2 Kings 20

Lahu Bible Edited © Thailand Bible Society and Bible Society of Myanmar, 2010, 2020.

← Chapter 19 Jump to: Chapter 21 →

1Awˬ yanˇ oˇ ve hkʼaw, jawˇmawˇ Heˍsaˍkiˆ naˬ jaˇ leh suh la paˇ neˇ ve yoˬ. Aˍmoˆ ve yaˇ paˍ Iˉsaˍyaˆ yawˇ geh laˬ leh, Gʼuiˬsha kʼoˆ ve, teˇ ceuˬ le le ve hta‸ awˬ hkʼaˇ hkʼa deh‸ gu teh taˍ-o‸. Awˬ lawn kʼo, nawˬ na-e la tuˬ ve maˇ heˆ. Suh tuˬ ve hkʼa deh‸ gu taˍ-o‸, teh‸ yawˇ hta‸ kʼoˆ piˇ ve yoˬ.

2Oˇ htaˇ, Heˍsaˍkiˆ gʼo‸ pa hpawˇ lo hpfuhˆ leh bon lawˬ ve yoˬ.

3Gʼuiˬsha-oˬ, ngaˬ lehˬ ka ti‸ yeˬ ve hkʼaw nawˬ ve kanˉ hta‸ te leh, nawˬ te tcuh laˇ gaˇ ve kanˉ teˇ hpaˍ hta‸ hkʼa deh‸ te taˍ peuˬ ve hta‸ a ciˉ dawˇ nawˇ laˇ-oˆ, teh‸ kʼoˆ leh bon lawˬ ve yoˬ. Oˇ hkʼe kʼoˆ peuˬ hkʼaw‸ nawˉ, yawˇ gʼaˇ hte‸ kuˬ hawˬ ve yoˬ.

4Oˇ ve hkʼaw‸ nawˉ, Iˉsaˍyaˆ jawˇmawˇ geh tawˆ kʼai ve yoˬ. Yawˇ hawˉ yehˬ hkʼaw tawˆ kʼai chehˇ htaˇ, Gʼuiˬsha yawˇ hta‸ chi hkʼe kʼoˆ piˇ ve yoˬ.

5Ngaˬ ve chaw teˇ hpaˍ hta‸ uˉ peunˍ chehˇ ve Heˍsaˍkiˆ geh kʼaw‸ kʼo‸-e leh, yawˇ hta‸ chi hkʼe ca kʼoˆ piˇ-oˆ. Ngaˬ, nawˬ puˍ lonˉ Daˍviˆ ve Gʼuiˬsha lehˬ, nawˬ ve bon lawˬ hkawˇ hta‸ gʼa kaˇ peuˬ leh, nawˬ ve mehˆ gʼuiˬ hta‸ gʼa mawˬ peuˬ. Ngaˬ nawˬ hta‸ gu na-e laˇ leh, shehˆ nyi hkʼaw‸ nawˉ kʼo nawˬ bon yehˬ lo kʼai hpeh‸ tuˬ yoˬ.

6Ngaˬ nawˬ hta‸ 15 hkʼaw‸ kʼaw‸ te‸ chehˇ tcuh laˇ tuˬ yoˬ. Nawˬ leh Yeˍruˆsaˍlehnˍ venˇ chi hta‸, Aˍsuˇriˆ jawˇmawˇ ve la‸ sheh hkʼaw lo ngaˬ ponˬ laˇ tuˬ yoˬ. Ngaˬ ve awˬ me‸ awˬ hponˇ tawˆ la tuˬ leh, ngaˬ Daˍviˆ hta‸ te piˇ taˍ ve ka ti‸ hta‸ pa taw, venˇ chi hta‸ ngaˬ ha‸ shaˉ taˍ tuˬ yoˬ, teh‸ Iˉsaˍyaˆ hta‸ kʼoˆ piˇ ve yoˬ.

