Proverbs 12

Kirundi (Bibliya Yera 1951, 1967 (Burundi))

← Chapter 11 Jump to: Chapter 13 →

1Ūkunda gutozwa indero nziza aba akunda ubgenge, Arik’ uwanka guhanwa aba ar’ ikiyingiyingi.

2Umunyangeso nziza atoneshwa n’Uhoraho, Arik’ umuntu w’imigabo y’ ibibi Uhoraho azomucirakw iteka.

3Umuntu ntacimbatazwa n’ ikibi, Arikw imizi y’abagororotsi nta ho izonyiganyizwa.

4Umugore atunganye abera umugabo wiwe igitsibo mu mutwe, Arik’ uw’ agatētereza amubera nk’ikimungu mu magufa.

5Ivyiyumviro vy’abagororotsi biraroranye, Arikw imigabo y’abanyakibi n’ibinyoma.

6Amagambo y’abanyakibi abundira kuvisha amaraso, Arikw akanwa k’abagororotsi bo kazobakiza.

7Abanyakibi baraheneberezwa bagashira, Arikw inzu y’abagororotsi ihagarara ishikamye.

8Umuntu ashimirwa ubgenge bgiwe nk’uko bungana, Arik’ ūfise umutima ugoramye baramugaya.

9Uwishira hejuru akabura utw’ arya Arutwa n’inēra yifitiye uwo itunze.

10Umuntu agororotse ababara igitungwa ciwe, Arik’ umutima w’abanyakibi n’inkazi.

11Ūrima itongo ryiwe azogira indya nyinshi, Arik’ ūkurikira ibitagira ikimazi nta mutima agira.

12Umunyavyaha yifuza icaguye mu mutego w’abanyakibi, Arik’ umuzi w’abagororotsi utuma bama.

13Ibicumuro vy’iminwa y’umuntu w’ikibi bimubera umutego; Arik’ umugororotsi akira ivyago.

14Umuntu azohāga ivyiza, abiheshejwe n’ibivuye mu kanwa kiwe, Kand’ umuntu ahabga ibihwanye n’ibikorwa vy’amaboko yiwe.

15Inzira y’igipfu irabereye mu maso yaco ubgaco, Arik’ ūfise ubgenge yumvira inama agīriwe.

16Ishavu ry’igipfu rica riboneka ako kanya, Arik’ uwitonda iy’atutswe arirengagiza.

17Ūvuga ukuri yerekana ukugororoka, Arikw icabona c’ibinyoma cerekana ubugunge.

18Har’ ūvuga ibisunitswe n’ impwemu bimeze nk’ugucumita kw’inkota, Arik’ ururimi rw’abanyabgenge ruravūra.

19Umunwa w’ukuri uzokomezwa gushitsa ibihe bidashira, Arik’ ururimi rw’ibinyoma n’urw’ akanya gato.

20Ubugunge buri mu mitima y’abaja imigabo y’ikibi, Arikw abaja inama z’amahoro bagira umunezero.

21Nta cago kizoba ku mugororotsi, Arikw abanyakibi buzuye ibibi.

22Iminwa y’ibinyoma n’igisesema k’Uhoraho, Arikw abakora ivy’ ukuri ni bo bamuhimbara.

23Uwitonda ahisha ivyo azi, Arik’ umutima w’ibipfu uswaganya ubupfu.

24Ukuboko kw’abanyamwete kuzoganza, Arik’ umunyabute azoshirwa mu buja.

25Amaganya yo mu mutima w’umuntu awutera kwicurikīra, Arikw ijambo ryiza rirawunezereza.

26Umugororotsi arōngōra mugenzi we, Arikw inzira y’abanyakibi irabazimiza.

27Umunyabute ntatara inyama z’ico yahīze, Arikw ikintu c’igiciro ku muntu n’umwete.

28Mu nzira y’ukugororoka har’ ubugingo, Kandi mu ndari yakwo nta rupfu ruhaba.

← Chapter 11 Jump to: Chapter 13 →