Proverbs 1

Kirundi (Bibliya Yera 1951, 1967 (Burundi))

Jump to: Chapter 2 →

1Imigani ya Salomo mwene Dawidi, umwami w’Abisirayeli,

2Yo kumenya ubgenge bo n’ inyigisho; Gutegēra amajambo y’ugutahura;

3Kwigishwa gukora ibiroranye mu bgenge, Mu kugororoka, mu kwitegereza neza no mu gutunganya;

4No guha imburabgenge kwiguranura, N’umusore kumuha ukumenya no kugira amakenga:

5Kugira ng’ umunyabgenge yumve, yunguke ubgenge, Kandi ng’ umuntu w’umuhanga ashike ku kwemera inama nziza;

6No ku gutahura umugani n’ikigereranyo, N’amajambo y’abanyabgenge n’ubupfindo bgabo bapfinda.

7Kwubaha Uhoraho ni kwo tanguriro ry’ukumenya: Arikw ibipfu bikēngēra ubgenge n’inyigisho.

8Mwana wanje, umva inyigisho ya so, Kandi ntute ibgirizwa rya nyoko:

9Kuko bizokubera umugāra w’ubuntu mu mutwe, N’imigufu mw izosi.

10Mwana wanje, abanyavyaha ni bakwosha Ntukemere.

11Ni bakubgira, bati Ngwino ujane natwe, Turyamire kwica, Dutegere mu mpisho ūtagira igicumuro, ata nyanduruko;

12Tubayongobeze nk’i kuzimu, bakibona, Ar’ imirava, nk’abamanuka baja muri rwa rwobo;

13Tuzoronka ibintu vyose vy’ igiciro kinini, Tuzokwuzuza amazu yacu isahu;

14Enda fadikanya natwe, Twese tugire umupfuko umwe:

15Mwana wanje, ntuz’ ugendane na bo mu nzira, Ubuze ikirenge cawe inzira yabo,

16Kukw ibirenge vyabo vyirukira gukora ikibi, Kandi bihutira kuvisha amaraso.

17Kuk’ umutego utegerwa ubusa Ikiguruka cose iyo kibibona.

18Kand’ abo, baryamira kuvisha ayabo maraso, Bategera mu mpisho ubgabo bugingo.

19Uko ni kw inzira zimeze z’ umuntu wese w’ikirara ku nyungu: Inyungu ikūrah’ ubugingo bga ba nyene yo.

20Bgenge arangururira ijwi mu nzira; Ashirira ijwi hejuru ahiyaguye;

21Asemererera ku nama aho bakoranira; Mw ishikiro ku marembo, No mu gisagara, ni hoavugira amajambo yiwe:

22Ati Yemwe bijuju, muzogeza ryari gukunda ubujuju? N’abacokoranyi guhimbarwa no gucokora? N’ibipfu kugirira urwanko ubgenge?

23Muhindukire kubgo kwihanikiriza kwanje: Rāba, nzosuka impwemu yanje kuri mwebge, Nzobamenyesha amajambo yanje.

24Ko nabahamagaye, namwe mukanka; Nkabākura, ntihagire ūbibabara;

25Mukagaya inama zanje zose, Mukanka kwihanikiriza kwanje:

26Nuko nanje nzobatwengera mw ijigo mu gihe c’ivyago vyanyu; Nzobitamba ku muvyimba, agatengo kabafashe;

27Agatengo kanyu kabafashe nk’igihuhuta, Ivyago vyanyu bibazingazinze nk’agashururu, Guhagarika umutima n’ubusinzikare bibashikiriye.

28Ni ho bazontakambira, ariko sinzobishura; Bazondondera ubudahumeka, ariko ntibazombona:

29Nuko kuko bagiriye urwanko ubgenge, Ntibahitemwo kwubaha Uhoraho;

30Bakanka inama zanje, Bagakēngēra ukwihanikiriza kwanje kwose;

31Ni co gituma bazorya ku vy’ inzira zabo zāmuje, Bazohāga akazīkira kabo ubgabo.

32Gukomantaza imitima kw’ imburabgenge kuzozica, Kand’ ukugubga neza kw’ibipfu kuzobihonnya.

33Arik’ ūntega ugutwi wese azoba amahoro, Azokwama atekereje ata kibi atinya.

Jump to: Chapter 2 →