Proverbs 25

Kirundi (Bibliya Yera 1951, 1967 (Burundi))

← Chapter 24 Jump to: Chapter 26 →

1N’iyi nyene n’imigani ya Salomo, iyo abantu ba Hezekiya umwami w’i Buyuda batoranije.

2Imana guhisha ikintu, n’ icubahiro cayo, Arikw abami bo, guserangura ikintu, ni co cubahiro cabo.

3Nk’ukw ijuru rigera hejuru cane, n’i bgina hakagera kure, Uko ni k’umutima w’abami udaserangurika.

4Kūra inkamba mw ifeza, Ni ho hazovamw’ urwavya rutunganye.

5Kūra abanyakibi imbere y’ umwami, Ni ho ingoma yiwe izohangama mu bugororotsi.

6Ntiwikakishe mu nyonga z’ umwami, Kandi ntukirobeke mu bahambaye:

7Ivyoba vyiza n’uko bokubarira, bat’ Igira hino imbere, Hako bagusubiza inyuma imbere y’ūganza, Uwo amaso yawe yiboneye.

8Ntukihutire kubūrana, Uburuhiro ntuz’ usange waguye mu rudubi, Mugenzawe amaze kukumāramāza.

9Wītātūre na mugenzawe ubgiwe, Kandi ntumenere ibanga uwundi,

10Ūvyumvise akagutuka, Ukaba wambaye ibara ritakuvako.

11Ijambo rivuzwe mu buryo bubereye Ni nk’amacungwa y’izahabu ari mu tujishano tw’ifeza.

12Ukw impeta y’izahabu imeze, bo n’utugenegene two kwambarwa tw’izahabu nziza, Ni k’umunyabgenge azi guhanura amerera ugutwi kwumva.

13Nk’ukw imbeho ya shelegi imera mu gihe c’iyimbura, Ni ko n’intumwa yizigirwa imerera abayitumye, Kukw ihēmbūra umutima wa ba shebuja.

14Nk’ukw ibicu n’umuyaga bitarimw’ imvura bimeze, Ni k’umuntu ameze yishemagiza ngw aratanga kand’ ar’ ukubesha.

15Gushishikara wiyoroheje vyemeza umucamanza, Kand’ ururimi rwiyoroheje rujanjagura igufa.

16Ni warenguka ku būki, urye ubukumaze akaruru, Woye kubguzuza inda, bukakudaha.

17Ikirenge cawe ntigihore mu nzu kwa mugenzawe, Kugira ngo ntahave akurambirwa, akakwanka.

18Umuntu yāgiriza mugenzi we ibinyoma Ni nk’ubuhiri n’inkota n’ umwampi ukarishe.

19Kwizigira umuntu w’igihemu mu gihe c’amagorwa, Ni nk’iryinyo ricitse, n’ukuguru gukōndōtse.

20Kuvugiriza impundu umuntu atuntuye mu mutima Ni nk’umuntu kwiyambura impuzu mu gihe c’imbeho, n’inkarisha isutswe ku munyu witwa amagadi.

21Umwansi wawe ni yasonza umugaburire, Ni yagira inyota umuhe amazi yo kunywa:

22Kuk’ uzoba umurunzekw amakara yaka ku mutwe, Kand’ Uhoraho azoguhēra.

23Umuyaga uva i burārūko uzana imvura; Ni ko n’ururimi rurementanya ruzana kwiraburanirwa mu maso.

24Wopfuma wībēra hanze, Hak’ ubana n’umugore w’ ingāre mu nzu.

25Nk’ukw amazi apfutse amerera umutima ufise icākāka, Ni ko n’inkuru nziza zimera, zivuye mu gihugu ca kure.

26Umuntu agororotse agapfa kwemerana ivy’ umunyakibi Ameze nk’isōko itobetse, n’ imbizi y’iyōndoyōndo.

27Si vyiza kurya ubūki bginshi cane: Kandi kwironderera icubahiro s’icubahiro.

28Umuntu atītāngīra mu mutima Ameze nk’igisagara gitewe gisambutse uruzitiro.

← Chapter 24 Jump to: Chapter 26 →