Proverbs 2

Tswana (BAEBELE e e Boitshepo) 1992

← Chapter 1 Jump to: Chapter 3 →

1Morwaaka, fa o ka tshola mafoko a me, wa ba wa ipeela ditaolo tsa me fa go wena,

2wa sekegela botlhale tsebe, mme wa lebisa pelo ya gago kwa tlhaloganyong;

3ee, fa o tlhaeletsa tlhalemaleje, mme wa tsholeletsa tlhaloganyo lentswe la gago;

4fa o mmatla jaaka e ka bo e le selefera, fa o mo hukuletsa jaaka e kabo e le dikhumo tse di subegileng;

5foo o tlaa tlhaloganya go boifa Jehofa, mme o tlaa bona kitso ya Modimo.

6Gonne Jehofa o aba botlhale; kitso e tswa mo molomong wa gagwe, le tlhaloganyo.

7O beela bathokgami botlhale jo bo itekanetseng, ke ene thebe kwa go ba ba tsamayang ka boitekanelo,

8gore a femele ditselana tsa katlholo, a dibele tsela ya baitshepi ba gagwe.

9Foo o tlaa tlhaloganya tshiamo le katlholo, le tekatekanyo, ee, tselana nngwe le nngwe e e molemo.

10Gonne botlhale bo tlaa go tsena mo pelong, le kitso e tlaa nna monate mo moweng wa gago;

11tlhalemaleje e tlaa go tlhodumela, tlhaloganyo e tlaa go boloka,

12go go golola mo tseleng ya bosula, mo banneng ba ba buang dilo tsa lesoko,

13ba ba tlogelang ditsela tsa thokgamo, gore ba tsamaye mo ditseleng tsa lefifi;

14ba ba itumelang go dira bosula, ba ipela mo lesokong la bosula.

15Ba ba kgopo mo ditseleng tsa bone, ba logwadi mo ditselaneng tsa bone.

16Go go golola mo mosading yo o leng o sele, e bong mo mosading yo o leng o sele yo o rethefatsang mafoko a gagwe;

17yo o latlhang tsala ya bokau jwa gagwe, a lebale kgolagano ya Modimo wa gagwe;

18gonne ntlo ya gagwe e ganelela kwa losong, le ditselana tsa gagwe kwa baswing.

19Mo go ba ba yang kwa go ene, ga go ope yo o bowang, le gone ga ba ke ba ye go wela ditselana tsa botshelo.

20Gore o tle o tsamaye mo tseleng ya batho ba ba molemo, o tatamale fela le ditselana tsa basiami,

21gonne bathokgami ba tlaa aga mo lefatsheng, le baitekanedi ba tlaa sala ba ntse ruri mo go lone.

22Baikepi ba tlaa kgaolwa ba tlosiwa mo lefatsheng, le ba ba dirang ka bonongwana ba tlaa khumolwa mo go lone.

← Chapter 1 Jump to: Chapter 3 →