Proverbs 23

Kirundi (Bibliya Yera 1951, 1967 (Burundi))

← Chapter 22 Jump to: Chapter 24 →

1Ni wicara gusangira n’ūganza, Ushinge ijisho uyo ar’ imbere yawe.

2Asangwa ur’ umuntu w’inda ndende Wigarure, nk’ūhirikiwe imbugita kw izosi.

3Ntugire umutima muke mu binoboye vyiwe, Kukw ar’ ivyo kurya vy’ uruhendo.

4Ntiwirushe ng’ ube umutunzi, Reka kuvyigengeterereza.

5Mbega wogumiza ijisho ku kiriko kirarenga? Kuk’ ubutunzi butobura kumera amababa, Nk’inkukuma iguruka itumbereye mw ijuru.

6Ntukarye ivyo kurya vy’ umunyajisho ribi, Ntugire umutima muke mu binoboye vyiwe:

7Kuk’ uko yiyumvira mu mutima ari kw ameze: Araguhimiriza, ngo N’urye, n’unywe; Arik’ umutima wiwe udafatanije nawe.

8Intore wariye uzoyidahwa, Akayāgo kawe karyoshe kazoba gapfuye ubusa.

9Ntugire ico uvuga ikijuju cumva, Kukw azokēngēra ubgenge bgo mu majambo yawe.

10Ntugashingūre akarimbi k’ urubibe rwa kera, Kandi ntukarye amatongo y’ impfuvyi;

11Kuk’ umucunguzi wazo ar’ Inyenkomezi, Izobūrana urwazo nawe.

12Shira umutima ku gutozwa indero nziza, N’amatwi yawe ku majambo y’ubgenge.

13Ntureke guhana umwana, Kukw atokwicwa n’uk’ umukubise inkoni.

14Uz’ umukubite inkoni, Ni ho uzokiza ubugingo bgiwe ngo ntibuje i kuzimu.

15Mwana wanje, umutima wawe ni wagira ubgenge Uwanje mutima bgite uzonezerwa,

16Mber’ umushaha wanje uzohimbarwa Iminwa yawe ni yavuga ibiroranye.

17Umutima wawe woye kugirira ishari abanyavyaha, Arik’ ugire ishaka ryo kwubaha Uhoraho burinde bgira.

18Kuko vy’ukuri har’ ukuziga ibizoba, Kand’ ivyo wizigiye ntibizokūrwaho.

19Mwana wanje, wumvirize, ugire ubgenge, Urōngōre umutima wawe mu nzira.

20Ntukabe mu gitigiri c’abanohowe na vino, No mu c’abanyameru y’inyama:

21Kukw imborerwa n’umunyameru uburuhiro ar’ ugufūtāna, Kand’ itiro rizokwambika umuntu ubucocerwa.

22Wumvire so yakuvyaye, Kandi ntugakēngēre nyoko ashitse mu butāmakazi.

23Gura ukuri, ntugushōre; Bo n’ubgenge n’indero nziza n’ubukerebutsi.

24Se w’umugororotsi azogira akanyamuneza kenshi, N’ūvyaye umwana w’ubgenge azomunezererwa.

25So na nyoko ni banezerwe, Nyoko yakuvyaye n’ahimbarwe.

26Mwana wanje, mpa umutima wawe, Kand’ amaso yawe ahimbarwe n’inzira zanje.

27Kuko maraya ar’ urusumanyenzi rurerure, Kand’ umugore w’icigenze n’urwobo rw’imbōmbāne.

28Mber’ abunda nk’umwambuzi, Atuma abanyabihemu bagwira mu bantu.

29Ni nde agira ngo Yō! Ni nde agira ngw Agwē! Ni nde afise imitongano? Ni nde afise imyidodombo? Ni nde afise inguma ata nyanduruko? Ni nde afise amaso atukuye?

30N’abatavīrīra vino, N’abaja kurondera izituriranije.

31Ntukitegereze vino iy’ itukuye, Iy’ ica ibibatsi mu kirahuri, Igashōka neza:

32Uburuhiro iryana nk’inzoka, Igakomora nk’imvuvyi.

33Amaso yawe ugahava uyarābisha abagore b’ivyīgenze, Umutima wawe ukavuga ibidadi;

34Mber’ ugaca umera nk’ūryamye hagati mu kiyaga, Canke nk’ūryamye ku mutwe w’umuringoti wo mu bgato.

35Ukavuga, uti Bārankubise, sinababara, Bāranyegaguye, sinavyumva: Nzokwikangura ryari? Na ho nyene nzosubira kuyirondera.

← Chapter 22 Jump to: Chapter 24 →