehˬ venˇ taˍ meu‸ hpe‸ la‸ mehˍ paˉ hpawˇ lo Yawˇsuˆ te teh taˍ ve neˇ hta‸ tanˇ kuiˬ hta‸ htawˇ te luˬ piˇ ve yoˬ.

9Yawˇ lehˬ, paw hkuˇ oˇ ve teˇ hpaˍ hta‸ bon yehˬ hkʼaw kanˉ te tuˬ a hkaw-anˬ maˇ piˇ. Ya‸ hkʼaˇ, yawˇ hui lehˬ paw hkuˇ teˇ hpaˍ ve caˇ tuˬ hta‸ caˇ hpeh‸ ve yoˬ.

10Jawˇmawˇ Yawˇshiˆ lehˬ, chaw yaˇ teˇ hpaˍ a shu yawˇ yaˇ Mawˇloˆ gʼuiˬsha hta‸ maˇ gʼa kʼaw‸ tuˉ tanˇ tuˬ, Tawˇhpehˆ venˇ paˇ lo cawˬ ve, Hiˆnonˍ miˬ tawˬ kuiˬ lo te taˍ ve tuˉ tanˇ kuiˬ hta‸ te luˬ piˇ ve yoˬ.

11Yawˇ lehˬ, Yuˇda‸ jawˇmawˇ teˇ hpaˍ mvuhˇ nyi hta‸ oˉ kʼoˍ pui htaˇ yehˇ ve iˉ mvuhˇ leh iˉ mvuhˇ lawˬ teˇ hpaˍ hta‸ htawˇ yuˬ baˬ piˇ ve yoˬ. (Iˉ mvuhˇ leh iˉ mvuhˇ lawˬ chi teˇ hpaˍ hta‸ bon yehˬ paˇ lo cawˬ ve mawˇ ha‸ shaˉ shehˍ hpaˇ Naˍtaˍmeˍlehˆ ve yehˬ paˇ lo teh taˍ ve yoˬ.)

12Aˍhaˆ ve yehˬ hkʼoˆ lo, Yuˇda‸ jawˇmawˇ teˇ hpaˍ te teh taˍ ve tuˉ tanˇ kuiˬ leh, bon yehˬ hkʼaw Maˍnaˍseˍ te keu taˍ ve tuˉ tanˇ kuiˬ nyiˇ maˬ hta‸ jawˇmawˇ Yawˇshiˆ dawˆ paˆ leh Kiˇdronˍ lawˬ hkʼo‸ hkʼaw baˬ keu ve yoˬ.

13Yawˇshiˆ lehˬ, Yeˍruˆsaˍlehnˍ venˇ mvuhˇ nyi tawˆ hpawˇ lo cawˬ ve Shaˍlonˍ hkʼaw awˬ hawˉ hpawˇ lo, jawˇmawˇ lonˉ Sawˉla‸monˍ te teh taˍ ve Siˉdonˍ chaw hui ve Aˍshaˆtaˍrehˆ gʼuiˬsha ma, Mawˇbaˆ chaw hui ve Hkeˍmoˆ gʼuiˬsha, leh Aˍmonˍ chaw hui ve gʼuiˬsha, chi teˇ hpaˍ hta‸ tuˉ tanˇ kuiˬ teˇ hpaˍ hta‸ htawˇ cha‸ chiˆ kʼai piˇ lawˬ ve yoˬ.

14Jawˇmawˇ Yawˇshiˆ lehˬ, da‸ kehˬ ve haˉ pui hkuiˉ daw teˇ hpaˍ, leh Aˍsheˍraˆ gʼuiˬsha ma ve shaˉ ho‸ teˇ hpaˍ hta‸ dawˆ paˆ leh, chehˇ kuiˬ oˇ ve hkʼaw lo chaw mu‸ ku teˇ hpaˍ gʼawˆ hpoˆ piˇ ve yoˬ.

15Yawˇshiˆ lehˬ, Iˉsaˍreˍlaˆ chaw hui hta‸ ya‸ kʼaw sheh ya‸ piˇ shehˍ hpaˇ Neˍbaˆ ve yaˇ Yeˍyawˇbaoˍ, Beˍteˍlaˆ venˇ hkʼaw te teh taˍ ve oˉ kʼoˍ pui kuiˬ hta‸ te luˬ piˇ ve yoˬ. Yawˇ lehˬ, tuˉ tanˇ kuiˬ teˇ hpaˍ hta‸ dawˆ paˆ leh, Aˍsheˍraˆ gʼuiˬsha ma ve shaˉ ho‸ hta‸ aˬ miˍ tuˉ baˬ piˇ ve yoˬ.

