2 Kings 22

Lahu Bible Edited © Thailand Bible Society and Bible Society of Myanmar, 2010, 2020.

← Chapter 21 Jump to: Chapter 23 →

1Yawˇshiˆ Yuˇda‸ mvuhˇmiˬ hta‸ tanˬ uˉ peunˍ htaˇ, yawˇ ve a sha‸ 8 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 31 hkʼaw‸ uˉ peunˍ ve yoˬ. Yawˇ ve awˬ e lehˬ, Bawˇzaˍkaˆ venˇ yaˇ Aˍdaˍyaˆ ve yaˇ miˇ Yeˍdiˇdaˆ hpeh‸ ve yoˬ.

2Yawˇshiˆ lehˬ, Gʼuiˬsha nyi ma cawˇ ve kanˉ hta‸ tiˉ te ve yoˬ. Yawˇ ve awˬ puˍ lonˉ Daˍ viˆ hkʼa shuˍ, Gʼuiˬsha ve awˬliˇtawˇhkawˇ hkʼa peu-eˬ ve hta‸ hkʼa deh‸ na yuˬ ve yoˬ.

3Jawˇmawˇ Yawˇshiˆ Yuˇda‸ mvuhˇmiˬ hta‸ uˉpeunˍ chehˇ ve 18 hkʼaw‸ teˇ hkʼaw‸ htaˇ, yawˇ lehˬ hawˉ yehˬ hkʼaw ve ceˇ leˇ lonˉ, Meˍshuˆlanˍ ve awˬ hawehˍ, Aˍzaˍliˆ ve yaˇ Shaˍhpanˍ hta‸ chi hkʼe kʼoˆ piˇ ve yoˬ.

4Bon yehˬ lo paw hkuˇ lonˉ Hiˇlaˍhkiˆ geh kʼai leh, bon ca lawˬ la ve chaw hui geh hpu tanˇ hkʼaˬ ma shaw gʼa taˍ peuˬ naˍ, ca na nyi-o.

5Shaw gʼa taˍ ve hpu oˇ ve hta‸ yuˬ leh bon yehˬ ha‸ shaˉ shehˍ hpaˇ hta‸ piˇ-oˆ.

6Yawˇ teˇ caˉ bon yehˬ hkʼaw kanˉ te chehˇ ve la‸shaˉmaˉ, haˉ pui htawˆ paˍ hui hta‸ gʼaˇ hpfuhˇ gʼa piˇ leh, loˍ ve suhˆ leh haˉ pui shiˍ teˇ hpaˍ gʼa vuiˬ keu piˇ ve yoˬ.

7Kanˉ nyi paˍ awˬ hoˉ oˇ ve teˇ hpaˍ lehˬ, hteˇ jaˇ leh yawˇ hui te taˍ peuˬ ve kanˉ teˇ hpaˍ hta‸ kʼaw‸ gʼa‸ chaˬ nyi tuˬ maˇ loˍ, teh‸ ceˇ leˇ lonˉ hta‸ kʼoˆ piˇ ve yoˬ.

8Sheˍhpanˍ lehˬ, jawˇmawˇ kʼoˆ ve tawˇ oˇ ve teˇ hpaˍ Hiˇlaˍhkiˆ hta‸ kʼoˆ piˇ ve yoˬ. Oˇ htaˇ, Hiˇlaˍhkiˆ lehˬ bon yehˬ hkʼaw lo awˬliˇtawˇhkawˇ li‸ daw hta‸ gʼa mawˬ ve awˬ lawn, Sheˍhpanˍ hta‸ kʼoˆ piˇ ve yoˬ. Hkʼe te leh, Hiˇlaˍhkiˆ lehˬ li‸ daw oˇ ve Sheˍ hpanˍ hta‸ piˇ leh, yawˇ gʼaw nyi ve yoˬ.

9Oˇ ve hkʼaw‸ nawˉ, yawˇ jawˇmawˇ geh kʼaw‸ kʼo‸-e leh, Jawˇmawˇ-oˬ, nawˬ ve awˬ ceˬ teˇ hpaˍ bon yehˬ hkʼaw cawˬ ve hpu hta‸ yuˬ leh, bon yehˬ ha‸ shaˉ shehˍ hpaˇ hta‸ piˇ taˉ peuˬ.

10Choˬ kaˬ ngaˬ geh lo Hiˇlaˍhkiˆ pe‸ laˇ ve li‸ daw teˇ maˬ cawˬ ve yoˬ, teh‸ jawˇmawˇ hta‸ kʼoˆ piˇ leh, li‸ oˇ ve yawˇ hta‸ gʼaw maˍ piˇ ve yoˬ.

11Li‸ oˇ ve hkʼaw bvuh‸ taˍ ve awˬ lawn teˇ hpaˍ hta‸ jawˇmawˇ gʼa kaˇ htaˇ, dawˇ haˍ jaˇ ve hkʼaw, yawˇ ve veu‸ kʼaˇ hta‸ tzuh‸ suhˍ ve yoˬ.

