Proverbs 11

Tswana (BAEBELE e e Boitshepo) 1992

← Chapter 10 Jump to: Chapter 12 →

1Selekanyo sa pego se se tsietsang ke se se makgapha mo go Jehofa, mme sebokete se se lekanyeng se a mo natefela.

2E re fa boikgodiso bo tla, foo go tle ditlhong, mme botlhale bo nna le yo o ikgobalatsang.

3Botlhoka molato jwa bathokgami bo tlaa ba goga, mme lesoko la ba ba bongowane le tlaa ba senya.

4Dikhumo ga di thuse sepe mo tsatsing la bogale, mme tshiamo e golola mo losong.

5Tshiamo ya moitekanedi e tlaa mo kaela tsela ya gagwe, mme moikepi o tlaa wa ka boikepo jwa gagwe.

6Tshiamo ya bathokgami e tlaa ba golola, mme ba ba dirang ka bonongwane ba tlaa tshwarelwa mo bosenying jwa bone fela.

7Motlhang motho wa boikepo o swang, tebelelo ya gagwe e nyelele, le tsholofelo ya boikepo e fele.

8Mosiami o gololwa mo tlalelong, mme moikepi a tsene mo boemong jwa gagwe.

9Motho yo o sa reng Modimo sepe o senya wa ga gabo ka molomo wa gagwe, mme mosiami o tlaa gololwa ka kitso.

10E a re go nna molemo mo mosiaming motse o itumele, mme mogang moikepi o nyelelang, go nne tuduetso.

11Motse o golediwa ke tshegofatso ya mothokgami, mme o ribegediwe ke molomo wa moikepi.

12Yo o nyatsang wa ga gabo ga a na botlhale, mme motho wa tlhaloganyo o ithiba mo puong.

13Yo o tsamayatsamayang e le mosebi o senola maoma, mme yo o mowa wa boikanngo o a a loba.

14Kwa go se nang kgogo ya botlhale gone, batho ba a wa, mme mo bontsing jwa bagakolodi go nne le polokego.

15Yo o leng moemedi wa moeng o tlaa babalesega ka gone, mme yo o ilang kemelo o tlhomame.

16Mosadi yo o pelotshweu o nnela ruri le tlotlo; mme batho ba ba thubakang ba nnela ruri le khumo.

17Motho yo o boutlwelobotlhoko o itirela mowa wa gagwe molemo, mme yo o selalome o itshwenya nama ya gagwe.

18Moikepi o ipapalela tuelo ya tsietso, mme yo o jalang tshiamo o na le tuelo e e tlhomameng.

19Yo o nitameng mo tshiamong o tlaa fitlha kwa botshelong. Mme yo o latelelang bosula o dira jalo go tla a inaya loso.

20Ba ba lesoko mo pelong ke difedisa pelo mo go Jehofa, mme ba ba itekanetseng mo tseleng ya bone, ke natefelo ya gagwe.

21Le fa seatla se tshwaragana le seatla, motho yo o bosula ga a ketla a tlhoka petso, mme losika lwa mosiami lo tlaa gololwa.

22Jaaka lenyena la gouta mo nkong ya kolobe, mosadi yo montle, yo o se nang pharologanyo, o ntse fela jalo.

23Keletso ya mosiami ke molemo fela, mme tebelelo ya moikepi ke bogale jo bogolo.

24Go na le mo go gasegang, mme go totafale bogolo, mme go bile go na le gonoga bogolo go tshwanelo, mme go ise lehumeng fela.

25Motho yo o fang ka pelontle o tlaa nontshiwa, le yo o nosang le ene ka esi o tlaa nosiwa.

26Yo o gonang ka mabele, batho ba tlaa mo hutsa, mme tshegofatso e tlaa nna mo tlhogong ya yo o a rekisang.

27Motho yo o batlang molemo ka tlhoafalo o batla botsalano, mme yo o senkang bosenyi, bo tlaa tla mo go ene.

28Yo o ikanyang khumo ya gagwe o tlaa wa, mme mosiami o tlaa kgaba jaaka lekakaba le letala.

29Yo o tshwenyang ntlo ya gagwe o tlaa ja phefo boswa, le lesilo le tlaa nna motlhanka wa yo o pelo e e botlhale.

30Loungo lwa mosiami ke setlhare sa botshelo, mme le yo o botlhale o tle a gape mewa ya batho.

31Bonang, mosiami o tlaa duelwa mo lefatsheng, bogolo jang moikepi le moleofi!

← Chapter 10 Jump to: Chapter 12 →