Proverbs 17

Kirundi (Bibliya Yera 1951, 1967 (Burundi))

← Chapter 16 Jump to: Chapter 18 →

1Indumange irimw’ amahoro Iruta ibinoboye vyuzuye inzu birimw’ imitongano.

2Umushumba w’ubgenge bazomureresha umwana w’ agatētereza, Kand’ azogira umugabane mu biragwa hamwe na ben’ umwandu.

3Inkono yo mu ruganda iteka ifeza, n’umuriro uvugutira izahabu, Arik’ ūgerageza imitima n’ Uhoraho.

4Inkozi y’ikibi ishira umutima ku minwa y’ibibi, Kand’ umunyabinyoma atega ugutwi ururimi rw’akazīkira.

5Ūcokora umworo aba agaye Umuremyi wiwe, Kand’ ūnezerezwa n’ivyago vy’ uwundi ntazobura guhanwa.

6Abuzukuru ni bo gitsibo c’ abatāma, Kand’ icubahiro c’abana ni ba se.

7Amajambo aroranye kw’atabereye igipfu, Non’ iminwa y’ibinyoma ntirushirije kuba iyitabereye ku mupfa soni?

8Ingabire ni nk’akabuyenge k’ igiciro kinini mu maso y’ ūyihawe, Ah’ agiye hose agira ukuboko kwiza.

9Ūpfuka igicumuro aba arondera urukundo, Arik’ ūhoza ikintu mu kanwa atandukanya abakundana cane.

10Umuntu afise ubgenge iy’ ahambariwe bimushika kure Kurusha ukw inkoni ijana zishika ku gipfu.

11Umuntu w’umunyakibi arondera ubugarariji gusa, Arik’ umutahe w’imburakigongwe azotumwa kuri we.

12Umuntu yopfuma ahūra n’ igikōko citwa idubu ciciwe ibibgana vyaco, Hakw ahūrira n’igipfu mu bupfu bgaco.

13Uwishura iciza ikibi, Ikibi ntikizoruha kiva ku nzu yiwe.

14Gutangura imitongano ni nko kugomorora amazi, Nuko reka ibirake utarasinda.

15Ūtsindanishiriza umunyakibi, bo n’ūtsindisha umugororotsi Bompi nyene n’igisesema k’ Uhoraho.

16Igipfu bikimariye iki kugira ibiguzi mu ntoke ngo kigure ubgenge, Kandi kitagira umutima?

17Umukunzi akundana ibihe vyose, Kandi yavukiye kukubera nk’ uwo muvukana mu magorwa.

18Umuntu atagira umutima yishira mu ndahiro, Akigira ishinga imbere ya mugenzi we.

19Ūkunda gutongana aba akunda kugabitanya; Uwubaka ibirimba kw irembo ryiwe aba yikwegeye kugesezwa.

20Ūfise umutima udadika nta ciza abona, Kand’ ūfise ururimi rudambikanya agwa mu vyago.

21Ūvyaye igipfu aba yizaniye intuntu, Kandi se w’ikijuju nta munezero agira.

22Umutima unezerewe n’umuti ukiza, Arik’ umutima usāvye wumisha amagufa.

23Umuntu w’umunyakibi agoborora ingurire mu kwaha Kugira ngw agoreke inzira z’ imanza.

24Ubgenge bur’ imbere y’ūkerebutse, Arikw amaso y’igipfu agenda ajarajara gushitsa ku mpera z’isi.

25Umwana w’igipfu n’umubabaro kuri se, Kandi n’agaterantuntu kuri nyina yamuvyaye.

26Si vyiza gucira igihano umugororotsi, Canke gukubitira abapfasoni ubugororotsi bgabo.

27Ūvuga make aba ar’ ubgenge, Kand’ umugwaneza aba ar’ umuntu afise umutima.

28N’igipfu na co, iyo ciyihorereye, bacita umunyabgenge, Iyo kibumvye iminwa bacita uwitonda.

← Chapter 16 Jump to: Chapter 18 →