Proverbs 5

Kirundi (Bibliya Yera 1951, 1967 (Burundi))

← Chapter 4 Jump to: Chapter 6 →

1Mwana wanje, shira umutima ku bgenge bganje; Tega ugutwi uburyo bganje bgo gutahura.

2Kugira ng’ ugumye amakenga, N’iminwa yawe izigame ukumenya.

3Kukw iminwa y’umugore w’ icigenze itonyanga nk’ikigigu c’ubūki, Kand’ akanwa kiwe kanyerera kurusha amavuta ya elayo:

4Arikw iherezo ryiwe rirura nk’umururazi, Rikarishe nk’ubūgi bg’inkota.

5Ibirenge vyiwe bimanuka mu rupfu; Intambuko ziwe zimushikana i kuzimu;

6Bituma atabona inzira isēnnye y’ubugingo, Ingendo ziwe ziradandabagirana, kandi ntazi iy’ aja.

7None rero bana banje, munyumve, Ntimukave ku majambo y’ akanwa kanje.

8Uz’ umuce kure, Kandi ntiwēgēre umuryango w’inzu yiwe:

9Woye kwiha abandi, ngo bonone igikundiro cawe, Na ruburakigongwe ntumumarirekw imyaka yawe:

10Abanyamahanga boye guhāga ivyawe, Kand’ ivyakuruhije vyoye kuja mu nzu y’uwundi;

11Nawe ukazoboroga kw iherezo ryawe, Ah’ umubiri wawe n’amagara yawe bizoba bishize,

12Ukavuga, ut’ Ewe ngo ndanka guhanūrwa, N’umutima wanje ugakēngēra guhanwa;

13Sinumvire ijwi ry’abigisha banje, Sintege ugutwi abāmpanūra!

14Nari nshigaje gatoya ngahetura ibibi vyose Hagati y’ishengero n’ikoraniro.

15Unywe amazi yo mw isōko yawe wiharije, N’amazi atemba yo mw iriba ryawe.

16Mbeg’ imigezi yawe yosābagira hose, N’inzuzi z’amazi zosābagira mu nzira?

17Ni bibe ivyawe ubgawe, Ntubisangire n’ivyigenze.

18Isōko yawe igire umugisha, Kand’ unezererwe umugore wo mu buto bgawe.

19Nk’impongokazi y’urukundo n’ingeregere y’igikundiro Amabere yiwe akubumbe ibihe vyose; Kandi wame uhimbarwa n’ urukundo rwiwe.

20N’iki cotuma ga mwana wanje, uhimbarwa n’umugore w’icigenze, Ukagwa mu gikiriza c’ūtar’ uwawe?

21Kukw ingendo z’umuntu zir’ imbere y’inyonga z’Uhoraho, Kand’ asēna inzira ziwe zose.

22Umunyavyaha, ukugabitanya kwiwe bgite ni kwo kuzomufata, Azodunuzwa n’ingoyi z’icaha ciwe.

23Azopfa azize kudahaha, Kubg’ ubupfu bgiwe bukomeye azozimira.

← Chapter 4 Jump to: Chapter 6 →