Proverbs 3

Tswana (BAEBELE e e Boitshepo) 1992

← Chapter 2 Jump to: Chapter 4 →

1Morwaaka, o se ka wa lebala molao wa me; mme a pelo ya gago e tshegetse ditaolo tsa me,

2gonne di tlaa go okeletsa boleele jwa malatsi, le dinyaga tsa botshelo, le kagiso.

3A boutlwelobotlhoko bo se go tlogele le boammaaruri; o di bofelele mo thamong ya gago; o di kwale mo sekwalelong sa pelo ya gago;

4jalo o tlaa bona botsalano le tlotlego mo ponong ya Modimo le ya motho.

5O ikanye Jehofa ka pelo yotlhe ya gago, o se ka wa ikaega tlhaloganyo ya gago fela.

6Mo ditseleng tsotlhe tsa gago o ipolele ene, mme o tlaa siamisa ditselana tsa gago.

7O se ka wa nna botlhale mo matlhong a gago; boifa Jehofa, o bo o kgaogane le bosula.

8E tlaa nna phodiso mo khubung ya gago, le moko mo marapong a gago.

9Tlotla Jehofa ka thoto ya gago, le ka tsa ntlha tsa totafalelo yotlhe ya gago.

10Jalo mabolokelo a gago a tlaa tlala letlotlo, le dithatholelo tsa gago di tlaa penologa bojalwa jo boša.

11Morwaaka, o se ka wa nyatsa kwatlhao ya ga Jehofa; le gone o se ka wa lapisiwa ke kgalemo ya gagwe;

12gonne yo Jehofa o mo ratang o tle a mo kgalemele; fela jaaka rra motho a tle a kgalemele morwawe yo o mo natefelang.

13Go tlhogonolo motho yo o bonang botlhale, le motho yo o bapalang tlhaloganyo.

14Gonne tlhwatlhwa ya yone e gaisa tlhwatlhwa ya selefera, le papadi ya lone e gaisa papadi ya gouta e e itshekileng.

15O tlhokega bogolo go diperela; mme mo dilong tsotlhe tse o ka di eletsang ga go na sepe se se ka tshwantshiwang nae.

16Boleele jwa malatsi bo mo seatleng sa gagwe se se siameng; mo seatleng sa gagwe sa molema go dikhumo le tlotlo.

17Ditsela tsa gagwe ke ditsela tsa monate, le ditselana tsa gagwe tsotlhe ke kagiso.

18O setlhare sa botshelo mo go ba ba mo tshwarang; go tlhogonolo mongwe le mongwe yo o mo itshadisetsang.

19Jehofa o thaile lefatshe ka botlhale; a tlhomamisa magodimo ka tlhaloganyo.

20Mateng a ne a phunyakwa ka kitso ya gagwe, mme loapi lo rotha monyo.

21Morwaaka, a di se tloge mo matlhong a gago; o tshware botlhale jo bo itekanetseng le pharologanyo.

22Jalo di tlaa nna botshelo mo moweng wa gago, le bontle mo thamong ya gago.

23Foo o tlaa tsamaya mo tseleng ya gago ka thagamo, le lonao lwa gago ga lo ketla lo kgotswa.

24E tlaa re o rapama ga o ketla o boifa; ee, o tlaa rapama fela, mme boroko jwa gago bo tlaa nna monate.

25O se ka wa boifa poifo e e tshoganetsang, le fa e le go swafadiwa ga baikepi motlhang go tlang;

26gonne Jehofa o tlaa nna boikanngo jwa gago, o tlaa boloka lonao lwa gago, gore lo se ka lwa tshwarwa.

27Ba ba tshwanetsweng ke go direlwa molemo, o se ka wa gana ka one, fa go le mo thateng ya seatla sa gago go o dira.

28O se ka wa raya wa gaeno wa re: “Tsamaya, o bo o tle gape, ka moso ke tlaa go naya;” le mororo selo o na naso.

29O se ka wa logela wa gaeno maano a a bosula, e tswa a agile fa go wena ka thagamo.

30O se ka wa lwela le motho lefela, fa a sa go direla molato ope.

31O se ka wa rata wa bo o ka nna jaaka motho wa sesenyi, o bo o se ka wa itshenkela ditsela dipe tsa gagwe.

32Gonne yo o logwadi ke mofedisa pelo mo go Jehofa; leoma la gagwe le na le yo o thokgameng.

33Phutso ya ga Jehofa e mo ntlong ya moikepi; mme o segofatsa boago jwa mosiami.

34Ruri o sotla basotli, mme o naya bakgobaladi bontlafalo.

35Ba ba botlhale ba tlaa rua kgalalelo; mme dieleele di tlaa godisediwa ditlhonnyeng.

← Chapter 2 Jump to: Chapter 4 →