Proverbs 8

Kirundi (Bibliya Yera 1951, 1967 (Burundi))

← Chapter 7 Jump to: Chapter 9 →

1Mbega Bgenge ntahamagaye? N’ukumenya ntigushize hejuru ijwi ryakwo?

2Ku gatwe hejuru, i ruhande y’inzira, Mu mayirabiri, ni ho ahagaze.

3I ruhande y’amarembo, mw ishikiro ry’igisagara, Mu bikingi vy’amarembo, ni ho asemererera cane:

4Ati Ni mwebge mwa bagabo mpamagaye, Kand’ ijwi ryanje rihamagaye abana b’abantu.

5Yemwe mwa mburabgenge, mumenye kwiguranura ic’ ari co, Namwe bijuju, mugire imitima itahura.

6Mwumvirize, kuko ngira mvuge ibikomeye; Guteranura iminwa kwanje kuvamw’ ibibereye.

7Kukw akanwa kanje kagira kavuge ivy’ ukuri, Kand’ ikibi n’umuziro ku minwa yanje.

8Amajambo yose y’akanwa kanje n’ay’ ukugororoka, Kandi muri yo nta kigoramye cank’ ikigoretse.

9Yose arumvikana ku muntu atahura, Kand’ aratumbereye ku bāronse ubgenge.

10Mwākīre inyigisho zanje, si nk’ifeza, Mwākīre n’ukumenya kurusha izahabu z’indobanurwa.

11Kuk’ ubgenge buruta utubuyenge twitwa marijani; Kandi mu bintu bihimbara vyose nta gihwanye na bgo.

12Jewe Bgenge, amakenga nayagize inzu yanje, Nserangura ukumenya n’inama nziza.

13Kwubaha Uhoraho ni kwo kwanka ikibi: Ubgibone n’amanyama n’inzira y’ikibi N’akanwa k’ibidadi, ndavyanka.

14Inama nziza n’iyanje, bo n’ ubgenge bushitse, Ni jewe kumenya, ndi n’inkomezi.

15Ni jewe mpa abami kuganza, N’abacamanza gushinga ibiroranye.

16Ni jewe mpa abaganza kuganza, N’abaganwa, eka mbere n’abacamanza bose bo mw isi.

17Nkunda abankunda, Kand’ abandondera ubudahumeka bazombona.

18Itunga n’icubahiro bir’ i wanje; N’ubutunzi buramba, bo n’ ubugororotsi.

19Imbuto namye zirusha izahabu ubgiza, mbere naho zoba izahabu zitarimw’ inkamba; N’ivyimburwa vyanje biruta ifeza z’indobānurwa.

20Ngendera mu mayira y’ubugororotsi, No hagati mu nzira z’imanza ziroranye:

21Kugira ngw abankunda ndabahe kuragwa itunga, Kandi kugira ngo nuzuze ibigega vyabo.

22Uhoraho yaranyamanye mw itanguriro ry’inzira ziwe, Ataratangura na kimwe mu bikorwa vyiwe vya kera.

23Nashizweh’ uhereye kera hose, uhereye mbere na mbere, Isi itararemwa.

24I bgina hatarabaho nari naravutse; Amasōko yuzuye amazi atarabaho.

25Imisozi miremire itarashirwaho, Bo n’udusozi, nari naravutse:

26Itararema isi cank’ indimiro, Cank’ itanguriro ry’umukungugu wo kw isi.

27Igihe yashirah’ ijuru ni ho nari ndi: N’igihe yarihetera hejuru y’i bgina;

28Ijuru igihe yarigumya hejuru iyo, Igihe amasōko y’i bgina yakomera;

29Igihe yashingira ikiyaga akarimbi, Kugira ngw amazi ntarenge icagezwe cayo; Igihe yashirah’ amatanguriro y’isi:

30Ico gihe nari kumwe na yo, nd’ umukozi w’umuhanga: Kand’ imisi yose narayihimbara, Nama niginagura imbere yayo;

31Niginagura mw isi yayo yāgānutse; Mpimbarwa n’abana b’abantu.

32None rero, bana banje, ni munyumve: Kukw abitondera inzira zanje ar’ abahirwe.

33Mwumvirize inyigisho, muce ubgenge, Kandi ntimuze muzanke.

34Hahirwa umuntu anyumviriza, Akāma arerekeye ku myugariro yanje uko bukeye, Agategera ku bishimaryango vyanje.

35Kuk’ ūmbona wese aba abonye ubugingo, Kand’ akazotoneshwa n’Uhoraho.

36Arik’ ūncumuyeko, aba yankirije ubugingo bgiwe nyene: Abanyanka bose bakunda urupfu.

← Chapter 7 Jump to: Chapter 9 →