Proverbs 1

Tswana (BAEBELE e e Boitshepo) 1992

Jump to: Chapter 2 →

1Diane tsa ga Solomone morwa Dafite, kgosi ya Iseraele:

2Go itse botlhale le thuto; go lemoga mafoko a tlhaloganyo;

3go tshola thuto ya go dira ka botlhale, ka tshiamo, le ka katlholo, le ka tekatekanyo;

4go naya yo o sa tlhalefang matseba, le motho wa lekau kitso le pharologanyo;

5gore motho yo o botlhale a utlwe, a totafale mo go ithuteng; le gore motho wa tlhaloganyo a ye go tshwara dikgakololo tse di itekanetseng;

6go tlhaloganya seane, le setshwantsho; mafoko a ba ba botlhale, le dinyoba tsa bone.

7Go boifa Jehofa ke tshimologo ya kitso, mme masilo a nyatsa botlhale le thuto.

8Morwaaka, utlwa thuto ya ga rraago, mme o se ka wa tlogela molao wa ga mmaago,

9gonne e tlaa nna kgopana e ntle mo tlhogong ya gago, le tlhanyaku mo thamong ya gago.

10Morwaaka, fa baleofi ba go fepa, o se ka wa dumela.

11Fa ba re: “A re tsamaye mmogo re ye go lalela go tsholola madi, a re bobele ba ba se nang molato ka bomo;

12a re ba kometse jaaka Bobipo ba sa ntse ba utlwa, ba le boleka jaaka ba ba fologelang mo moleteng;

13re tlaa fitlhela thoto yotlhe e e tlhokegang, re tlaa tlatsa matlo a rona ka thopo;

14o tlaa tlhakanela kgetsi le rona; re tlaa dira le kgetsana ya madi e le nngwe fela.”

15Morwaaka, o se ka wa tsamaya nabo mo tseleng; thiba lonao lwa gago, gore lo se ka lwa tsena mo tselaneng ya bone,

16gonne dinao tsa bone di sianela bosula, ba itlhaganelela go tsholola madi.

17Gonne, aitse lotloa lo menololelwa lefela mo ponong ya nonyane le fa e ka nna efe;

18bao ba italelela a e leng madi a bone tota, ba ipobelela a e leng matshelo a bone tota.

19Ditsela tsa mongwe le mongwe yo o sefatlha ka ga papadi di ntse jalo, e tle e bolaye beng ba yone.

20Botlhale o kuela godimo mo mmileng; o ntsha lentswe la gagwe mo dipatlelong;

21o kua mo bonnong jo bogolo jwa borakanelo; fa botsenong jwa dikgoro, o bolela mafoko a gagwe mo motseng, a re:

22“Lona ba lo sa tlhalefang, lo tlaa rata botlhoka botlhale ka lobaka lo lo kaye, le basotli go ijesa monate mo go sotleng, le dieleele go ila kitso?

23Sokologang ka kgalemo ya me; bonang, ke tlaa thela mowa wa me mo go lona, ke tlaa lo itsise mafoko a me.

24E re ka ke biditse, mme lwa gana; ke otlolotse letsogo la me, mme ga se ka ga tlhokomela ope;

25lo ntshitse kgakololo ya me yotlhe lefela, lwa ba lwa gana kgalemo ya me.

26Le nna ke tlaa tshega mo motlheng wa tatlhego ya lona; ke tlaa sotla motlhang poifo ya lona e tlang;

27motlhang poifo ya lona e tlang jaaka matsubutsubu a phefo, le tatlhego ya lona e tlaa jaaka setsuatsue; motlhang pitlagano e tlang mo go lona le tlalelo e e mahehe.

28Foo ba tlaa mpitsa, mme ga nketla ke araba; ba tlaa mpatla ka tlhoafalo, mme ga ba ketla ba mpona.

29E re ka ba idile kitso, ba se ka ba itshenkela go boifa Jehofa,

30kgakololo ya me ba e ganela ruri; ba nyatsa kgalemo yotlhe ya me.

31Ke gone ka moo ba tlaa jang loungo lwa tsela ya bone, ba tlaa kgora maano a ba a logileng ka bosi.

32Gonne go tenega ga ba ba sa tlhalefang go tlaa ba bolaya, le boiketlo jwa dieleele bo tlaa di senya.

33Yo o ntheetsang o tlaa aga ka polokego, o tlaa nna fela a sa boife bosula.”

Jump to: Chapter 2 →