Proverbs 23

Tswana (BAEBELE e e Boitshepo) 1992

← Chapter 22 Jump to: Chapter 24 →

1E re fa o nnela go ja le molaodi, o gopole thata yo o fa pele ga gago;

2mme fa o le motho yo o jang bobe, o ipeye thipa fa mometsong.

3O se ka wa eletsa dimediwa fela tsa gagwe; ka e le dijo tse di tsietsang.

4O se ka wa itapisetsa go humisiwa, khutlela botlhale jwa gago.

5A o a bo o tlaa tlhoma matlho mo go sone se se seyong? Gonne ruri dikhumo di tle di itirele diphuka, jaaka ntswi yo motona yo o fofelang kwa legodimong.

6O se ka wa ja dijo tsa yo o leitlho le bosula, le gone o se ka wa eletsa dimediwa fela tsa gagwe;

7gonne jaaka a kaya mo teng ga gagwe, o ntse fela jalo, o go raya, a re: “Ja o nwe,” mme pelo ya gagwe ga e mo go wena.

8Thathana e o e jeleng o tlaa ba o e tlhatsa, mme o timelwa ke mafoko a gago a a monate.

9O se ka wa bua mo kutlong ya seeleele, gonne se tlaa nyatsa botlhale jwa mafoko a gago.

10O se ka wa tlosa molelwane wa bogologolo, o bo o se ka wa tsena mo matlhagareng a masiela;

11gonne morekolodi wa bone o thata; o tlaa ba ganelelela ka ga gago.

12Tshegeletsa pelo ya gago mo thutong, le ditsebe tsa gago mo mafokong a kitso.

13O se ka wa gana ka kwatlhao mo ngwaneng, gonne fa o mmetsa ka thupa ga a ketla a a swa.

14Mmetse ka thupa, mme o tlaa golola mowa wa gagwe mo Bobipong.

15Morwaaka, fa pelo ya gago e le botlhale, pelo ya me e tlaa itumela, e bong ya me;

16ee, diphilo tsa me di tlaa ipela thata, motlhang molomo wa gago o buang dilo tse di siameng.

17A pelo ya gago e se nne tshetlha ka ga baleofi: mme o tlhole mo go boifeng Jehofa motshegare otlhe;

18gonne ruri go na le tuelo, le tsholofelo ya gago ga e ketla e kgaolwa.

19Utlwa morwaaka, o nne botlhale, o bo o tsamaise pelo ya gago mo tseleng.

20Se nne mo banwing ba bojalwa jwa mofine, le mo go ba ba bogagaru mo go jeng nama.

21Gonne motagwi le yo o tlabuelang dijo ba tlaa humanega, le kotselo e tlaa apesa motho dikatana.

22Reetsa rraago yo o go tsetseng, o bo o se ka wa nyatsa mmaago fa a tsofetse.

23Reka boammaaruri, mme o se ka wa bo rekisa; ee, le botlhale, le thuto, le tlhaloganyo.

24Rraagwe mosiami o tlaa ipela thata, le yo o tsalang ngwana yo o botlhale o tlaa bona boitumelo ka ga gagwe.

25A borraago le mmaago ba itumele, le yo o go belegeng a ipele thata.

26Morwaaka, nnaya pelo ya gago, mme a matlho a gago a natefelwe ke ditsela tsa me.

27Gonne mosadi yo o seaka ke mosele o o boteng; le mosadi yo e leng o sele ke longope lo lo pitlaganyeng.

28Ee, o tle a lalele jaaka senokwane, mme a ntsifatse ba ba bonongwane mo bathong.

29E mang yo o nang le khutsego? E mang yo o nang le bohutsana? E mang yo o nang le dikgang? E mang yo o nang le ngongorego? E mang yo o nang le dintho tsa lefela? E mang yo o nang le bohidibu jwa matlho?

30Ke ba ba diegang bobe mo bojalweng jwa mofine; ke ba ba lebalebang bojalwa jo bo tlhakantsweng.

31O se ka wa leba bojalwa jwa mofine fa bo hubila, fa bo tsenya phafana mmala wa jone, fa bo tsekeela sentle.

32Kwa bofelong bo tle bo lome jaaka noga, bo lome jaaka šaušawane.

33Matlho a gago a tlaa bona dilo di sela fela, le pelo ya gago e tlaa bua dilo tse di lesoko.

34Ee, o tlaa nna jaaka yo o robalang mo gare ga lewatle, kgotsa yaaka yo o robalang mo godimo ga pinagare ya mokoro.

35O tlaa re: “Ba ntiteile, mme ga ke a ka ka utlwa botlhoko; ba mpeditse, mme ga ke a ka ka go utlwa; ke tlaa kubuga leng? Ke tlaa ba ke bo batla gape.”

← Chapter 22 Jump to: Chapter 24 →