Proverbs 24

Kirundi (Bibliya Yera 1951, 1967 (Burundi))

← Chapter 23 Jump to: Chapter 25 →

1Ntukagirire ishari abanyakibi, Kandi ntukifuze kubana na bo:

2Kuk’ umutima wabo wiyumvira guhonnya, Kand’ iminwa yabo ikavuga ivy’ ukugira nabi.

3Ubgenge ni bgo bgubaka urugo, Kand’ ubukerebutsi ni bgo burukomeza;

4Guca ubgenge ni kwo kwuzuza inzu zo muri rwo Ubutunzi bgose bg’igiciro kinini kandi bg’igikundiro.

5Umunyabgenge aba uw’ inkomezi, Mber’ umuntu aciye ubgenge yunguka ubushobozi.

6Kuk’ uzoja mu ntambara urōngōwe n’inama y’ubgenge, Kandi mu nama ya benshi habonekamw’ agakiza.

7Ubgenge buri hejuru, busiga igipfu: Ntigikūrak’ umunwa iyo kiri mw ikombe.

8Uwigerera gukora ibibi Abantu bazomwita Kanyengunge.

9Ivyiyumviro vy’igipfu n’ivyaha, Kand’ umucokoranyi n’igisesema ku bandi.

10Ni wadendebukirwa ku musi w’ivyago Inkomezi zawe zizoba zari nke.

11Urokore abo bashorewe bajanwa kwicwa, N’abagenda bacitse intege bajanwa gutikizwa, ntubure kubatabara.

12Ni wavuga, ut’ Erega ntitwari tubizi: Mbeg’ Ūgera imitima ku munzane ntavyiyumvira? Kand’ Ūzigama ubugingo bgawe ntabizi? Mbega ntazokwishura umuntu wese ibikwiranye n’ivyo yakoze?

13Mwana wanje, uz’ urye ubūki, kukw ari bgiza, N’ikigigu kikuryohera mu kanwa.

14Umenye kw ari k’ubgenge bumerera ubugingo bgawe: Asangwa warabubonye, har’ ukuziga ibizoba, Kand’ ivyo wizigiye ntibizokūrwaho.

15Ewe munyakibi, ntukabunde ku rugo rw’umugororotsi, Ntugasangangure umuhana wiwe;

16Kuk’ umugororotsi n’iyo yogwa ibihetangabo ndwi, asubira kuvyuka, Arikw abanyakibi bazogwa mu vyago.

17Umwansi wawe ni yagwa ntuz’ unezerwe, Umutima wawe woye guhimbarwa ni yatsitara:

18Uhoraho yoye guhava abibona, bikaba bibi mu nyonga ziwe, Akaroresha irya uburake yamurakiye.

19Ntugashavuzwe n’ivy’ inkozi z’ibibi, Kandi ntukagirire ishari abanyakibi:

20Kukw ata kuziga ibizoba kw’umunyakibi; Itara ry’abanyavyaha rizozimwa.

21Mwana wanje, utinye Uhoraho, bo n’umwami, Kandi ntukifatanye n’abagarariji:

22Kukw ivyago no kugeseza bivuye kur’ abo bompi bizoza giturumbuka, Kandi ni nde yobimenya?

23N’aya nyene n’amajambo y’ abanyabgenge. Mu manza si vyiza gutinya abantu ku kigohe.

24Ūbarira umutsindwa ng’ Uratsinze, Amoko azomuvuma, amahanga azomwanka urunuka.

25Arikw abamuhana bazogirirwa neza, Umugisha n’amahirwe bizobazako.

26Uwishuye ibiroranye Biba bibaye nk’indamukanyo nziza.

27Tunganya ibikorwa vyawe vyo hanze, Uvyiroranirize mu ndimiro, Hanyuma uz’ ubone kwubaka inzu.

28Ntukāgirize mugenzawe ata nyanduruko, Kandi ntugahendanishe iminwa yawe.

29Ntukavuge, uti Nzomusubiriza mu nkōko; Nzokwishura uyo muntu ibihwanye n’ivyo yakoze.

30Naciye ku ndimiro y’umunebge, No ku ruzabibu rw’umuntu atagira umutima;

31Nasanze hose huzuyemw’ amahwa, Hose igisuru kirenze hejuru, Uruzitiro rwaho rw’amabuye rusambūtse.

32Ndahitegereje ndiyumvira cane, Ndabirāba, biranyigisha.

33Guca agatiro gakeya, kuba urisinziriye gatoya, Kwisegura ukuboko gatoya wiboterere:

34Uko ni k’ubgoro bgawe buzogushikako nk’umwambuzi, N’ikigoyi kizogushikako nk’ umuntu w’umurwanyi.

← Chapter 23 Jump to: Chapter 25 →