Proverbs 5

Tswana (BAEBELE e e Boitshepo) 1992

← Chapter 4 Jump to: Chapter 6 →

1Morwaaka, tlhokomela botlhale jwa me; sekegela tlhaloganyo ya me tsebe,

2gore o tle o boloke pharologanyo, le gore dipounama tsa gago di tshegetse kitso.

3Gonne dipounama tsa mosadi o sele di rotha sedinotshe, magalapa a gagwe a boleta bogolo go lookwane.

4Mme bokhutlo jwa gagwe bo botlhoko jaaka longana, bo bogale jaaka tšhaka e e magale mabedi.

5Dinao tsa gagwe di fologela mo losong; dikgato tsa gagwe di ya go tshwara Bobipo.

6Jalo wa bo a sa wele tselana e e papannweng ya botshelo; ditsela tsa gagwe di raraanye, mme a ba a sa go itse.

7Mme jaana bomorwaaka, ka re, Ntheetsang, mme lo se ka lwa tlogela mafoko a molomo wa me.

8Katosetsa tsela ya gago kgakala nae, o se ka wa atamela mojako wa ntlo ya gagwe,

9o ka tla wa naya ba sele tlotlo ya gago, le dinyaga tsa gago wa di abela tse di bolalome.

10Ba sele ba ka tla ba kgora nonofo ya gago; le matsapa a gago a nna mo ntlong ya motho wa seeng;

11mme wa lela mo bokhutlong jwa gago, motlhang nama ya gago e tlhoregang, le mmele wa gago,

12wa re: “A bo nkile ka ila thuto, pelo ya me ya nyatsa jang kgalemelo;

13le gone ga ke a utlwa lentswe la baruti ba me, le fa e le go sekegela ba ba nthutileng tsebe!

14Ka batla go nna mo bosuleng jotlhe, mo gare ga phuthego le kokoano ya batho.”

15Nwa metsi mo sedibeletsong se e leng sa gago, le metsi a a elang mo motsweding o e leng wa gago.

16A metswedi ya gago e tshwanetse go tšheamela koo kwa ntle, le dinoka tsa metsi go ya le mebila fela?

17A e nne tsa gago o le wesi, mme e seng tsa ba sele nao.

18A motswedi wa gago o nne sego; mme o itumele mo mosading wa bokau jwa gago.

19Jaaka tshephe e namagadi e e lorato, le jaaka lefele le le namagadi le le natefang, a mabele a gagwe a go thethebatse ka metlha yotlhe, o nne o tlhapelwe ke lorato lwa gagwe ka metlha yotlhe.

20Kana morwaaka, o ka bo o ratelang go tlhapelwa ke mosadi yo o leng o sele, wa tlamparela sehuba sa mosadi wa seeng?

21Gonne ditsela tsa motho di fa pele ga matlho a ga Jehofa, mme o lekalekanya ditselana tsotlhe tsa gagwe.

22Moikepi o tlaa tshwarwa ke maikepo a gagwe tota, mme o tlaa tshegediwa ke megala ya boleo jwa gagwe.

23O tlaa swa ka go tlhoka thuto; mme mo bogolong jwa bosilo jwa gagwe o tlaa timela.

← Chapter 4 Jump to: Chapter 6 →