Proverbs 15

Kirundi (Bibliya Yera 1951, 1967 (Burundi))

← Chapter 14 Jump to: Chapter 16 →

1Ukwishura kwiyoroheje guhwama uburake, Arikw ijambo ribabaza rivyura ishavu.

2Ururimi rw’abanyabgenge rutonyanga ubgenge bubereye, Arikw akanwa k’ibipfu gasuka ubupfu.

3Inyonga z’Uhoraho zir’ ahantu hose, Zītegereza ababi n’abeza.

4Ururimi rwiza n’igiti c’ubugingo, Arik’ urugoreka n’akavunamutima.

5Igipfu gikēngēra gutozwa indero nziza na se, Arik’ uwumvira igihano arakerebuka.

6Mu nzu y’umugororotsi haba ubutunzi bginshi, Ariko mu nyungu z’umunyakibi habamw’ amagorwa.

7Iminwa y’abanyabgenge ikwiza ubgenge, Arik’ umutima w’ibipfu si k’umeze.

8Ikimazi abanyakibi batanga n’ igisesema k’Uhoraho, Arikw ahimbarwa n’ugusenga kw’abagororotsi.

9Inzira y’umunyakibi n’igisesema k’Uhoraho, Arikw akunda ūkurikira ubugororotsi.

10Har’ igihano gihambaye ku muntu ata inzira, Kand’ uwanka guhanwa azopfa.

11I kuzimu n’amahonero bigaragarira Uhoraho, Non’ imitima y’abana b’abantu ntirushirije kumugaragarira?

12Umucokoranyi ntakunda igihano, Kandi ntagendera abanyabgenge.

13Umutima unezerewe ukesha mu maso, Arik’ umubabaro wo mu mutima usāvya umushaha.

14Umutima w’ūfise ubgenge urondera kumenya, Arikw akanwa k’ibipfu kandavura ivy’ ubupfu.

15Imisi y’umunyamubabaro ni mibi yose, Arik’ uw’ umutima ukeye yamana ibinoboye.

16Ibike birimwo kwubaha Uhoraho Biruta ubutunzi bginshi burimwo guhagarika umutima.

17Ingaburo y’imboga irimw’ urukundo Iruta inyama z’inka inuze zirimw’ urwanko.

18Umuntu w’inkazi avyura ibihāri, Arik’ ūteba kuraka ahwamika imitongano.

19Inzira y’umunyabute ni nk’ umurombero w’amahwa, Arikw inzira y’abagororotsi n’ umuharuro.

20Umwana w’ubgenge anezereza se, Arik’ umuntu gito akēngēra nyina.

21Ubupfu bunezereza igipfamutima, Arik’ umuntu w’ubgenge atunganya ingendo ziwe.

22Ahatagira inama imigabo irapfa, Ariko mu bajanama benshi irakomera.

23Umuntu anezererwa ukwishura kw’akanwa kiwe, Kand’ ijambo riziye mu gihe kibereye, ewe kuntu ari ryiza!

24Ku munyabgenge inzira y’ ubugingo idūga irora hejuru, Kugira ngw atandukane n’i kuzimu i bgina.

25Uhoraho asambura inzu y’ umwibone, Arikw akomeza urubibe rw’ umupfakazi.

26Akazīkira n’igisesema k’Uhoraho, Arikw amajambo y’igikundiro imbere yiwe ntagira akarohe.

27Umuntu ahahamira inyungu atera imivurungano inzu yiwe, Arik’ uwanka ingurire azoramba.

28Umutima w’umugororotsi witondera ivyo wishura, Arikw akanwa k’abanyakibi gasuka ibibi.

29Uhoraho aba kure y’abanyakibi, Ariko yumva ugusenga kw’ abagororotsi.

30Mu maso hakeye hanezereza umutima, Kand’ inkuru nziza zishira imisokōro mu magufa.

31Ūtega ugutwi ngo yumve uguhanūrwa kumushitsa ku bugingo Azobana n’abanyabgenge.

32Uwanka guhanwa aba akēngereye ubgiwe bugingo, Arik’ uwumvira ivyo ahanūwe aronka ubgenge.

33Ukwubaha Uhoraho kwigisha ubgenge, Kand’ ukwicisha bugufi kwitangira imbere y’ukwubahwa.

← Chapter 14 Jump to: Chapter 16 →