Genesis 39

Amharic Tigrinya 2011

← Chapter 38 Jump to: Chapter 40 →

1ንዮሴፍ ከኣ ናብ ግብጺ ኣውረድዎ። ጲጢፋር፡ በዓል መዋእል ፈርኦን፡ ሓለቓ ዘብዔኛታት ዝነበረ ግብጻዊ ሰብኣይ ድማ ካብ ኢድ እቶም ናብኡ ዘውረድዎ እስማዔላውያን ተሻየጦ።

2እግዚኣብሄር ምስ ዮሴፍ ነበረ እሞ፡ ንሱ ዕዮኡ ዝቐንዓሉ ሰብኣይ ነበረ።

3ጎይትኡ ኸኣ እግዚኣብሄር ምስኡ ኸም ዘሎን ንሱ ዝገበሮ ኹሉ ድማ እግዚኣብሄር ኢብ ኢዱ ኸም ዝቕንዓሉን ረአየ።

4ዮሴፍ ከኣ ኣብ ቅድሚኡ ሞገስ ረኸበ፡ የገልግሎውን ነበረ። ኣዛዝ ቤቱ ገበሮ፡ ዘለዎ ኹሉ ኸኣ ኣብ ኢዱ ሀቦ።

5ኮነ ኽኣ፡ ኣብ ቤቱን ኣብ ኩሉ ጥሪቱን ካብ ዝሾሞ ጊዜ ጀሚሩ፡ እግዚኣብሄር ምእንቲ ዮሴፍ ኢሉ ንቤት እቲ ግብጻዊ ባረኻ። ኣብ ቤትን ኣብ መሮርን ኣብ ዝነበረ ኹሉ ጥሪቱ በረኸት እግዚኣብሄር ነበረ።

6ዘለዎ ኩሉ ኣብ ኢድ ዮሴፍ ኣሕሊፉ ሀቦ። ዝለዎ ዘበለ ድማ ፡ ብዘይ እታ ዝበልዓ እንጌራ ገለኳ ኣይፈለጠን። ዮሴፍ ከኣ መልከዔኛ ትርኢቱ ድማ ጽቡቕ ነበረ።

7ድሕርዚ ነገርዚ ኸኣ ኮነ፡ ንዮሴፍ ሰበይቲ ጎይትኡ ዓይና ኣውደቐትሉ እሞ። ምሳይ ደቅስ፡ በለቶ።

8ንሱ ድማ እናኣበየ፡ ንሰብይቱ ጎይትኡ፡ እንሆ ጐይታይ ኣብ ቤቱ ምሳይ እንታይ ከም ዘሎ ኣይፈልጥን እዩ፡ ዘለዎ ኹሉ ድማ ኣብ ኢደይ ሂቡኒ እዩ።

9ኣብዛ ቤት እዚኣ ኻባይ ዚስልጥን የልቦን፡ ስበይቱ ኢኺ እሞ ብጀካኽስ ገለኳ ኣይከልአንን። ከምይ ገይረኸ እዚ ዓብዩ ኽፍኣትን ኣብ ቅድሚ ኣምላኽ ከኣ ሓጢኣትን ክገብር እኽእል፡ በላ።

10ኮነ ድማ መዓልቲ ንመዓልቲ ንዮሴፍ እናተዛረበቶ ኽንሳ፡ ንሱ ምስኣ ኺድቅስ ወይስ ምስኣ ኺነብር ኣይሰምዓን።

11ኮነ ኽኣ ሓንቲ መዓልቲ ዕዮኡ ኺገብር ናብ ቤት ኣተወ፡ ኣብኣ ኣብታ ቤት ድማ ካብ ሰብ ቤት ገለ ሰብ ኣይነበረን።

12ብኽዳኑ ቀጥ ኣቢላ ሒዛ ድማ ምሳይ ደቅስ በለቶ። ንሱ ግና ክዳኑ ኣብ ኢዳ ሓደገላ፡ ሀዲሙ ኸኣ ንግዳም ወጸ።

13ንሳ ድማ ክዳኑ ኣብ ኢዳ ኸም ዝሕደገን ንግዳም ከኣ ከም ዝሀደመን ምስ ረኣየት፡

14ንስድራ ቤታ ጸዊዓ ርአዩ ኪሰሓቐልናስ እብራዊ ሰብኣይ ኣእትዮልና፡ ንሱ ምሳይ ኪድቅስ ናባይ ኣተወ፡ ኣነ ኽኣ ዓው ኢለ ኸም ኣእዌኹ።

15ኮነ ድማ ቃለይ ዓው ኣቢለ ኸም ዘእዌኹ ምስ ሰምዔ፡ ክዳኑ ሓዲጉለይ፡ ሀዲሙ ንግዳም ወጸ፡ ኢላ ተዘረበቶ።

16ነቲ ኽዳኑ ድማ፡ ጎይትኡ ናብ ቤቱ ኽሳዕ ዚመጽእ ምስኣ ኣንበረቶ።

17ከምዚ ኢላ ኸኣ እዚ ነገርዚ ነገረቶ፡ እቲ ዘምጻእካልና እብራዊ ባርያ ኺሰሐቕለይ ናባይ ኣተወ።

18ኮነ ድማ ቃለይ ዓው ኣቢለ ምስ ኣእዌኹ፡ ክዳኑ ሓዲጉለይ ንግዳም ሀደመ።

19ኮነ ኸኣ ጎይትኡ ኣታ ሰበይቱ፡ ባርያኻ ኸምዚ ነግርዚ ገብረኒ፡ ኢላ ዝነገረቶ ዘረባ ሰምዔ፡ ኩራኡ ነደደ።

20ጐይታ ዮሴፍ ድማ ወሲዱ ናብታ ቤት ማእሰርቲ፡ እቶም እሱራት ንጉስ ዚእሰሩላ ቦታ፡ ኣእተዎ። ኣብኣ ኸኣ ኣብ ቤት ማእሰርቲ ነበረ።

21እግዚኣብሄር ግና ምስ ዮሴፍ ነበረ፡ ምሕረት ድማ ገበረሉ፡ ኣብ ቅድሚ እቲ ሓለቓ ቤት ማእሰርቲ ኸኣ ሞጎስ ሀቦ።

22እቲ ሓለቓ ቤት ማእሰርቲ ድማ ኣብ ቤት ማእሰርቲ ዝነበሩ ኹሎም እሱራት ኣብ ኢድ ዮሴፍ ኣሕሊፉ ሀቦ። ኣብኡ ዝገበርዎ ዘበለ ኹሉ፡ ገባሪኡ ንሱ ነበረ።

23እግዚኣብሄር ምስኡ ስለ ዝነበረ፡ እቲ ሓለቓ ቤት ማእሰርቲ በቲ ኣብ ኢዱ ዝነበረ ብገለኳ ኣይሓልን ነበረ። ዝገብሮ ኹሉ ድማ እግዚኣብሄር የቕንዓሉ ነበረ።

← Chapter 38 Jump to: Chapter 40 →