Proverbs 30

Kirundi (Bibliya Yera 1951, 1967 (Burundi))

← Chapter 29 Jump to: Chapter 31 →

1Amajambo ya Aguri mwene Yake, y’ivyo yavugishijwe. Umuntu yabariye Itiyeli, Itiyeli bo na Ukali,

2Ati N’ukuri nd’ ikiyingiyingi kurusha umuntu wese, Sinkerebutse nk’umuntu,

3Kandi sinize ubgenge, No kumenya Uwera singufise.

4Ni nde yadūze mw ijuru, akamanuka? Ni nde yakoranirije umuyaga mu bipfunsi vyiwe? Ni nde yatēkeye amazi mu mwambaro wiwe? Ni nde yashimangiye impera zose z’isi? Izina ryiwe ni nde, cank’ izina ry’umwana wiwe, namba worimenya?

5Ijambo ryose ry’Imana riravugutiwe: Ni yo nkinzo y’abayizigira.

6Ntukūngurire ku majambo yayo, Kugira ngo ntiz’ iguhane, ugahinyuka k’ur’ umubeshi.

7Ngusavye ibintu bibiri ntarahwera, Ntubinyime:

8Unshire kure y’ibitagira ikimazi, bo n’ibinyoma; Ntumpe ubgoro, ntumpe n’ ubutunzi; Ungaburire ivyo kurya dukwiranye:

9Sinze mpave mpimba nabi, nkakwihakana, nkavuga nt’ Uhoraho n’iki? Kandi noye kuba mworo, ngahava niba, Ngatukisha izina ry’Imana yanje.

10Ntukarementanirize umushumba kuri shebuja, Kugira ngo ntagende arakuvuma, maz’ ukaba wiyambitse ibara.

11Har’ urunganwe rw’abantu batuka ba se, Ntibahezagire ba nyina.

12Har’ urunganwe rw’abantu bibgira ko batunganye, Ariko ntibuhagiwe imyanda yabo.

13Har’ urunganwe rw’abantu, emwe ingen’ amaso yabo bayashira hejuru! N’ibigohe vyabo bikagira ubgibone!

14Har’ urunganwe rw’abantu, amenyo yabo ni nk’inkota, n’ibijigo vyabo ni nk’imbugita, Ngo batsontsomere impahazwa bazimare mw isi, n’ aboro babamare mu bantu.

15Umuyoka ufise abakobga babiri, basemerera bati Mpa, mpa. Har’ ibintu bitatu bitīgera bihāga, Mbere ni bine ata ho bivuga, biti Geza aho,

16Ni vyo ibi: i kuzimu, bo n’ inda itavyara, Bo n’isi idahāga amazi, N’umuriro ata ho uvuga, uti Geza aho.

17Ijisho ry’ūcokora se, Kwumvira nyina akabikēngēra, Ibikōna vyo mu mwonga bizorinogora, Ibinyakabaka bizorirya.

18Har’ ibintu bitatu vy’igitangaza bindengeye, Mbere ni bine ntomenya,

19Ni vyo ibi: inzira y’inkukuma mu kirēre, N’inzira y’inzoka ku gitandara, N’inzira y’ubgato hagati mu kiyaga, N’inzira y’umusore ku mwigeme.

20Uko ni kw inzira y’umusambanyikazi imeze: Ararya, akanyuza umunwa mw ivu, Akavuga, ati Nta kibi nakoze.

21Isi ihindishwa agashitsi n’ ibintu bitatu, Mbere ni bine, ivyo idashobora kwihanganira,

22Ni vyo ibi: umushumba iy’ abaye umwami, N’igipfu iyo gihimvye ivyo kurya,

23N’umukobga w’icanke iy’ arongowe, N’incoreke iyo yegukiye ivya inabuja.

24Har’ ibintu bine bito‐bito kw isi, Ariko bifise ubgenge bginshi:

25Ibimonyo n’ubgoko budafise inkomezi, Yamara vyiziganiriza indya zavyo zo mu ci;

26Inkezi n’ubgoko bg’ubunyantege nke, Yamara zīronderera inzu zazo mu bitandara;

27Inzige ntizigira umwami, Yamara zigenda zose zīciye imice;

28Umuserebanyi ugendesha amaboko yawo, Yamar’ uba mu ngoro z’abami.

29Har’ ibintu bitatu bigenda birashogamanga, Mbere ni bine bigenda birashonyashonya,

30Ni vyo ibi: intambge, kukw ari yo irusha ibikōko vyose inkomezi, Kandi ntivira na kimwe mu nzira;

31N’ifarasi irikw amatandiko; n’impfizi y’impene; N’umwami, ari we rutarindwa.

32Namba warakoze ivy’ ubupfu ukishira hejuru, Canke waragize ikibi wiyumvira, Ni wifate ku munwa.

33Kuko gutērera amata kurēsa amavuta, No guhotora izuru kuzana amaraso, Ni ko kandi no kuvyura uburake kuzana imitongano.

← Chapter 29 Jump to: Chapter 31 →