Proverbs 18

Kirundi (Bibliya Yera 1951, 1967 (Burundi))

← Chapter 17 Jump to: Chapter 19 →

1Uwigungira ukwiwe aba arondera ivyo yiharije gusa, Kand’ arwanya inama nziza zose.

2Igipfu ntigihimbarwa n’ubgenge, Ariko gihimbarwa no kwiyerekana uko kimeze mu mutima.

3Umunyakibi iy’ aje, ukugayana kuba kuje, Kand’ agatētereza kazanana n’ ibitutsi.

4Amajambo yo mu kanwa k’ umuntu ni nk’amazi y’ibenga, Isōko y’ubgenge ni nk’akūzi gasūma.

5Mu manza si vyiza gutinya umunyakibi ku kigohe, Canke gutsindisha umugororotsi.

6Iminwa y’igipfu ija mu bihāri, Kand’ akanwa kaco kagihamagarira inkoni.

7Akanwa k’igipfu ni kwo kuranduka kwaco, Kand’ iminwa yaco ni yo mutego w’ubugingo bgaco.

8Amagambo y’ūneguranira mu vyongorerano ni nk’ivyo kurya biryoshe, Bimanuka bija epfo mu nda.

9Kand’ ūdeha mu gikorwa ciwe Aba ar’ incuti y’ūtikiza.

10Izina ry’Uhoraho n’umunara ukomeye: Umugororotsi awirukiramwo, akaba amahoro.

11Itunga ry’umutunzi kuri we n’igisagara gikomeye, Uko yiyumvira ni nk’uruzitiro rugera hejuru.

12Uwishira hejuru mu mutima, agatikizo azogasanga imbere, Kand’ ukwicisha bugufi kuzosanga imbere icubahiro.

13Ūwishura atarumva Bimubera ubupfu n’agatētereza.

14Umutima w’umuntu umushigikira mu magara make, Arik’ umutima wihebuye ni nde yoshobora kuwuremesha?

15Umutima w’umukerebutsi uronka ubgenge, N’ugutwi kw’abanyabgenge na kwo ni co kurondera.

16Ishikanwa ry’umuntu rimuronkera akayira, Rimushitsa imbere y’abahambaye.

17Ūbanza kwitwara, umengo ni we afise urubanza, Arik’ uwo babūrana yaza akamwararaza.

18Ubupfindo bumara ibihāri, Kandi butātūra abakomeye.

19Uwo muvukana iy’ umukomeretseko bigora kumugarura kurusha kunesha igisagara gikomeye, Kand’ ibitāti ben’ ivyo bimeze nk’ibihindizo vyugara inzu y’igihome.

20Inda y’umuntu ihāzwa n’ibivuye mu kanwa kiwe, Kand’ azohāga ukugwira kwo mu minwa yiwe.

21Urupfu n’ubugingo biri mu bubasha bg’ururimi, Kand’ abarukunda bazorya ivyo rwamye.

22Ūronse umugore aba aronse ikintu ciza, Kand’ aba aronse ingabire k’ Uhoraho.

23Umworo akoma ibōbo, Arik’ umutunzi we yishurana ubugabo.

24Ūcuditse na benshi aba yizaniye guhenebera, Ariko har’ umukunzi yimatanya n’umuntu kurusha ūvukana na we.

← Chapter 17 Jump to: Chapter 19 →