12Peuˬ hkʼaw‸ nawˉ, yawˇ paw hkuˇ lonˉ Hiˇlaˍhkiˆ, Sheˍhpanˍ ve yaˇ Aˍhiˆkanˍ, Miˆ hkaˍ ve yaˇ Aˍhkaˍbawˇ, shaˉ nanˉ hkʼaw ve ceˇ leˇ lonˉ Sheˍhpanˍ leh yawˇ ve a ma‸ lonˉ Aˍsaˍyaˆ hui hta‸ kuˬ yuˬ leh, yawˇ hui hta‸ chi hkʼe kʼoˆ piˇ ve yoˬ.

13Ngaˬ awˬ to leh Yuˇda‸ chaw hkʼa peu-eˬ awˬ tan, nawˬ hui Gʼuiˬsha hta‸ ca na nyi-o. Ngaˬ hui ve awˬ puˍ awˬ pi teˇ hpaˍ lehˬ, li‸ daw chi ve hkʼaw bvuh‸ taˍ ve hkʼe maˇ te ve pa taw, Gʼuiˬsha ngaˬ hui hta‸ nyi ma zuhˆ chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

14Hkʼe te leh, Hiˇlaˍhkiˆ, Aˍhkaˍbawˇ, Sheˍhpanˍ leh Aˍsaˍyaˆ yawˇ hui teˇ hpaˍ, Yeˍruˆsaˍlehnˍ venˇ hkʼaw chehˇ ve tcuh kaˍ ma Huˇlaˍdaˆ geh kʼai ve yoˬ. (Yawˇ ve awˬ hpawˇ lehˬ, Haˍraˍhaˆ ve awˬ hawehˍ, Tiˉkaˍvaˍ ve yaˇ Shaˍlunˍ hpeh‸ leh, yawˇ lehˬ bon yehˬ hkʼaw lo teh taˍ ve veu‸ kʼaˇ teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ)

15Hpeh‸ la peuˬ ve awˬ ceuˬ hkʼa peu-eˬ, yawˇ hui tcuh kaˍ ma oˇ ve hta‸ hto piˇ ve yoˬ.

16Hkʼe te leh, yaˇ miˇ oˇ ve lehˬ Gʼuiˬsha ve tawˇ chi teˇ hpaˍ jawˇmawˇ hta‸ ca kʼaw‸ kʼoˆ piˇ tcuh ve yoˬ. Li‸ daw chi ve hkʼaw jawˇmawˇ gʼa gʼaw taˍ peuˬ ve hkʼe, ngaˬ lehˬ Yeˍruˆsaˍlehnˍ venˇ leh venˇ yaˇ hkʼa peu-eˬ ve hta‸ ciˍ yanˍ piˇ tuˬ yoˬ.

17Awˬ lawn kʼo, yawˇ hui ngaˬ hta‸ chiˇ baˬ peuˬ leh, awˬ nu ve gʼuiˬsha teˇ hpaˍ hta‸ tuˉ tanˇ piˇ chehˇ ve yoˬ. Chi hkʼe te ve lehˬ, yawˇ hui ngaˬ hta‸ nyi ma zuhˆ tuˬ te laˇ chehˇ ve yoˬ. Ngaˬ Yeˍruˆsaˍlehnˍ venˇ hta‸ nyi ma zuhˆ jaˇ peuˬ. Ngaˬ nyi ma zuhˆ ve chi mehˉ kʼai tuˬ ve maˇ heˆ.

18Ya‸ hkʼaˇ, jawˇmawˇ hta‸ caˉ da‸ leh ngaˬ chi hkʼe kʼoˆ gaˇ ve yoˬ. Nawˬ lehˬ, li‸ daw oˇ ve hkʼaw bvuh‸ taˍ ve hkʼe hkʼa deh‸ na yuˬ chehˇ ve yoˬ.

19Nawˬ venˇbaˆ dawˇ hpfuhˆ leh, ngaˬ mehˆ gʼuˇ suhˍ lo nyi ma nehˬ lehˍ taˍ ve yoˬ. Yeˍruˆsaˍlehnˍ venˇ hta‸ ngaˬ ciˍ yanˍ piˇ tuˬ ve awˬ hkawˇ hta‸ nawˬ gʼa kaˇ ve teˇ yanˇ, nawˬ ve veu‸ kʼaˇ hta‸ tzuh‸ suhˍ leh hawˬ chehˇ ve yoˬ. Nawˬ ve bon lawˬ hkawˇ hta‸ ngaˬ gʼa kaˇ peuˬ.

20Chi hta‸ pa taw, nawˬ a sha‸ te‸ chehˇ ve teˇ co-e, Yeˍruˆsaˍlehnˍ venˇ hta‸ ngaˬ maˇ ciˍ yanˍ piˇ sheˍ. Nawˬ lehˬ gawˬ lehˍ ve hkʼaw gʼa suh-e tuˬ yoˬ, teh‸ Gʼuiˬsha kʼoˆ ve yoˬ. Hkʼe te leh, chaw oˇ ve teˇ hpaˍ lehˬ, Gʼuiˬsha kʼoˆ ve tawˇ chi teˇ hpaˍ jawˇmawˇ Yawˇshiˆ hta‸ ca kʼaw‸ kʼoˆ maˍ piˇ ve yoˬ.

← Chapter 21 Jump to: Chapter 23 →