Proverbs 15

Tswana (BAEBELE e e Boitshepo) 1992

← Chapter 14 Jump to: Chapter 16 →

1Phetolo e e bonolo e thibosa bogale, mme lefoko le le tlhokofatsang le tle le tlhotlheletse bogale.

2Loleme lwa ba ba tlhalefileng lo bolela kitso ka go siameng, mme molomo wa dieleele o gorometse boeleele fela.

3Matlho a ga Jehofa a mo mafelong otlhe, a lebeletse ba ba bosula le ba ba molemo.

4Loleme lo lo phepa ke setlhare sa botshelo, mme fa bogwadi bo le mo go lone bo phatlole pelo.

5Lesilo le nyatsa thuto ya rra lone, mme yo o elang kgalemelo tlhoko o bapala bonokopela.

6Mo ntlong ya mosiami go na le khumo e kgolo, mme mo dibapalong tsa baikepi go na le letshwenyo.

7Dipounama tsa ba ba tlhalefileng di gasa kitso, mme pelo ya dieleele ga e dire jalo.

8Setlhabelo sa baikepi ke makgapha mo go Jehofa, mme morapelo wa mothokgami o a mo natefela.

9Tsela ya moikepi ke makgapha mo go Jehofa, mme o rata ene yo o latelang tshiamo.

10Yo o tlogelang tsela o na le go otlhaiwa mo go botlhoko, mme yo o ilang kgalemelo o tlaa swa.

11Bobipo le Bosenyegelo ke dilo tse di senogileng fa pele ga Jehofa, mme dipelo tsa batho tsone bogolo jang!

12Mosotli ga a rate go kgalemelwa, ga a ketla a ya kwa go yo o tlhalefileng.

13Pelo e e ntseng mokete e sesa sefatlhogo, mme mowa o phatlolwe ke bohutsana jwa pelo.

14Pelo ya yo o nang le tlhaloganyo e batla kitso, mme melomo ya dieleele e theneketse bosilo fela.

15Malatsi otlhe a ba ba patikwang a bosula, mme yo pelo ya gagwe e jang monate o na le modiro o o sa khutleng.

16Bonnye fa bo na le poifo ya ga Jehofa, bo molemo bogolo go khumo e kgolo, fa e na le letshwenyo.

17Go ja dijo tsa merogo fela, fa e na le lorato, go molemo bogolo go kgomo e e otlilweng, fa e na le kilo.

18Motho yo o šakgalang bobe o tlhotlheletsa kgang, mme yo o bonya go galefa o kokobetsa komano.

19Tsela ya serorobe e ntse jaaka logora lwa mitlwa, mme tselana ya mothokgami e dirwa ya mheru fela.

20Mosimane yo o tlhalefileng o itumedisa rraagwe, mme motho wa seeleele o nyatsa mmaagwe.

21Bofafalele ke boitumelo fela mo go yo o tlhokang botlhale, mme motho yo o nang le tlhaloganyo o siamisa motsamao wa gagwe.

22Kwa go se nang kgakololo gone, maikaelelo a tle a tlhaele, mme mo bontsing jwa bagakolodi a tle a tlhomame.

23Motho o na le boitumelo mo go fetoleng ga molomo wa gagwe; mme lefoko, fa le buiwa mo lobakeng lo e leng lone, le molemo jang!

24Mo go ba ba tlhalefileng tsela ya botshelo e tlhatlogela kwa godimo, gore ba tlogelele Bobipo kwa tlase.

25Jehofa o tlaa epolola ntlo ya ba ba ikgodisang, mme o tlaa tlhomamisa mololwane wa mosadi wa motlholagadi.

26Ditogamaano tse di bosula di makgapha mo go Jehofa, mme mafoko a a monate a itshekile.

27Yo o segagapa mo papading o tshwenya ntlo ya gagwe, mme yo o ilang dimpho o tlaa tshela.

28Pelo ya mosiami e tlhatlhanya go fetola, mme molomo wa baikepi o tle o gorometse dilo tse di bosula.

29Jehofa o kgakala le baikepi, mme o utlwa morapelo wa basiami.

30Lesedi la matlho le itumedisa pelo, le mafoko a a molemo a nontsha marapo.

31Tsebe e e reetsang kgalemelo ya botshelo e tlaa nnela ruri mo go ba ba tlhalefileng.

32Yo o ganang kwatlhao o inyatsa mowa, mme yo o reetsang kgalemelo o bona tlhaloganyo.

33Go boifa Jehofa ke yone thuto ya botlhale, mme boikokobetso bo tle bo etelele tlotlo pele.

← Chapter 14 Jump to: Chapter 16 →