Proverbs 30

Tswana (BAEBELE e e Boitshepo) 1992

← Chapter 29 Jump to: Chapter 31 →

1Mafoko a ga Agure morwa Jake: polelo ya boitseanape. Monna a raya Ithiele, Ithiele le Ukale,

2a re: “Ruri nna ke lesilo bogolo go batho botlhe, ke bile ke se na tlhaloganyo ya motho,

3ga ke a ithuta botlhale, le gone ga ke na kitso ya go itse Moitshepi.”

4E mang yo o tlhatlogetseng legodimong, a ba a fologa? E mang yo o huparetseng diphefo mo matsweleng a gagwe? E mang yo o bofeletseng metsi mo seaparong sa gagwe? E mang yo o tlhomamisitseng dikhutolo tsotlhe tsa lefatshe? E mang leina la gagwe, le leina la ga morwawe e mang fa o itse?

5Lefoko lengwe le lengwe la Modimo le lekilwe; one, ke thebe ya ba ba o ikanyang.

6O se ka wa oketsa mafoko a one, o ka tla wa go kgalemela, mme wa fitlhelwa o le moaki.

7Ke go lopile dilo di le pedi; o se ka wa di ntatolela ke ise ke swe; ka re,

8boithamako le maaka o di beye kgakala le nna; o se ka wa nnaya khumanego le fa e le khumo; nkotla ka dijo tse di ntekanyeng;

9nka tla ka kgora, mme ka go itatola, ka re: “Jehofa e mang?” Kgotsa fa ke humanegile nka tla ka utswa, mme ka dira leina la Modimo wa me matlhapa.

10O se ka wa seba motlhanka kwa go mong wa gagwe, o ka tla a go roga, mme wa nna molato.

11Go na le losika lwa batho ba ba rogang borraabo, mme ba sa segofatse bommaabo.

12Go na le losika lwa batho ba ba iponang boitsheko, le fa go ntse jalo ba sa tlhapisiwa maswe a bone.

13Go na le losika lwa batho, ana matlho a bone a kalegile jang, le dintshi tsa matlho a bone di tsholetsegile jang!

14Go na le losika lwa batho ba meno a bone a ntseng jaaka ditšhaka, le ba meno a ditlhaya tsa bone a ntseng jaaka dithipa tsa go ja bahumanegi go ba tlosa mo lefatsheng, le batlhoki gore ba tswe mo bathong.

15Monopi o na le bana ba basetsana ba le babedi, ba ba goang, ba re: “Naya, naya.” Go na le dilo di le tharo tse di sa kgoreng gope. Ee, dilo di le nne tse di se keng di re: “Go lekanye:”

16Phupu; le sebopelo sa boopa; lefatshe le le sa kgoreng metsi; le molelo o o se keng o re: “Go lekanye.”

17Leitlho la motho yo o sotlang rraagwe, le la yo o nyatsang go utlwa mmaagwe, mahukubu a molapo a tlaa le gonya, le manonyana a tlaa le ja.

18Go dilo di le tharo tse di gakgamatsang bobe mo go nna, ee, go di le nne tse ke sa di itseng:

19Tsela ya ntswi yo motona mo loaping; tsela ya noga mo lefikeng; tsela ya sekepe mo gare ga lewatle; le tsela ya monna a na le morweetsana.

20Tsela ya mosadi wa seaka e ntse jalo; o tle a je, mme a iphimole molomo a re: “Ga ke a dira boikepo bope.”

21Lefatshe le roromisiwa ke dilo di le tharo, le ke di le nne, tse le retelelwang ke go di belega:

22Ke motlhanka fa a le kgosi; le yo o logaba fa a kgotshe dijo;

23ke mosadi yo o maswe fa a nyetswe; le lelata le e leng mojaboswa wa mohumagadi wa lone.

24Go dilo di le nne tse di leng dipotlana mo lefatsheng, mme di botlhale jo bo feteletseng.

25Ditshoswane ke tšhaba e e seng thata, le fa go ntse jalo di tle di baakanye dijo tsa tsone selemo.

26Dipela ke dilo tse di bokoa, le fa go ntse jalo di tle di age matlo a tsone mo meoleng ya mafika.

27Tsie ga e na kgosi, le fa go ntse jalo e tle e tswelele yotlhe ka masomo.

28Ntseane o tshwara ka diatla, le fa go ntse jalo o tle a nne mo matlong a dikgosi.

29Go dilo di le tharo tse di motsamao o gwantang, ee, di le nne tse di gwantang mo go tsamayeng ga tsone:

30Tau, e e leng yone e thata bogolo mo dibataneng, mme e sa itse go thibogela sepe;

31le ntša ya phefo; le phoko; le kgosi e e se nang ope yo o ka e tsogelang go tlhabana nayo.

32Fa o dirile bosilo ka go ikokomatsa, kgotsa fa o gopotse bosula, ipeye seatla mo molomong.

33Gonne go itaanngwa ga maši go tle go ntshe serethe, le go sokwa ga nko go tle go ntshe madi, le go tlhotlhelediwa ga bogale go tle go tsose ntwa.

← Chapter 29 Jump to: Chapter 31 →