2 Kings 7

Lahu Bible Edited © Thailand Bible Society and Bible Society of Myanmar, 2010, 2020.

← Chapter 6 Jump to: Chapter 8 →

1Eˇliˇshehˇ kʼaw‸ yaw hkʼaw‸ leh kʼoˆ piˇ ve, Gʼuiˬsha kʼoˆ ve tawˇ hta‸ na sheˍ. Shawˉ pawˍ chi teˇ yanˇ gaˬ kʼo, cho‸ shiˍ teˇ panˇ teˇ hteh‸, caˬ hkʼa nyiˇ panˇ teˇ hteh‸ nawˬ gʼa hawˇ tuˬ yoˬ, teh‸ jawˇmawˇ hta‸ kʼoˆ piˇ ve yoˬ.

2Oˇ htaˇ jawˇmawˇ ve a sha‸ shaw paˍ lehˬ, Oˇ hkʼe ca hpeh‸ la gʼa tuˬ ve maˇ heˆ. Gʼuiˬsha chi beu‸ la‸ haˉ mvuhˇ yeˬ laˬ piˇ lawˬ ve ka‸, oˇ hkʼe ca hpeh‸ la gʼa tuˬ maˇ heˆ, teh‸ Eˇliˇshehˇ hta‸ kʼoˆ piˇ ve yoˬ. Oˇ hkʼe hpeh‸ la ve hta‸ nawˬ gʼa mawˬ tuˬ yoˬ. Ya‸ hkʼaˇ, caˇ tuˬ oˇ ve teˇ hpaˍ hta‸ nawˬ gʼa caˇ taˉ tuˬ ve maˇ heˆ, teh‸ yawˇ hta‸ kʼaw‸ kʼoˆ piˇ ve yoˬ.

3Hkiˬ tu‸ paˍ 4 gʼaˇ lehˬ, Saˍmaˍriˆ venˇ taˍ meu‸ hpe‸ baˬ lo mui taˍ leh, Aˬ hto‸ ma pa taw suh htaˇ hkʼa gaˬ, ngaˬ hui chi hkʼe gʼa te jo mui chehˇ tuˬ ve le.

4Venˇ hkʼaw lo‸-e ve lehˬ, ngaˬ hui awˬ pon te‸ chiˉ awˬ bon maˇ cawˬ. Ngaˬ hui gʼa suh ve tiˉ yoˬ. Choˬ kaˬ lo ceh jo mui taˍ ve ka‸ ngaˬ hui gʼa suh tuˬ ve yoˬ. Hkeu‸, ngaˬ hui Suˇriˆ chaw hui deh chehˇ taˍ kuiˬ lo kʼai-a veuˬ. Yawˇ hui tiˇ pehˍ laˇ ka‸ yaˬ piˇ-oˆ. Ya‸ hkʼaˇ, yawˇ hui ngaˬ hui ve a sha‸ hta‸ ponˬ laˇ naˍ maˇ shiˍ, teh‸ teˇ gʼaˇ leh teˇ gʼaˇ kʼoˆ da‸ ve yoˬ.

5Hkʼe te leh, mvuhˇ hpeu‸ la paˇ neˇ htaˇ yawˇ hui Suˇriˆ chaw deh chehˇ taˍ kuiˬ lo kʼai ve yoˬ. Yawˇ hui oˇ kaˬ lo gaˬ htaˇ, chaw teˇ gʼaˇ hta‸ ka‸ maˇ gʼa mawˬ.

6Gʼuiˬsha lehˬ, yawˇ hui hta‸ ma‸ moˍ lonˉ leh iˉ mvuhˇ lawˬ awˬ moˍ lonˉ laˬ chehˇ ve awˬ hkawˇ kaˇ piˇ lawˬ ve yoˬ. Hkʼe te leh, yawˇ hui lehˬ Iˉsaˍreˍlaˆ chaw hui hta‸ ca ga la tuˬ Hiˇtiˆ chaw leh Eˇjiˇtu‸ chaw hui laˬ chehˇ ve hehˉ teh‸ dawˇ ve yoˬ.

7Hkʼe te leh, oˇ ve teˇ haˉ Suˇriˆ chaw teˇ hpaˍ lehˬ a shu yawˇ ve a sha‸ gʼa ponˬ tuˬ, mawˇ jeˬ hkʼa peu-eˬ hta‸ baˬ taˉ leh gʼuiˇ hpaw-e ve yoˬ.

