Proverbs 2

Kirundi (Bibliya Yera 1951, 1967 (Burundi))

← Chapter 1 Jump to: Chapter 3 →

1Mwana wanje, ni wemera amajambo yanje, Ukabīka amabgirizwa yanje muri wewe,

2Bigatuma utega ugutwi ubgenge, Ugashira umutima ku gutahura;

3Mbere ni wahamagara ubgenge, Ugashira ijwi hejuru uririra ugutahura;

4Ni waburondera nk’ifeza, Ukabusesangura nk’ūrondera izahabu zanyegejwe;

5Ni ho uzotahura ukwubaha Uhoraho ukw ari kwo, Ukaronka ukumenya Imana.

6Kuk’ Uhoraho atanga ubgenge, Mu kanwa kiwe havamw’ ukumenya n’ugutahura.

7Abīkira abagororotsi ubgenge buroranye, Ni we nkinzo y’abagenda batunganye.

8Kugira ngw arinde inzira z’ imanza ziroranye, Kand’ azigame urugendo rw’ abayoboke biwe.

9Ni ho uzotahura ubugororotsi n’imanza ziroranye, N’ibitunganye, mbere n’inzira nziza yose.

10Kuk’ ubgenge buzokwinjira mu mutima wawe, Kand’ ukumenya kuzohimbara ubugingo bgawe.

11Amakenga azogushibamira, Ugutahura kuzokuzigama,

12Ngo bigukize inzira y’ikibi, N’abantu badadika,

13Bata inzira zo kugororoka, Ngo bagendere mu nzira z’ umwiza;

14Banezererwa gukora ikibi, Bahimbarwa n’ibidadi vy’ikibi;

15Inzira zabo ziragoramanze, N’ingendo zabo n’izinguzingu.

16Kandi ngo bigukize umugore w’icigenze, Mber’ igukize umunyamahangakazi ahemanisha amagambo yiwe,

17Yataye umukunzi wo mu buto bgiwe, Yibagiye isezerano ry’Imana yiwe:

18Kukw inzu yiwe ihengamiye mu rupfu, Kand’ inzira ziwe zija mu bāpfuye.

19Abaja i we nta ho bagaruka ukundi, Kandi ntibashikīra inzira z’ ubugingo.

20Ni ho uzogendera mu nzira y’abagira neza, Ukitondera inzira z’abagororotsi.

21Kukw abagororotsi bazokwībēra mu gihugu, Kand’ abatunganye bazokwamayo.

22Arikw abanyavyaha bazokomborwa mu gihugu, Kand’ abaguranyi bazorandurwa muri co.

← Chapter 1 Jump to: Chapter 3 →