Proverbs 27

Kirundi (Bibliya Yera 1951, 1967 (Burundi))

← Chapter 26 Jump to: Chapter 28 →

1Ntukarāte ivy’ ejo, Kuk’ utazi ivyo umusi uzovyara.

2Wopfuma ushimwa n’uwundi, hak’ ushimwa n’akanwa kawe; Wopfuma ushimwa n’akavantara, hak’ ushimwa n’ iminwa yawe.

3Ibuye rirarivye, umusenyi uraremereye, Arik’ umwikomo w’igipfu urusha vyompi uburemerezi.

4Uburake ni ruburakigongwe, ishavu ritwara nk’umuvo, Ariko ni nde yoshobora kwihanga ishari?

5Guhanira ahibonekeza Kuruta urukundo rudaseruka.

6Gukubitwa n’umukunzi biba bitewe n’ukuri, Arik’ ugusomagura kw’umwansi buba ar’ uburyarya.

7Umutima uhimvye winenaguza ikigigu c’ubūki, Arik’ umutima ushonje ibirura vyose birawuryohera.

8Nk’ukw inyoni itaye icāri iyerēra, N’umuntu ni kw ameze, iy’ ataye urugo rwiwe akayerēra.

9Ukw amavuta atāmirana n’ ibimota neza binezereza umutima, Ni ko n’uburyohe bg’umukunzi w’umuntu bumeze, buvuye mu nama zo mu mutima.

10Ntugahebe umukunzi wawe ubgawe, n’umukunzi wa so, Kandi ntuje kwa mwene wanyu ku musi uboneyekw amagorwa: Umubanyi wo hafi aruta mwene wanyu ari kure.

11Mwana wanje, uce ubgenge, unezereze umutima wanje, Kugira ngo ngire ico nishura uwontuka.

12Umunyamakenga iy’ abonye ikibi kije, arikinga, Arikw imburabgenge zikomeza inzira zikīgabura.

13Twara impuzu y’uwishinze uwo atazi, Wake ingwati uwishinze umugore w’icigenze.

14Ūzinduka kare agahezagira mugenzi we n’ijwi rirenga, Abiharūrwako nko kumuvuma.

15Amatonyanga adahengeshanya yo ku musi w’imvura nyinshi, N’umugore atongana, vyompi ni kimwe.

16Kumutesha ni nko gutesha umuyaga, Kand’ ukuboko kwiwe kw’i buryo kuba gufashe umunyererwe.

17Ukw icuma gikarisha ikindi, Ni k’umuntu akarisha mugenzi we.

18Ūbungabunga umusukoni wiwe azorya insukoni zawo, Kand’ ūkorera shebuja neza azohabga icubahiro.

19Nk’ukw amaso arābana n’ ayandi mu mazi, Ni k’umutima w’umuntu urābana n’uwundi mu muntu.

20I kuzimu n’amahonero nta ho bihāga, N’amaso y’abantu nta ho ahāga.

21Inkono yo mu ruganda iteka ifeza, n’umuriro uvugutira izahabu, Umuntu na we agezwa no gushimwa.

22Igipfu naho wogisekurana n’ impeke mw isekuro, ugisekuje umuhini, Ubupfu bgaco ntibgokivako.

23Gira umwete wo kumenya imikuku yawe ukw imeze, No kurāba cane amasho yawe,

24Kukw itunga ridahoraho, Canke mbeg’ ingoma ihorah’ ibihe vyose?

25Ubgatsi butemwe burakūrwaho, ubundi bukamera, Ivyatsi vyo ku misozi bikegeranywa.

26Imyagazi y’intama izokwambika, Kand’ amasuguru azovamw’ ivyo kugura itongo;

27Amata y’impene azoguhāzanya n’abo mu rugo rwawe, Kand’ azogutungira abigeme bagukorera.

← Chapter 26 Jump to: Chapter 28 →