8Hkiˬ tu‸ paˍ oˇ ve 4 gʼaˇ Suˇriˆ chaw hui ve fa la paˇ lo gaˬ la ve teˇ yanˇ, yawˇ hui fa la hkʼaw lo‸-e leh, hkʼa bvuhˆ caˇ ve yoˬ. Oˇ kaˬ lo hkʼa mawˬ ve hpu, shi, leh veu‸ kaˇ teˇ hpaˍ hta‸ yawˇ hui ca gʼawˆ faˉ ve yoˬ. Yawˇ hui fa la teˇ maˬ peuˬ teˇ maˬ hkʼaw lo‸-e leh oˇ hkʼe te ve yoˬ.

9Oˇ ve hkʼaw‸ nawˉ, yawˇ hui teˇ gʼaˇ hta‸ teˇ gʼaˇ nyi da‸ taˍ leh, Ngaˬ hui chi hkʼe te chehˇ maˇ cawˇ. Ngaˬ hui lehˬ da‸ ve awˬ lawn sha tanˇ gʼa taˍ ve yoˬ. Ngaˬ hui ceh tiˉ shiˍ ve lehˬ maˇ cawˇ. Awˬ lawn chi hta‸ ca kʼoˆ piˇ tuˬ, shawˉ pawˍ mvuhˇ htiˇ la ve hta‸ law chehˇ ve kʼo, ngaˬ hui lehˬ awˬ tehˬ awˬ na ciˍ yanˍ ve hta‸ gʼa hkanˍ tuˬ yoˬ. Hkeu‸, ngaˬ hui venˇ hkʼaw kʼo‸-e leh, jawˇmawˇ ve a ma‸ lonˉ teˇ hpaˍ hta‸ ca kʼaw‸ hto piˇ-a veuˬ, teh‸ teˇ gʼaˇ leh teˇ gʼaˇ kʼoˆ da‸ ve yoˬ.

10Hkʼe te leh, yawˇ hui venˇ hkʼaw lo gʼuiˇ kʼo‸-e leh, Ngaˬ hui Suˇriˆ chaw hui deh chehˇ taˍ kuiˬ lo gaˬ taˉ peuˬ. Chaw teˇ gʼaˇ hta‸ ka‸ maˇ gʼa mawˬ. Iˉ mvuhˇ leh piˉ laˬ teˇ hpaˍ hta‸ ka‸ hkʼe leˇ baˬ taˍ ve yoˬ, teh‸ venˇ shaw shehˍ hpaˇ hui hta‸ kuˬ piˇ ve yoˬ.

11Venˇ shaw shehˍ hpaˇ teˇ hpaˍ lehˬ, awˬ lawn oˇ ve hta‸ hawˉ yehˬ lo ca gʼuiˇ hto piˇ ve yoˬ.

12Awˬ yanˇ oˇ ve lehˬ, tanˇ hkuinˇ htaˇ hpeh‸ ve yoˬ. Ya‸ hkʼaˇ, jawˇmawˇ zuh‸ hpui hkʼaw tu la leh, Suˇriˆ chaw hui hkʼaˬ hkʼe cuˇ yiˍ te chehˇ ve ngaˬ nawˬ hui hta‸ kʼoˆ laˇ shaˍ. Choˬ kaˬ lo meu‸ jaˇ kaˆ jaˇ chehˇ ve hta‸ yawˇ hui shiˍ taˍ ve yoˬ. Hkʼe te leh, yawˇ hui fa la teˇ hpaˍ hta‸ baˬ taˉ leh, ca va‸ taˍ ve yoˬ. Ngaˬ hui caˇ tuˬ dawˬ tuˬ ca hpfuhˆ yuˬ la ve teˇ yanˇ, yawˇ hui ngaˬ hui hta‸ awˬ te‸ te‸ hpeh yuˬ leh, venˇ hta‸ te luˬ piˇ tuˬ cuˇ yiˍ te taˍ ve yoˬ, teh‸ yawˇ ve ma‸ poˍ teˇ hpaˍ hta‸ kʼoˆ piˇ ve yoˬ.

13Oˇ htaˇ yawˇ ve ma‸ poˍ lonˉ teˇ gʼaˇ kʼoˆ ve, Venˇ yaˇ teˇ hpaˍ gʼa hkanˍ jaˇ chehˇ ve yoˬ. Chi hta‸ pa taw, ma‸ yaˇ teˇ hpaˍ hpaˍ hta‸ leuˆ yuˬ leh, cawˬ taˍ sheˍ ve iˉ mvuhˇ 5 hkeh piˇ leh, ca nyi tcuh-a veuˬ, teh‸ kʼoˆ ve yoˬ.

