Genesis 17

Amharic Tigrinya 2011

← Chapter 16 Jump to: Chapter 18 →

1ኣብራም ወዲ ተስዓን ተሽዓትን ዓመት ምስ ኮነ፡ እግዚኣብሄር ተራእዮ፡ ኣነ እቲ ኹሉ ዝኽእል ኣምላኽ እየ፡ ኣብ ቅድመይ ተማላለስ፡ ፍጹም ክኣ ኩን።

2ኪዳነይ ኣብ መንጎይን ኣብ መንጎኻን ኬቕውም እየ፡ ኣዝየውን ከብዝሓካ እየ፡ ድማ በሎ።

3ኣብራም ከኣ ብገጹ ተደፍኤ፡ ኣምላኽ ድማ ከምዚ ኢሉ ተዛረቦ፡

4እንሆ ኣነስ ኪዳነይ ምሳኻ እዩ፡ ንስኻ ኣቦ ብዙሓት ህዝብታት ክትከውን ኢኻ።

5ኣቦ ብዙሓት ህዝብታት ገየረካ እየ እሞ፡ ኣብርሃም ደኣ እምበር፡ ደጊም ስምካ ኣብራም ኣይጸዋዕ፡

6ኣዝየ ኽፍርየካ እየ፡ ህዝብታት ከም እትኸውን ድማ ክገብረካ እየ፡ ነገስታትውን ካባኻ ኪወጹ እዮም።

7ኣነ ኣብ መንጎይን ኣብ መንጎኻን ኣብ መንጎ ዘርእኻን፡ ብድሕሬኻ ድማ ኣብ ወለዶኦም ኪዳነይ ከቕውም እየ። ኣነ ንኣኻን ንድሕሬኻ ድማ ንዘርእኻን ኣምላኽ ከም ዝኾንኩ፡ እዚ ኣብ ናይ ዘለኣለም ኪዳን እዩ።

8እዛ ምድሪ ስደትካ፡ ኩላ ምድሪ ኸነኣን፡ ንኣኻን ብድሕሬኻ ድማ ንዘርእኻን ንርስቲ ዘለኣለም ክህብ እየ። ኣምላኾም ከኣ ክኸውን እየ።

9ኣምላኽ ድማ ንኣብርሃም በሎ ንስኻ ኽኣ ኪዳነይ ክትሕሉ ኢኻ፡ ንስኻን ብድሕሬኻውን ዘርእኻ ኣብ ወልደኦም ትሕልው።

10እቲ ኣብ መንጎይን ኣብ መንጎኽን ብድሕሬኻ ድማ ኣብ ዘርእኻ ዝለኦ እሞ ንስኻትኩም እትሕልውዎ ኺዳን እዚ እዩ፡ ኣባኻትኩም ተባዕታይ ዝበአለ ኹሉ ይገዘር።

11ስጋ ዕሎኹም ግዘሩ፡ እዚ ድማ ነቲ ኣብ መንጎይን መንጎኹምን ዘሎ ኺዳን ምልክት ኪኸውን እዩ።

12ኣባኻትኩም ወዲ ሾሞንተ መዓልቲ ተባዕታይ ዘበለ ኹሉ፡ ኣብ ወለዶኹም፡ ኣብ ቤት እትወልደን ካብ ማንም፡ ካብ ዘርእኻ ዘይኮነ ወዲ ጓና ብገንዘብ እተዐደገን፡ ይገዘር።

13ኣብ ቤትካ እተወልደን ብገንዘካ እተዐደገን ብግዲ ይገዘር። ኪዳነይ ኣብ ስጋኹም ኪዳን ዘለኣለም ኪኸውን እዩ።

14ዘይተገዝረ ተባዕታይ፡ ስጋ ዕልቦኡ ዘይተገዝረ፡ እታ ነፍሲ እቲኣ ኺዳነት ኣፍሪሳ እያ እሞ፡ ካብ ህዝባ ኽትምንቆስ እያ።

15ኣምላኽ ድማ ንኣብርሃም ንሰብይትኻ ሳራይ ስማ ሳራ ድኣ እዩ እምበር፡ ስማ ሳራይ ኢልካ ኣይትጸውዓያ።

16ክባርኻ እየ፡ ካብኣ ድማ ወዲ ኽህበካ እየ፡ ህዝብታት ከኣ ክትከውን እየ፡ ነገስታት ህዝብታት እኳ ደኣ ኻብኣ ኪኾኑ እዮም፡ በሎ።

17ሽዑ ኣብርሃም ብገጹ ተደፍኤ፡ ስሒቑ ድማ ብልቡ፡ ንወዲ ሚእቲ ዓመትዶ ወዲ ይውለደሉ፡ ሳራ ጓል ተስዓ ዓመትከ ትወልድዶ፡ በላ።

18ኣብርሃም ድማ ንኣምላኽ፡ እስማዔል ግዳ ኣብ ቅድሜኻ እንተ ዚነብር በሎ።

19ኣምላኽ ከኣ በለ፡ ኣይፋልን፡ ስበይትኻ ሳራ ደኣ ወዲ ኽትወልደልካ እዩ ስሙ ድማ ይስሃቅ ከተውጽኣሉ ኢኻ። ኪዳነይ ዘለኣለም ከቕውም እየ።

20ብዛዕባ እምሳዔል ድማ ጸሎትካ ሰሚዔ ኣሎኹ። እንሆ ባሪኸዮ ኣለኹ፡ ከፍርዮን ኣዝዩ ኽኣ ከብዝሖን እየ። ዓሰርተው ክልተ ሹም ኪወልድ እዩ። ዓብዩ ህዝቢ ድማ ኪገብሮ እየ።

21ግናኸ ምስቲ፡ ሳራ ንዓመታ ኸምዛ ግዜ እዚኣ እትወልደልካ፡ ይስሃቅ ኪዳነይ ከቕውም እየ።

22ምስኡ ምዝራብ ምስ ወድኤ ኽኣ፡ ኣምላኽ ካብ ኣብራህም ናብ ላዕሊ ደየበ።

23ኣብርሃም ድማ ንወዱ እስማዔል ነቶም ኣብ ቤቱ እተወልዱ ኹሎምን ብገንዘቡ እተዐደጉ ኹሎምን፡ ካብ ቤተሰብ ኣብርሃም ተባዕታይ ዘበለ ኹሉ ወሲዱ፡ ከምቲ ኣምላኽ ዝበሎ በታ መዓልቲ እቲኣ ዕልቦ ስጋኦም ገዘረ።

24ኣብርሃም ስጋ ዕልቦኡ ኺግዘር ከሎ ወድ ተስዓን ትሽዓተን ዓመት ኮይኑ ነበረ።

25ወዱ እስማዒል ድማ ስጋ ዕልቦኡ ኪግዘር ከሎ ወዲ ዓሰርተው ስለስተ ዓመት ኮይኑ ነበረ።

26በታ መዓልቲ እቲኣ ኣብርሃምን እስማዔልን ወዱን ተገዝሩ።

27ኣብ ቤቱ እተወልዱ ኹሎም ቤተሰቡን ካብ ደቂ ጓና ብገንዘብ እተደጉን ምስኡ ተገዝሩ።

← Chapter 16 Jump to: Chapter 18 →