Proverbs 22

Tswana (BAEBELE e e Boitshepo) 1992

← Chapter 21 Jump to: Chapter 23 →

1Leina le le molemo le tshwanetse go itshenkelwa bogolo go dikhumo tse dikgolo, le botsalano jwa lorato bogolo go selefera le gouta.

2Bahumi le bahumanegi ba a kopana, Jehofa ke modiri wa bone botlhe.

3Motho yo o bonokopela a bona bosula mme a iphitlhe, mme ba ba sa tlhalefang ba fete fela, mme ba utlwe botlhoko ka gone.

4Tuelo ya boingotlo le go boifa Jehofa ke khumo le letlotlo le botshelo.

5Mitlwa le diru di mo tseleng ya ba ba lesoko; yo o itibelang mowa o tlaa nna kgakala nabo.

6Godisetsa ngwana ka thuto mo tseleng e o tshwanetseng go e tsamaya, mme o tlaa re le fa a tsofetse ga a ketla a kgaogana nayo.

7Mohumi o laola mohumanegi, le moadimi ke motlhanka wa yo go adingwang mo go ene.

8Yo o jalang boikepo o tlaa roba tshenyegelo, le thupa ya gagwe ya tšhakgalo e tlaa tlhaela go betsa.

9Yo o leitlho le lebang ka molemo o tlaa segofadiwa, gonne o tle a phumusetse mohumanegi dijo tsa gagwe.

10Lelekela mosotli kwa ntle, mme komang le yone e tlaa tswa, ee, kgang e tlaa khutla le nyatsego.

11Yo o ratang boitsheko jwa pelo, kgosi e tlaa nna tsala ya gagwe ka ntlha ya bontlafalo jwa molomo wa gagwe.

12Matlho a ga Jehofa a boloka ene yo o nang le kitso, mme o pitikolola mafoko a motho yo o bonongwane.

13Serorobe se a tle se re: “Go na le tau ka fa ntle, ke tlaa bolawa mo mebileng.”

14Molomo wa mosadi wa seeng fela ke molete o o boteng; yo Jehofa o mo ilang o tlaa wela mo go one.

15Boeleele bo bofeletswe mo pelong ya ngwanyana, mme thupa ya kwatlhao e tlaa bo lelekela kgakala mo go ene.

16Yo o patikang mohumanegi go ikokotleletsa, le yo o abelang mohumi, o tlaa fitlha mo go tlhokeng fela.

17Sekega tsebe, o utlwe mafoko a ba ba botlhale, mme o tsepege pelo ya gago mo kitsong ya me.

18Gonne ke selo se se natefang fa o di boloka mo teng ga gago, fa di tlhomama mmogo mo dipounameng tsa gago.

19Ke di go itsisitse gompieno, e bong wena, gore boikanyo jwa gago bo nne mo go Jehofa.

20A ga ke a go kwalela dilo tse di molemo thata tsa dikgakololo le kitso;

21go go itsise bonnete jwa mafoko a boammaaruri, gore o tle o busetse mafoko a boammaaruri kwa go bone ba ba go romang?

22O se ka wa thukhutha mohumanegi, ka gobo e le mohumanegi, le gone o se ka wa re o le kwa kgotleng wa bogisa yo o patikegang.

23Gonne Jehofa o tlaa ba ganelela, o tlaa thopa botshelo jwa bone ba ba ba thopang.

24O se ka wa itsalanya le motho yo o tlwaetseng go nna bogale; o bo o se ka wa tsamaya le motho yo o šakgalang thata;

25o ka tla wa ithuta mekgwa ya gagwe, mme wa bonela mowa wa gago seru.

26O se ka wa nna mongwe wa ba ba opanang diatla, le fa e le wa bone ba e leng baemedi ba melato.

27E tlaa re fa o se na se o ka duelang ka sone, o ka bo a tlosetsang bolao jwa gago tlase ga gago?

28O se ka wa tlosa molelwane wa bogologolo, o borraeno ba o tlhomileng.

29A o bona monna yo o bobebe mo tirong ya gagwe? Ene o tlaa ema fa pele ga dikgosi; ga a ketla a ema fa pele ga batho ba ba sa itsegeng.

← Chapter 21 Jump to: Chapter 23 →