Proverbs 16

Kirundi (Bibliya Yera 1951, 1967 (Burundi))

← Chapter 15 Jump to: Chapter 17 →

1Inama umutima wigeneye n’iy’ umuntu, Arikw ivyo ururimi rwishura biva k’Uhoraho.

2Ingendo zose z’umuntu ziba izitunganye mu maso yiwe ubgiwe, Arik’ Uhoraho agera imishaha ku munzane.

3Uremeke Uhoraho ibikorwa vyawe, Ni ho imigabo yawe izokomera.

4Uhoraho yaremye ikintu cose ngo kigire ico gikora, Mbere n’abanyakibi na bo yabashizeho ngo babone umusi mubi.

5Umuntu wese w’ubgibone mu mutima n’igisesema k’Uhoraho; Vy’ukuri akazobura guhanwa!

6Ibigabitanyo bikūrwaho n’ imbabazi n’ukuri, Kand’ abantu bakūrwa mu bibi no kwubaha Uhoraho.

7Inzira z’umuntu iyo zihimbaye Uhoraho Atuma n’abansi biwe buzura na we.

8Ibike birimw’ ubugororotsi Biruta inyungu nyinshi zirimwo kugabitanya.

9Umutima w’umuntu wigerera inzira yiwe, Arik’ Uhoraho ni we atumbereza ibirenge vyiwe.

10Amajambo y’ubumenyi ari mu minwa y’umwami, Akanwa kiwe nta ho kagoramika imanza.

11Ibigeresho n’iminzane bishitse n’ivy’ Uhoraho, Amabuye yose agera yo mw isaho n’igikorwa ciwe.

12N’ikizira ku bami gukora ikibi, Kukw ingoma ikomezwa n’ ubugororotsi.

13Abami bahimbarwa n’iminwa y’ubugororotsi, Kandi bakunda ūvuga ibiroranye.

14Uburake bg’umwami ni nk’ intumwa zo kugeseza, Arik’ umuntu w’umunyabgenge arabuhwamika.

15Mu nyonga h’umwami iyo hakeye haba ubugingo, Kandi gutonesha kwiwe ni nk’igicu kigwa imvura y’ agatāsi.

16Ewe kuronka ubgenge ukuntu kuruta kuronka izahabu! Mbere guca ubgenge n’ico guhitamwo kuruta ifeza.

17Inzira y’igihamo y’abagororotsi n’ukwitandukanya n’ikibi; Uwirinda mu nzira yiwe akiza ubugingo bgiwe.

18Ubgibone bgitangira imbere y’uguhona, Kand’ umutima wihaya witangira imbere y’ukugwa.

19Kugira umutima wicishije bugufi ugafatanya n’abagorwa Biruta kugabangana iminyago ufatanije n’abibone.

20Ūshira umutima kw ijambo azobona ivyiza, Kand’ uwizigira Uhoraho aba ahiriwe.

21Uw’ ubgenge mu mutima azokwitwa umukerebutsi, Kandi n’iminwa ivuga ibiryoshe yungura ubgenge.

22Ugutahura n’isōko y’ubugingo k’ūgufise, Kand’ igihana ibipfu n’ubupfu bgavyo.

23Umutima w’umunyabgenge wigisha akanwa kiwe, Ukungura ubgenge bg’iminwa yiwe.

24Amajambo aryoshe ni nk’ umutsāma w’ikigigu, Asōsera umutima, anonora amagufa.

25Harih’ inzira umuntu yibgira kw ari nziza, Arikw amaherezo yayo n’inzira ishikana mu rupfu.

26Inda y’ūkora ni yo imukoresha, Kukw akanwa kiwe kamusaba.

27Umuntu w’umugarariji yimba ivyago, Kandi mu minwa yiwe harimw’ umuriro w’inkazi.

28Umuntu w’ikigoryi yandurutsa intonganya, Kand’ ūneguranira mu vyongorerano atandukanya abakundana cane.

29Umuntu w’ikirara yosha mugenzi we, Amujana mu nzira itari nziza.

30Ūteranya amaso ngo yigerere ibigoramye, Agafumbanya iminwa, ni we ashitsa ibibi.

31Imvi ku mutwe n’igitsibo c’ icubahiro, Kiboneka mu nzira y’ubugororotsi.

32Ūteba kuraka aruta umunyenkomezi, Kand’ ūganza umutima wiwe aruta ūnesheje igisagara.

33Utwo bapfindisha baduterera mu mpuzu zo mu gikiriza, Arik’ uko bigenda kwose bigerwa n’Uhoraho.

← Chapter 15 Jump to: Chapter 17 →