7Iˉsaˍyaˆ lehˬ, jawˇmawˇ kʼaw‸ chehˇ sha la tuˬ awˬ pon, yawˇ ve shaˉ chuˇ hkʼoˆ lo maˉ nawˆ tcuhˇ yuˬ nehˉ piˇ tuˬ, jawˇmawˇ ve awˬ ceˬ teˇ hpaˍ hta‸ kʼoˆ piˇ ve yoˬ.

8Oˇ htaˇ Heˍsaˍkiˆ lehˬ, Ngaˬ kʼaw‸ chehˇ sha la leh, shehˆ nyi hkʼaw‸ nawˉ ngaˬ bon yehˬ lo kʼai gaˬ tuˬ, aˬ hto‸ ma awˬ heˆ cawˬ le, teh‸ na nyi ve yoˬ.

9Iˉsaˍyaˆ kʼaw‸ yaw hkʼaw‸ leh kʼoˆ ve, Gʼuiˬsha lehˬ yawˇ kʼoˆ taˍ ve hkʼe te tuˬ, nawˬ hta‸ awˬ heˆ teˇ ceuˬ maˍ laˇ tuˬ yoˬ. Chi beu‸ nawˬ mvuhˇ nyi naˍri‸ hta‸ awˬ gʼuˇ suhˍ 10 hkʼeh‸ jiˆ taˆ-e ve hta‸ heuˆ gaˇ laˇ. Maˇ heˆ kʼo, awˬ hkʼaw‸ nawˉ 10 hkeh‸ kʼaw‸ jiˆ kʼo‸-e ve hta‸ heuˆ gaˇ laˇ, teh‸ yawˇ hta‸ kʼoˆ piˇ ve yoˬ.

10Oˇ htaˇ Heˍsaˍkiˆ lehˬ, Mvuhˇ nyi naˍri‸ awˬ gʼuˇ suhˍ hpawˇ 10 hkʼeh‸ jiˆ taˆ-e piˇ tuˬ te sha ve yoˬ. Awˬ hkʼaw‸ nawˉ hpawˇ 10 hkʼeh‸ kʼaw‸ jiˆ kʼo‸-e piˇ lawˬ-o‸, teh‸ kʼoˆ ve yoˬ.

11Hkʼe te leh, Iˉsaˍyaˆ bon lawˬ leh, Gʼuiˬsha lehˬ jawˇmawˇ Aˍhkaˆ te taˍ ve mvuhˇ nyi naˍriˍ oˇ ve hta‸ awˬ hkʼaw‸ nawˉ hpawˇ 10 hkʼeh‸ kʼaw‸ jiˆ kʼo‸-e piˇ lawˬ ve yoˬ.

12Awˬ yanˇ oˇ ve hkʼaw, Baˍbuˍlonˍ mvuhˇmiˬ ve jawˇmawˇ Baˍlaˍdanˍ ve yaˇ paˍ Meˍroˆdaˆbaˍlaˍdanˍ lehˬ, jawˇmawˇ Heˍsaˍkiˆ naˬ chehˇ ve awˬ hkawˇ gʼa kaˇ leh, yawˇ hta‸ li‸ teˇ kʼoˆ leh la‸ shawnˍ teˇ hpaˍ feu laˇ piˇ ve yoˬ.

13Heˍsaˍkiˆ lehˬ, awˬ tan te shehˍ hpaˇ oˇ ve teˇ hpaˍ hta‸ hkʼa deh‸ ha‸ yuˬ piˇ leh, yawˇ hui hta‸ yawˇ ve hpu, shi, sha hawnˉ, naˍ manˇ hawnˉ leh yawˇ ve ma‸ hkʼeun hkʼa peu-eˬ maˍ piˇ ve yoˬ. Yawˇ hui hta‸ maˇ maˍ piˇ ve awˬ ceuˬ teˇ ceuˬ ka‸ maˇ cawˬ.

