Proverbs 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Umutima w’umwami uri mu kuboko kw’Uhoraho nk’umugende w’amazi; Awukwegera ah’ agomba hose.

2Inzira yose y’umuntu iba nziza mu maso yiwe ubgiwe, Arik’ Uhoraho agera imitima ku munzane.

3Gukora ivy’ ukugororoka no guca izibereye Ni vyo bihimbara Uhoraho kurusha gutanga ibimazi.

4Ijisho ry’agakēngērwe n’umutima w’ubgibone Bo n’itara ry’abanyakibi n’ icaha.

5Ivyiyumviro vy’umunyamwete bizana ubukenuke gusa, Arik’ umuntu wese ahutagiza bimuzanira ubukene gusa.

6Kuronkesha ubutunzi ururimi rw’ibinyoma Ni nk’umuyaga uhita; ababurondera baba barondeye urupfu.

7Amanyama y’abanyakibi azobavumbura, Kuko banse gukora ibiroranye.

8Inzira y’ūremerewe n’ibigabitanyo iba igoramanze, Arik’ ūtunganye we, igikorwa ciwe kiba kigororotse.

9Wopfuma wībēra hanze, Hak’ ubana n’umugore w’ ingāre mu nzu.

10Umutima w’umunyakibi wifuza ikibi; Amaso yiwe ntagirira imbabazi mugenzi we.

11Umucokoranyi iy’ ahanwe imburabgenge ica ubgenge, Kand’ umunyabgenge iy’ atojwe indero nziza arakerebuka.

12Har’ umugororotsi yitegereza inzu y’umunyakibi, Ari we acuranguriza abanyakibi mu mahonero.

13Uwiziba amatwi umugorwa atakamba, Na we nyene azotakamba ntiyumvirizwe.

14Impēra yo mu kinyegero ihwamika uburake, N’ingurire igoborowe mu kwaha ihwamika ishavu ryinshi.

15Imanza ziroranye zibera umugororotsi umunezero, Arikw abakora ivy’ ukugabitanya zibabera akaranduramutima.

16Umuntu ahusha inzira y’ ubgenge Itahiriro ryiwe ni mw ikoraniro ry’abāpfuye.

17Uwishinga akayāgīriro azocika umukene, Kand’ inkunzi ya vino n’amavuta ntizoba umutunzi.

18Umunyakibi aba incungu y’ umugororotsi, Kand’ igihemu kigwa mu mpōrero y’aberanda.

19Wopfuma uba mu gihugu c’ ubugaragwa, Hak’ ubana n’umugore w’ ingāre yitoraguza.

20Mu rugo rw’umunyabgenge har’ ubutunzi bg’igiciro kinini n’amavuta, Arikw igipfu co, kirabirokagiza.

21Uwitwaririka ivy’ ubugororotsi n’imbabazi Aronka ubugingo n’ubugororotsi n’icubahiro.

22Umunyabgenge yūrira inzitiro z’igisagara c’abahizi, Agasangangura ibikomeye bāri bizigiye.

23Ūrinda akanwa kiwe n’ururimi rwiwe, Umutima wiwe aba awurinze amagorwa.

24Umwibone yihayagiza, izina ryiwe ni Mucokoranyi; Akorana ubugabo bg’ubgibone.

25Ukwifuza kw’umunyabute kuramwica, Kukw amaboko yiwe yanka kuruha.

26Har’ uwifuza afise igihahamizi bukarinda bgira, Arik’ umugororotsi atanga ata kinubge.

27Ikimazi abanyakibi batanga kirasesema: Mbeg’ iy’ akizananye umutima mubi, ntikirushiriza kuba igisesema?

28Icabona c’ibinyoma kizoranduka, Arik’ umuntu yumva neza azovuga ata kimutēsha.

29Umuntu w’umunyakibi nta dusoni agira mu maso, Arik’ umugororotsi yitondera inzira ziwe.

30Ubgenge cank’ ukumenya Cank’ inama, biba ar’ ubusa imbere y’Uhoraho.

31Ifarasi itegurirwa umusi w’ intambara, Arik’ ukunesha kuva k’Uhoraho.

← Chapter 20 Jump to: Chapter 22 →