14Hkʼe te leh, yawˇ hui ma‸ yaˇ teˇ hpaˍ hta‸ leuˆ yuˬ leh, Suˇriˆ chaw hui hkʼaˬ hkʼe hpeh‸ kʼai ve awˬ lawn ca nyi tcuh ve yoˬ. Jawˇmawˇ lehˬ, iˉ mvuhˇ lawˬ nyiˇ maˬ hta‸ ka‸ yuˬ kʼai tcuh ve yoˬ.

15Ma‸ yaˇ oˇ ve teˇ hpaˍ lehˬ, Yawˇdanˍ iˉ kaˆ lawˬ lo hkʼa gaˬ ca gʼa‸ nyi kʼai ve yoˬ. Ya‸ kʼaw kʼaˉ lo canˇ paˍ hui baˬ taˉ ve veu‸ kʼaˇ teˇ hpaˍ leh mawˇ teˇ hpaˍ hta‸ yawˇ hui gʼa mawˬ ve yoˬ. Oˇ ve hkʼaw‸ nawˉ, yawˇ hui venˇ hkʼaw lo kʼaw‸ la leh, yawˇ hui gʼa mawˬ taˉ ve awˬ lawn jawˇmawˇ hta‸ kʼoˆ piˇ ve yoˬ.

16Saˍmaˍriˆ venˇ yaˇ teˇ hpaˍ Suˇriˆ chaw hui ve fa la lo gʼuiˇ kʼai leh, mawˇ jeˬ teˇ hpaˍ hta‸ gʼawˆ yuˬ ve yoˬ. Gʼuiˬsha kʼoˆ taˍ peuˬ ve hkʼe, cho‸ shiˍ teˇ panˇ teˇ hteh‸, caˬ hkʼa nyiˇ panˇ teˇ hteh‸ te hawˇ piˇ ve yoˬ.

17Jawˇmawˇ lehˬ, yawˇ ve a sha‸ shaw shehˍ hpaˇ hta‸, venˇ taˍ meu‸ hpe‸ lo shaw taˍ tuˬ tawˇ piˇ ve yoˬ. Venˇ taˍ meu‸ hpe‸ hkʼaw chaw tawˆ tawˆ lo‸ lo‸ ve maˇ jaˇ ve pa taw, yawˇ hta‸ shu gʼa ga naˆ heuˆ leh naˆ pehˍ sheˍ ve yoˬ. Hkʼe te leh, jawˇmawˇ awˬ to Eˇliˇshehˇ hta‸ ca hpuˇ da‸ la htaˇ, Gʼuiˬsha kʼoˆ taˍ peuˬ ve hkʼe, yawˇ lehˬ awˬ shiˍ awˬ nu oˇ ve teˇ hpaˍ hta‸ maˇ gʼa caˇ taˉ leh gʼa suh-e ve yoˬ.

18Shawˉ pawˍ chi teˇ yanˇ gaˬ kʼo, cho‸ shiˍ teˇ panˇ teˇ hteh‸, caˬ hkʼa 2 panˇ teˇ hteh‸ nawˬ gʼa te hawˇ piˇ tuˬ yoˬ, teh‸ Eˇliˇshehˇ jawˇmawˇ hta‸ kʼoˆ piˇ htaˇ,

19a sha‸ shaw shehˍ hpaˇ oˇ ve lehˬ, Oˇ hkʼe ca hpeh‸ la gʼa tuˬ ve maˇ heˆ. Gʼuiˬsha chi beu‸ la‸ haˉ mvuhˇ yeˬ laˬ piˇ lawˬ ve ka‸ oˇ hkʼe ca hpeh‸ la gʼa tuˬ ve maˇ heˆ, teh‸ yawˇ Eˇliˇshehˇ hta‸ kʼoˆ piˇ ve yoˬ. Oˇ htaˇ Eˇliˇshehˇ lehˬ, Oˇ hkʼe hpeh‸ la ve hta‸ nawˬ gʼa mawˬ tuˬ yoˬ. Ya‸ hkʼaˇ, caˇ tuˬ oˇ ve teˇ hpaˍ hta‸ nawˬ gʼa caˇ taˉ tuˬ ve maˇ heˆ, teh‸ yawˇ hta‸ kʼoˆ piˇ taˍ peuˬ ve yoˬ.

20Hkʼe te leh, kʼoˆ taˍ ve hkʼe hpeh‸ la ve yoˬ. Yawˇ lehˬ, venˇ taˍ meu‸ hpe‸ lo shu naˆ pehˍ ve hta‸ gʼa hkanˍ ve yoˬ.

← Chapter 6 Jump to: Chapter 8 →