Proverbs 10

Kirundi (Bibliya Yera 1951, 1967 (Burundi))

← Chapter 9 Jump to: Chapter 11 →

1Imigani ya Salomo. Umwana w’ubgenge anezereza se, Arik’ umwana w’igipfu ababaza nyina.

2Itunga rironkeshejwe ubugunge ntirigira ikimazi, Arik’ ubugororotsi bukūra mu rupfu.

3Uhoraho ntazokundira umushaha w’umugororotsi k’ ugira inzara, Arikw akaruru k’abanyavyaha azogasunikira hirya.

4Ukuboko kw’umunebge kwizanira ubgoro, Arik’ ukuboko kw’umunyamwete kuratungisha.

5Ūshwābūra mu ci n’umwana w’ubgenge, Arik’ uwigonera mw iyimbura n’umwana w’agatētereza.

6Imigisha iba ku mutwe w’ umugororotsi, Arik’ umuryano wubikiza ku munwa w’umunyavyaha.

7Kwibuka umugororotsi kurimw’ umugisha, Arikw izina ry’umunyavyaha rizozimangana.

8Ūfise umutima w’ubgenge yemera kubgirizwa, Arik’ ūfise iminwa y’ubuhumbu aratemba.

9Ūgenda agororotse agenda amahoro, Arik’ ūgoramangisha inzira ziwe azomenyekana.

10Ūvuniranira akagohe atera umubabaro, Kand’ ūfise iminwa y’ubuhumbu aratemba.

11Akanwa k’umugororotsi n’ isōko y’ubugingo, Arik’ umuryano wubikiza ku munwa w’umunyavyaha.

12Urwanko ruvyura intonganya, Arik’ urukundo rupfuka ibigabitanyo vyose.

13Mu minwa y’ūzi gutegēra habonekamw’ ubgenge, Arikw inkoni ibīkiwe ibitugu vy’ūtagira umutima.

14Abanyabgenge baziganya ukumenya, Arikw akanwa k’igipfu ni ko buyobe bugira butere.

15Itunga ry’umutunzi rimubera igisagara gikomeye, Arikw ikimara aboro n’ubgoro bgabo.

16Ubutame bg’umugororotsi buzana ubugingo, Arikw inyungu z’umunyakibi zizana icaha.

17Ūshira umutima ku gutozwa indero nziza aba ari mu nzira y’ubugingo, Arik’ uwanka guhanwa aba azimiye.

18Ūpfukapfuka urwanko n’ umunyaminwa y’ibinyoma, Kand’ ūvuga ibirementanyo n’igipfu.

19Mw isinzi ry’amajambo ntihaburamw’ ugucumura, Arik’ uwigarura mu vy’iminwa ivuga n’umunyabgenge.

20Ururimi rw’umugororotsi ni nk’ifeza z’indobānurwa, Arik’ umutima w’umunyakibi ugira ikimazi gike.

21Iminwa y’umugororotsi igaburira benshi, Arikw ibijuju vyicwa no kutagira umutima.

22Umugisha w’Uhoraho uratungisha, Kandi nta mubabaro awuvangamwo.

23Gukora ikibi ni nk’ibihimbaro ku gipfu, Kand’ ubgenge ni ko bumerera umuntu atahura.

24Ico umunyakibi atinya kizomushikako, Arikw ico umugororotsi yifuza azokironka.

25Agashururu kamaze guhita umunyakibi ntaba akiboneka, Arik’ umugororotsi n’ibuye ry’itanguriro ryamaho.

26Nk’ukw inkevya imerera amenyo, kandi nk’ukw imyotsi imerera amaso, Ni k’umunyabute amerera abamutumye.

27Ukwubaha Uhoraho kurarambisha, Arikw imyaka y’abanyakibi izogerurwa.

28Ivyizigiro vy’abagororotsi n’ umunezero, Arikw ivyo abanyakibi bishimiye bizoshira.

29Inzira y’Uhoraho n’igihome gikingira umugororotsi, Ariko n’amahonero ku bakora ivy’ ukugabitanya.

30Umugororotsi nta ho azosegenyeshwa, Arikw abanyakibi ntibazohora mu gihugu.

31Akanwa k’umugororotsi gatengengera ivy’ ubgenge, Arik’ ururimi rudadika ruzocibga.

32Iminwa y’umugororotsi izi ibishimwa, Arikw akanwa k’abanyakibi kavuga ibidadi.

← Chapter 9 Jump to: Chapter 11 →