16Oˇ ve hkʼaw‸ nawˉ, Yawˇshiˆ chiˇ nyi leh hkʼaw hkʼoˆ lo tuˍ hpfuh teˇ hpaˍ hta‸ yawˇ gʼa mawˬ ve yoˬ. Tuˍ hpfuh oˇ ve teˇ hpaˍ hkʼaw ve awˬ mu‸ ku hta‸ yawˇ yuˬ tawˆ leh, tuˉ tanˇ kuiˬ oˇ ve teˇ hpaˍ hkʼoˆ lo tuˉ baˬ piˇ ve yoˬ. Chi hkʼe te ve lehˬ, Yeˍyawˇbaoˍ te taˍ ve tuˉ tanˇ kuiˬ teˇ hpaˍ hkʼaˬ hkʼe hpeh‸ kʼai tuˬ ve awˬ lawn, aˬ sho-eˬ tcuh kaˍ paˍ teˇ hpaˍ kʼoˆ taˍ ve tawˇ biˇ la piˇ tuˬ awˬ pon hpeh‸ ve yoˬ. Jawˇmawˇ Yawˇshiˆ kʼaw‸ chiˇ nyi leh, tawˇ oˇ ve teˇ hpaˍ hta‸ yaw taˉ ve tcuh kaˍ paˍ teˇ gʼaˇ ve tuˍ hpfuh hta‸ yawˇ gʼa mawˬ ve yoˬ.

17Hkʼe te leh yawˇ lehˬ, Tuˍ hpfuh oˇ ve a shu ve tuˍ hpfuh le, teh‸ na nyi ve yoˬ. Tuˍ hpfuh oˇ ve lehˬ, chi beu‸ nawˬ te luˬ piˇ taˍ ve tuˉ tanˇ kuiˬ chi hkʼaˬ hkʼe hpeh‸ la tuˬ ve awˬ lawn kʼoˆ taˉ ve tcuh kaˍ paˍ teˇ gʼaˇ ve tuˍ hpfuh hpeh‸ ve yo, teh‸ Beˍtaˍlaˆ venˇ yaˇ teˇ hpaˍ yawˇ hta‸ kʼaw‸ yaw hkʼaw‸ piˇ ve yoˬ.

18Oˇ htaˇ Yawˇshiˆ lehˬ, Hkʼe kʼo, yawˇ ve tuˍ hpfuh hta‸ taˇ htawˇ. Yawˇ ve awˬ mu‸ kuˬ hta‸ taˇ yuˬ tawˆ, teh‸ yawˇ hui hta‸ kʼoˆ piˇ ve yoˬ. Hkʼe te leh, yawˇ hui lehˬ, yawˇ ve awˬ mu‸ ku hta‸ maˇ kʼoˆ, Saˍmaˍriˆ venˇ lo laˬ ve tcuh kaˍ paˍ teˇ hpaˍ ve awˬ mu‸ ku hta‸ maˇ kʼoˆ, maˇ yuˬ tawˆ piˇ.

19Jawˇmawˇ Yawˇshiˆ lehˬ, Iˉsaˍreˍlaˆ venˇ teˇ maˬ le le lo kʼai leh, Iˉsaˍreˍlaˆ jawˇmawˇ teˇ hpaˍ te teh taˉ ve awˬ nu ve gʼuiˬsha teˇ hpaˍ ve bon yehˬ hta‸ te luˬ piˇ ve yoˬ. Beˍteˍlaˆ venˇ hkʼaw cawˬ ve tuˉ tanˇ kuiˬ teˇ hpaˍ hta‸ te piˇ ve hkʼe, tuˉ tanˇ kuiˬ oˇ ve hkʼa peu-eˬ hta‸ oˇ hkʼe te piˇ ve yoˬ.