14Oˇ htaˇ tcuh kaˍ paˍIˉsaˍyaˆ jawˇmawˇ Heˍsaˍkiˆ geh laˬ leh, Chaw chi teˇ hpaˍ hkʼaˬ lo laˬ ve le. Yawˇ hui nawˬ hta‸ aˬ hto‸ ma kʼoˆ laˇ le, teh‸ yawˇ hta‸ na nyi ve yoˬ. Yawˇ hui lehˬ vuiˇ jaˇ ve Baˍbuˍlonˍ mvuhˇmiˬ lo laˬ ve yoˬ, teh‸ Heˍsaˍkiˆ yawˇ hta‸ kʼaw‸ yaw hkʼaw‸ piˇ ve yoˬ.

15Yawˇ hui hawˉ yehˬ hkʼaw, aˬ hto‸ ma teˇ hpaˍ gʼa mawˬ taˉ ve le, teh‸ Iˉsaˍyaˆ kʼaw‸ na nyi htaˇ, Teˇ ceuˬ le le ve hta‸ gʼa mawˬ taˉ peuˬ ve yoˬ. Ngaˬ yawˇ hui hta‸ maˇ maˍ piˇ ve awˬ ceuˬ teˇ ceuˬ ka‸ maˇ cawˬ, teh‸ Heˍsaˍkiˆ yawˇ hta‸ kʼaw‸ yaw hkʼaw‸ piˇ ve yoˬ.

16Oˇ htaˇ, Iˉsaˍyaˆ jawˇmawˇ hta‸ kʼoˆ piˇ ve, Gʼuiˬsha kʼoˆ ve tawˇ hta‸ na taˍ sheˍ.

17Nawˬ ve hawˉ yehˬ hkʼaw cawˬ ve, aˬ sho-eˬ nawˬ puˍ lonˉ teˇ hpaˍ hkʼa ca keu taˍ ve mawˇ jeˬ hkʼa peu-eˬ, Baˍbuˍlonˍ mvuhˇmiˬ lo shu yuˬ kʼai tuˬ ve awˬ nyi gaˬ la chehˇ ve yoˬ.

18Nawˬ ve awˬ ceuˬ awˬ hkʼaˇ teˇ hpaˍ hpaˍ lehˬ, shu shiˍ kʼai ve hta‸ gʼa hkanˍ leh, Baˍbuˍlonˍ jawˇmawˇ ve hawˉ yehˬ hkʼaw kanˉ gʼa ca te tuˬ yoˬ, teh‸ yawˇ hta‸ kʼoˆ piˇ ve yoˬ.

19Heˍsaˍkiˆ lehˬ, yawˇ a sha‸ te‸ chehˇ sheˍ ve teˇ co-e yawˇ ve mvuhˇmiˬ hkʼaw gawˬ lehˍ hpeh‸ chehˇ tuˬ ve hta‸ shiˍ ve pa taw, Nawˬ ngaˬ hta‸ kʼoˆ laˇ ve Gʼuiˬsha ve tawˇ chi lehˬ da‸ jaˇ ve yoˬ, teh‸ Iˉsaˍyaˆ hta‸ kʼaw‸ kʼoˆ piˇ ve yoˬ

20Jawˇmawˇ Heˍsaˍkiˆ hkʼa te ve kanˉ hkʼa peu-eˬ, yawˇ iˉ kaˆ gʼuiˬ po duˇ ve, leh venˇ hkʼaw lo yawˇ iˉ kaˆ hkʼaˬ hkʼe te shawˍ keu ve awˬ lawn chi teˇ hpaˍ, Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

21Heˍsaˍkiˆ suh-e leh, yawˇ ve yaˇ paˍ Maˍnaˍseˍ yawˇ awˬ tan jawˇmawˇ kʼaw‸ te ve yoˬ.

← Chapter 19 Jump to: Chapter 21 →