Proverbs 14

Tswana (BAEBELE e e Boitshepo) 1992

← Chapter 13 Jump to: Chapter 15 →

1Mosadi mongwe le mongwe yo o tlhalefileng o aga ntlo ya gagwe, mme yo o seeleele o e rutlolola ka diatla tsa gagwe.

2Yo o sepelang mo tshiamong ya gagwe o boifa Jehofa, mme yo o logwadi mo tseleng tsa gagwe o a mo nyatsa.

3Mo molomong wa dieleele go na le thupa e e betsang boikgodiso, mme dipounama tsa ba ba tlhalefileng di tlaa ba boloka.

4Kwa go se nang dikgomo gone, lesaka le tle le nne phepa fela, mme go nne totafalo e kgolo ka thata ya kgomo.

5Mosupi wa boikanngo ga a ke a aka, mme mosupi wa tsietso o bilola maaka fela.

6Mosotli o batla botlhale, mme ga a bo bone, mme kitso e bofefo mo go ene yo o nang le tlhaloganyo.

7Tsena fa pele ga motho yo o seeleele, mme ga o ketla o lemoga mo go ene dipounama tsa kitso.

8Botlhale jwa senokopela ke go tlhaloganya tsela ya sone, mme boeleele jwa dieleele ke tsietso.

9Masilo a sotla ka boleo, mme mo bathokgaming go na le pelontle.

10Pelo e ikitse bogalaka jwa yone, mme moeng ga a ke a itlhakanya le boitumelo jwa yone.

11Ntlo ya moikepi e tlaa ribegediwa, mme mogope wa mothokgami o tlaa kgaba.

12Go na le tsela e eketeng e siame mo mothong, mme bokhutlo jwa yone ke ditsela tsa loso.

13Le mo setshegong pelo e tle e nne bohutsana, mme bokhutlo jwa tlhapelo ke mahumapelo.

14Motenegi mo pelong o tlaa kgora ditsela tsa gagwe ka esi, le motho yo o molemo o tlaa ikgorisa ka esi.

15Motho yo o sa tlhalefang o dumela lefoko lengwe le lengwe, mme senokopela se tle se itebe tsamao ya sone sentle.

16Motho yo o botlhale o a boifa, mme a kgaogane le bosula, mme seeleele se dira ka makgakga, mme se ikgantshe.

17Yo o bonako go galefa o tle a dire ka boeleele, le motho yo o maano a boikepo o a ilwa.

18Ba ba sa tlhalefang ba ja boeleele boswa, mme ba ba bonokopela ba rwesiwa kitso mo tlhogong.

19Ba ba bosula ba tle ba iname fa pele ga ba ba molemo, le baikepi fa dikgorong tsa basiami.

20Mohumanegi o ilwa le ke wa ga gabo, mme mohumi o na le ditsala di le dintsi.

21Yo o nyatsang wa ga gabo o a leofa, mme yo o tlhomogelang mohumanegi pelo go sego ene.

22A ga ba timele ba ba logang bosula? Mme go tlaa nna boutlwelobotlhoko le boammaaruri kwa go ba ba logang molemo.

23Mo tirong yotlhe go na le thuso; mme palabalo ya dipounama e isa fela mo khumanegong.

24Serwalo sa tlhogo sa ba ba botlhale ke dikhumo tsa bone, mme boeleele jwa dieleele ke boeleele fela.

25Mosupi wa ammaaruri o golola mewa ya batho, mme yo o bilolang maaka o tsosa tsietso.

26Mo go boifeng Jehofa go na le boikanyo jo bo thata, mme bana ba gagwe ba tlaa dirana le botshabelo.

27Go boifa Jehofa ke motswedi wa botshelo, ke go tlogela diru tsa loso.

28Kgalalelo ya kgosi ke go dirana le bontsi jwa batho; mme tshenyego ya kgosana ke go tlhoka batho.

29Ene yo o bonya ga galefa o na le tlhaloganyo e kgolo, mme yo o mowa o potlakang o godisa bosilo.

30Pelo e e thethebetseng fela ke botshelo jwa nama, mme bopelotshetlha ke podiso ya marapo.

31Yo o patikang mohumanegi o kgoba Mmopi wa gagwe, mme yo o tlhomogelang motlhoki pelo o a mo tlotla.

32Moikepi o tlobelelwa mo go direng bosula ga gagwe, mme mosiami o na le tsholofelo mo losong lwa gagwe.

33Botlhale bo ikhutsa mo pelong ya yo o nang le tlhaloganyo, mme se se mo botengnyeng jwa dieleele se a utlwadiwa.

34Tshiamo e goletsa morafe, mme boleo ke kgobo mo tšhabeng nngwe le nngwe.

35Natefo ya kgosi e lebanye le motlhanka yo o dirang ka botlhale, mme bogale jwa yone bo tukele ene yo o tlhabisang ditlhong.

← Chapter 13 Jump to: Chapter 15 →