20Awˬ nu gʼuiˬsha ve paw hkuˇ teˇ hpaˍ hta‸, yawˇ tuˉ tanˇ kuiˬ hkʼoˆ lo tuˉ baˬ piˇ leh, tuˉ tanˇ kuiˬ teˇ hpaˍ hkʼoˆ lo chaw mu‸ ku gʼawˆ hpoˆ leh tuˉ baˬ piˇ ve yoˬ. Oˇ hkʼe te taˉ peuˬ hkʼaw‸ nawˉ, yawˇ Yeˍruˆsaˍlehnˍ venˇ lo kʼo‸-e ve yoˬ.

21Jawˇmawˇ Yawˇshiˆ lehˬ, Gʼuiˬsha hta‸ taˍ uiˍ taˍ mvuh piˇ tuˬ, awˬliˇtawˇhkawˇ li‸ daw hkʼaw bvuh‸ taˍ ve hkʼe, yawˇ ve chaw teˇ hpaˍ hta‸ Paˍsaˍhkaˍ pawehˇ te tcuh ve yoˬ.

22Suhˉ jehˬ shehˍ hpaˇ teˇ hpaˍ uˉ peunˍ ve awˬ co-e htaˇ maˇ heˆ kʼo, Iˉsaˍreˍlaˆ leh Yuˇda‸ jawˇmawˇ teˇ gʼaˇ ka‸ Paˍsaˍhkaˍ pawehˇ hta‸ maˇ te.

23Yawˇshiˆ uˉ peunˍ chehˇ ve 18 hkʼaw‸ teˇ hkʼaw‸ htaˇ, yawˇ hui Yeˍruˆsaˍlehnˍ venˇ hkʼaw Paˍsaˍhkaˍ pawehˇ te ve yoˬ.

24Paw hkuˇ lonˉ Hiˇlaˍhkiˆ bon yehˬ hkʼaw ca hpfuhˆ mawˬ ve li‸ daw oˇ ve hkʼaw bvuh‸ taˍ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ tuˬ, jawˇmawˇ Yawˇshiˆ lehˬ Yeˍruˆsaˍlehnˍ venˇ leh Yuˇda‸ mvuhˇmiˬ hkʼaw hkʼa cawˬ taˍ ve mawˉ paˍ sheˍ paˍ teˇ hpaˍ, gʼuiˬsha teˇ hpaˍ leh shaˉ ho‸ teˇ hpaˍ hta‸ yuˬ baˬ ve yoˬ.

25Jawˇmawˇ Yawˇshiˆ hkʼa shuˍ, nyi ma hkʼa peu-eˬ, cuˇ yiˍ maˍ yiˍ hkʼa peu-eˬ, awˬ gʼaˇ awˬ shaˉ hkʼa peu-eˬ, Gʼuiˬsha hta‸ ha‸ leh, Moˉseˍ piˇ taˍ ve awˬliˇtawˇhkawˇ teˇ hpaˍ hta‸ hkʼa deh‸ na yuˬ leh te ve jawˇmawˇ teˇ gʼaˇ kaˬ maˇ cawˬ jaw sheˍ. Yawˇ hkʼaw‸ nawˉ teˇ gʼaˇ ka‸ maˇ cawˬ.

26Ya‸ hkʼaˇ, jawˇmawˇ Maˍnaˍseˍ te ve kanˉ teˇ hpaˍ hta‸ pa taw, Gʼuiˬsha Yuˇda‸ chaw hui hta‸ nyi ma zuhˆ ve chi beu‸ hkʼa gaˬ maˇ mehˉ sheˍ.

27Gʼuiˬsha kʼoˆ ve, Iˉsaˍreˍlaˆ chaw hui hta‸ te piˇ ve hkʼe, Yuˇda‸ chaw hui hta‸ htawˇ ngaˬ oˇ hkʼe te piˇ tuˬ yoˬ. Yuˇda‸ chaw hui hta‸ ngaˬ gʼa‸ kʼoˬ piˇ leh, ngaˬ hta‸ oˉ kʼoˍ pui kuiˬ ngaˬ leuˆ yuˬ taˍ ve Yeˍruˆsaˍlehnˍ venˇ hta‸ htawˇ, ngaˬ chiˇ baˬ piˇ tuˬ yoˬ, teh‸ Gʼuiˬsha kʼoˆ ve yoˬ.

