Proverbs 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Mwana wanje, ntuze wibagire ukwigisha kwanje, Arik’ umutima wawe witondere amabgirizwa yanje:

2Kuko bizokwongerakw imisi myinshi, N’imyaka yo kuramvya ubugingo, n’amahoro.

3Ubuntu n’ukuri ntibikuveko, Ubipfundike mw izosi ryawe, uvyandike ku gisate, ni co mutima wawe:

4Ni ho uzobona gushimwa, bo n’ubgenge bushitse, Mu maso y’Imana n’abantu.

5Wizigize Uhoraho umutima wawe wose, Kandi ntiwishimikize ubgenge bg’iwawe:

6Umumenye mu ngendo zawe zose, Na we azogorora inzira zawe.

7Ntukiyite umunyabgenge wewe ubgawe; Utinye Uhoraho, uve mu bibi:

8Ivyo bizogutera kunonoka mu mubiri, No kugira umusokōro mu magufa yawe.

9Wubahishe Uhoraho ibintu vyawe, Bo n’umushuzo w’ivyeze vyawe vyose.

10Ni ho ibigega vyawe bizokwuzura vyongerekane, Kandi n’amato yawe azosēsekara imitobe.

11Mwana wanje, ntugaye igikāngīro c’Uhoraho, Kandi nturambirwe n’uguhana kwiwe:

12Kuk’ uwo Uhoraho akunda ari we ahana, Nk’uko se w’umwana nyene ahana umwana wiwe anezererwa.

13Hahirwa umuntu yironkera ubgenge, N’umuntu aronse ugutahura.

14Kukw inyungu zabgo ziruta iz’ ifeza, Kand’ ivyo bgunguka biruta izahabu zitarimw’ inkamba.

15Burusha igiciro utubuyenge twitwa marijani: Kandi mu bihimbara vyose nta kintu gihwanye na bgo.

16Ukuramba kuri mu kuboko kwabgo kw’i buryo, Mu kubamfu kwabgo harimw’ ubutunzi n’icubahiro.

17Amayira yabgo n’amayira y’ igikundiro, Kand’ inzira zabgo zose n’iz’ amahoro.

18Bubera igiti c’ubugingo ababucakira: Hahirwa umuntu wese abgumirako.

19Uhoraho yashirishijeho isi ubgenge; Ugutahura ni kwo yagumishije ijuru.

20Ukumenya kwiwe ni kwo kwatumye amasōko y’i kuzimu atoboka, N’ibipfungu bigatonyanga ikime.

21Mwana wanje, ivyo ntibikave imbere y’amaso yawe: Ugumye ubgenge buroranye n’amakenga;

22Ni ho bizobera umutima wawe ubugingo, N’izosi ryawe ugushaza.

23Ni ho uzogenda mu nzira yawe ata nkomanzi, Kandi ntuzotsitara ikirenge cawe.

24Ni waryama ntuzogira ubgoba, Mber’ uzoryama, ugire itiro riryoshe.

25Ntuzotinya ubgoba bga giturumbuka, Cank’ ukuzingazingwa kw’ abanyavyaha ni kwashika:

26Kuk’ Uhoraho azokubera ivyizigiro, Kand’ azorinda ikirenge cawe ngo ntigifatwe.

27Ntukanke kugirira ivyiza ababibereye, Ugifise uburyo bgo kubikora.

28Ntukabgire mugenzawe, uti Genda, uz’ugaruke, Ejo nzoguha; Kand’ ubifise ngaho.

29Ntukīgīre imigabo yo kugirira nabi mugenzawe, Kand’ abana nawe amahoro.

30Ntukarwane n’umuntu ata nyanduruko, Iy’ ata kibi yakugiriye.

31Ntukagirire ishari umuntu w’ikirara, Ntugatore inzira yiwe n’imwe.

32Kukw ikidambidambi n’igisesema k’Uhoraho, Arikw abagororotsi bo, asangiye ibanga na bo.

33Umuvumo w’Uhoraho uri mu nzu y’abanyavyaha, Arikw ahezagira ingo z’abagororotsi.

34N’ukuri yitamba ku muvyimba abacokoranyi, Arikw agirira ubuntu abicisha bugufi.

35Abanyabgenge bazoragwa icubahiro, Arikw isoni ni zo zizoba umugabane w’ibipfu.

← Chapter 2 Jump to: Chapter 4 →