Proverbs 25

Tswana (BAEBELE e e Boitshepo) 1992

← Chapter 24 Jump to: Chapter 26 →

1Tse le tsone ke diane tsa ga Solomone, tse banna ba ga Hesekia kgosi ya Juta ba di kwadileng ka menwana.

2Ke tlotlego mo Modimong go loba selo, mme tlotlego mo dikgosing ke go tlhotlhomisa selo.

3Mo go sa kankabediweng ke legodimo ka bogodimo, le lefatshe ka boteng, le pelo ya dikgosi.

4Okola manyelo mo selefereng, mme motlhapolosi o tlaa tswelwa ke selwane.

5Tlosa baikepi fa pele ga kgosi, mme setulo sa yone sa bogosi se tlaa tlhomamisiwa mo tshiamong.

6O se ka wa itlotlomatsa fa pele ga kgosi, o se ka wa ema mo boemong jwa banna ba bagolo;

7gonne go molemo o rewa go twe: “Tlhatlogela kwano,” bogolo go go isiwa kwa tlase fa pele ga kgosana e matlho a gago a e bonyeng.

8O se ka wa potlakela go ya go lwa, ka e tlaa re fa wa gaeno a go tlhabisitse ditlhong, o ka tla wa se ka wa itse se o tlaa se dirang mo bofelong jwa gone.

9Bua kgang ya gago le wa gaeno ka esi, mme o se ka wa bipolola leoma la motho yo mongwe,

10ka gobo yo o go utlwang o ka tla a go kgala, mme kutlwalelo e e bosula ka ga gago e se ke e go tlogele.

11Lefoko le le buiwang ka tebang ya lone, le tshwana jaaka boapole ba gouta mo dirotong tsa selefera.

12Jaaka lenyena la gouta le sekgabisa sa gouta e e itshekileng, mokgalemi yo o botlhale o ntse jalo mo tsebeng e e utlwang.

13Jaaka botsididi jwa kapoko mo motlheng wa thobo, morongwa yo o ikanyegang o ntse jalo mo go ba ba mo romang; gonne o rudisa mowa wa beng ba gagwe.

14Jaaka maru le phefo mo go se nang pula, yo o ipelafatsang ka ga dineo tsa gagwe a aka, o ntse jalo.

15Molaodi o tle a kgonwe ke motho a ikgapa ka bopelotelele, le loleme lo lo bonolo lo tle lo robe marapo.

16A o bonye dinotshe? O je fela mo go go lekanyeng, ka o ka tla wa di kgora bobe, mme wa di tlhatsa.

17A lonao lwa gago lo se tsene bobe mo ntlong ya wa gaeno; o ka tla wa mo lapisa, mme a go ila.

18Motho yo o supang kako ka ga wa ga gabo ke molamu, le tšhaka, le motswi o o bogale.

19Go ikanya motho yo o se nang boikanngo mo motlheng wa tlalelo, go tshwana jaaka leino le le robegetseng, le lonao lo lo lokologileng.

20Jaaka motho yo o apolang kobo go le serame, le jaaka bojalwa jo bo bodila mo lobung, yo o opelelang pelo e e bohutsana o ntse fela jalo.

21Fa mmaba wa gago a bolawa ke tlala, o mo fe dijo; fa a le lenyora o mo nose metsi;

22gonne o tlaa bo o tlhatlaganya magala a molelo mo tlhogong ya gagwe, mme Jehofa o tlaa go duela.

23Phefo ya Tshelamelapo e tlhola pula, go ntse jalo loleme lo lo sebang lo tle lo tsose sefatlhogo se se bifang.

24Go molemo bogolo go nna mo kgokgotshong kwa godimo ga ntlo, bogolo go go aga le mosadi yo o omanang mo ntlong e e atlhameng.

25Jaaka metsi a a tsididi mo mothong yo o lenyora, mafoko a a molemo a a tswang lefatsheng le le kgakala a ntse fela jalo.

26Jaaka motswedi o o kgoberegileng, le sediba se se leswefaditsweng, motho yo o siameng yo o tlosolosiwang ke baikepi o ntse jalo.

27Ga go molemo go ja dinotshe bobe, go ntse jalo ga se tlotlego mo bathong go ipatlela tlotlo.

28Motho yo mowa wa gagwe o se nang bothibo, o tshwana le motse o o thubegileng, mme o se na lorako.

← Chapter 24 Jump to: Chapter 26 →