Proverbs 26

Kirundi (Bibliya Yera 1951, 1967 (Burundi))

← Chapter 25 Jump to: Chapter 27 →

1Nk’uko shelegi itabereye mu gihe c’umumero, n’ imvura mu gihe c’iyimbura, Ni ko n’ukwubaha igipfu kutabereye.

2Nk’ukw akanyoni kayerēra, n’ intamba iguruka, Ni ko n’umuvumo w’ubusa ata we wokora.

3Ikimōko n’ic’ ifarasi, n’umujiginya n’uw’ indogoba, Inkoni na yo n’iy’ ibitugu vy’ ibipfu.

4Ntiwishure igipfu amagambo ahwanye n’ubupfu bgaco, Kugira ngo nawe ntibikwandukire.

5Wishure igipfu amagambo akwiranye n’ubupfu bgaco, Kugira ngo nticirate ko gifise ubgenge.

6Ūtumye igipfu Aba yīcīye ibirenge, yihamagariye ubuhombe.

7Amaguru y’ikimuga yama aregarega: Ni k’umugani umera mu kanwa k’ibipfu.

8Guha igipfu icubahiro Ni nko gushiburira akabuyenge k’igiciro kinini ku gihongo c’amabuye.

9Nk’ukw ihwa rihanda mu kiganza c’imborerwa, Ni k’umugani umera mu kanwa k’ibipfu.

10Umuhinga yikorera vyose ubgiwe, Arikw igipfu gipfa gucisha ingero uwihitira wese.

11Nk’ukw imbga isubira ku vy’ idashwe, Ni kw igipfu gisubira ku bupfu bgaco.

12Ni wabona umuntu yirata kw afise ubgenge Umenye kw igipfu copfanirwa ikizigizigi kuruta uyo.

13Umunyabute aravuga, ati Mu nzira har’ intambge, Har’ intambge y’ubukombe mw ibarabara.

14Nk’uk’ urugi ruhindukira ku mapata yarwo, Ni k’umunebge ahindukira ku buriri bgiwe.

15Ikiremare kirokeza ukuboko mu nkōko, Bikagica inkokora kukugarukana ku munwa.

16Umunebge yirata kw afise ubgenge Buruta ubg’ abantu ndwi bazi kwishura ibiroranye.

17Uwihitira agashingwa n’intonganya z’ibitar’ ivyiwe Ameze nk’ūfata imbga ku matwi.

18Nk’uk’ umusazi ashwiragiza ibishirīra N’imyampi vyo kwica,

19Uko ni kw ameze, umuntu ahenda mugenzi we, Maz’ akavuga, at’ Erega najandajanda gusa!

20Iy’ inkwi zibuze umuriro urazima, Kand’ ahatagira ūneguranira mu vyongorerano imitongano irashira.

21Nk’ukw amakara acana igitōngōrero, n’inkwi zicana umuriro, Ni k’umuntu w’amahane acana intonganya.

22Amagambo y’ūneguranira mu vyongorerano ni nk’ivyo kurya biryoshe, Bimanuka bija epfo mu nda.

23Iminwa ihemana n’umutima mubi Bimeze nk’ikibumbano gikuyengejekw ifeza.

24Uwankana atuma iminwa yiwe ihendana, Kand’ abīka uburyarya imbere muri we.

25Ni yagira imvugo nziza, ntuz’ umwemere, Kuko mu mutima wiwe harimw’ ibizira ndwi.

26Nah’ inzigo yiwe yokwipfukapfukisha ubugunge, Ukugabitanya kwiwe kuzokwerekanirwa imbere y’ ishengero.

27Uwimba icobo azokigwamwo, Kand’ ūtembagaza ikibuye kizomugarukako.

28Ururimi rubesha rwanka abo rwakomerekeje, Kand’ akanwa gahemana kazana uguhona.

← Chapter 25 Jump to: Chapter 27 →

Recommended Reading

Commentary Proverbs Commentaries → Devotional Proverbs Devotional Guide → Get This Bible Burundi Study Bible →