28Jawˇmawˇ Yawˇshiˆ hkʼa te ve kanˉ hkʼa peu-eˬ, Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

29Yawˇshiˆ jawˇmawˇ te chehˇ htaˇ, Eˇjiˇtu‸ jawˇmawˇ Neˍhkawˇ lehˬ,Uˇhpaˍraˆ iˉ kaˆ lawˬ hta‸ hkanˍ leh, Aˍsuˇriˆ jawˇmawˇ hta‸ ca ga piˇ tuˬ tawˆ la ve yoˬ. Hkʼe te leh, jawˇmawˇ Yawˇshiˆ Eˇjiˇtu‸ chaw hui hta‸ Mehˆgiˇdoˍ venˇ paˇ lo bawˆ da‸ leh, yawˇ oˇ kaˬ lo suh-e ve yoˬ.

30Yawˇ ve ma‸ poˍ lonˉ teˇ hpaˍ yawˇ ve awˬ to hta‸ Yeˍruˆsaˍlehnˍ venˇ lo yuˬ kʼaw‸ la leh, oˇ kaˬ lo tuˍ piˇ ve yoˬ. Oˇ ve hkʼaw‸ nawˉ, Yuˇda‸ chaw teˇ hpaˍ Yawˇshiˆ ve yaˇ Yawˇhkaˆ hta‸ yawˇ awˬ pa awˬ tan jawˇmawˇ te tcuh ve yoˬ.

31Yawˇhkaˆ lehˬ, Yuˇda‸ mvuhˇmiˬ hta‸ tanˬ uˉ peunˍ htaˇ, yawˇ ve a sha‸ 23 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ ha pa shehˆ maˬ ceh gʼa uˉ peunˍ taˉ ve yoˬ. Yawˇ ve awˬ e lehˬ, Liˆbaˍnaˍ venˇ yaˇ, Yeˍraˍmiˆ ve yaˇ miˇ Haˍmuˇtaˍlaˆ hpeh‸ ve yoˬ.

32Yawˇ ve awˬ puˍ lonˉ teˇ hpaˍ hkʼa shuˍ, yawˇ lehˬ Gʼuiˬsha hta‸ te ya‸ jaˇ ve yoˬ.

33Yawˇ Haˍmaˆ mvuhˇmiˬ hkʼaw cawˬ ve Riˆbaˍlaˆ venˇ hkʼaw chehˇ taˍ htaˇ, Eˇjiˇtu‸ jawˇmawˇ Neˍhkawˇ laˬ leh yawˇ hta‸ hpeh kʼai ve yoˬ. Yuˇda‸ chaw hui lehˬ, Eˇjiˇtu‸ jawˇmawˇ hta‸ hpu shehˆ hinˉ awˇ ha cawehˬ leh shi shehˆ chi awˇ cawehˬ awˬ hkawnˍ gʼa keu piˇ ve yoˬ.

34Jawˇmawˇ Neˍhkawˇ lehˬ, Yawˇshiˆ ve yaˇ Eˇlaˍkenˍ hta‸ Yuˇda‸ jawˇmawˇ te tcuh taˉ leh, awˬ meh awˬ suhˉ Yawˇyaˍkenˍ teh‸ kʼaw‸ meh piˇ taˉ ve yoˬ. Jawˇmawˇ Neˍhkawˇ leh, Yawˇhkaˆ hta‸ Eˇjiˇtu‸ mvuhˇmiˬ lo shiˍ kʼai leh, yawˇ oˇ kaˬ lo suh-e ve yoˬ.

35Jawˇmawˇ Yawˇyaˍkenˍ lehˬ, Eˇjiˇtu‸ jawˇmawˇ hta‸ awˬ hkawnˍ keu piˇ tuˬ, yawˇ ve mvuhˇmiˬ yaˇ teˇ hpaˍ geh keunˍ da‸ ve hkʼe awˬ hkawnˍ shaw yuˬ ve yoˬ.

36Yawˇyaˍkenˍ jawˇmawˇ hpeh‸ la htaˇ, yawˇ ve a sha‸ 25 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 11 hkʼaw‸ uˉ peunˍ ve yoˬ. Yawˇ ve awˬ e lehˬ, Ruˇmaˍ venˇ yaˇ Peˍdaˍyaˆ ve yaˇ miˇ Zeˍbuˇdaˆ hpeh‸ ve yoˬ.

37Yawˇ ve awˬ puˍ lonˉ teˇ hpaˍ hkʼa shuˍ, Yawˇyaˍkenˍ htawˇ Gʼuiˬsha hta‸ te ya‸ jaˇ ve yoˬ.

← Chapter 22 Jump to: Chapter 24 →