1 Chronicles 14

Luganda (BIBU1) (BIBULIYA ENTUKUVU)

← Chapter 13 Jump to: Chapter 15 →

1Kiramu kabaka w'e Tiiro n'atuma ababaka ewa Dawudi ng'aweerezza emiti gy'entolookyo, n'abakugu mu kukomola amayinja, n'ababazzi, bazimbire Dawudi olubiri.

2Dawudi n'ategeera ng'Omukama amukakasizza ku bwakabaka bwa Yisirayeli, era ng'atutumudde obwakabaka bwe ku lw'abantu be Yisirayeli.

3Dawudi yawasaayo abakazi abalala mu Yeruzaalemu. Dawudi yazaala abaana ab'obulenzi n'ab'obuwala.

4Gano ge mannya g'abo ababe abaamuzaalirwa e Yeruzaalemu: Sammuwa, Sobabu, Natani ne Solomoni;

5Yibukari, Elisuwa ne Elupeleti;

6Noga, Nefegi, Yafiya,

7Elisama Beeliyada ne Elifeleti.

8Abafilisitiini bwe baawulira nti Dawudi bamusiize abeere kabaka wa Yisirayeli yenna, ne bambuka bonna bamunoonye. Dawudi bwe yawulira, n'avaayo abasisinkane.

9Abafilisitiini bwe bajja, ne balumba mu kiwonvu ky'e Refayimu.

10Dawudi ne yeebuuza ku Mukama nti: “Nnyambuke eri Abafilisitiini? Onoobampa mu mikono gyange?” Omukama n'agamba nti: “Yambuka, kubanga nzija kukuwa Abafilisitiini mu mikono gyo.”

11Dawudi ne basajja be n'ajja mu Baali-Perazimu n'abakubira eyo, n'agamba nti: “Ng'amazzi bwe gawaguza, n'Omukama bw'awaguzza mu balabe bange n'omukono gwange.” Ekifo ekyo kwe kuyitibwa Baali-Perazimu.

12Abafilisitiini baalekayo ebifaananyi bya balubaale baabwe, Dawudi n'alagira ne byokebwa mu muliro.

13Abafilisitiini era ne baddamu okulumba mu kiwonvu.

14Dawudi n'addamu okwebuuza ku Mukama, ye n'amwanukula nti: “Toyambuka, wabula beetooloole obalumbire mu maaso g'emiti gya balusaamu.

15Bw'onoowulira ebigere waggulu mu miti gya balusaamu, awo ng'ovaayo okulumba, kubanga Omukama ajja kubeera ng'akukulembeddemu okukuba eggye ly'Abafilisitiini.”

16Dawudi n'akola ng'Omukama bwe yali amulagidde, n'akuba eggye ly'Abafilisitiini okubaggya e Gibewoni okutuuka e Gezeri.

17Ettutumu lya Dawudi ne libuna mu buli nsi; Omukama n'aleetera amawanga okutya ennyo Dawudi.

← Chapter 13 Jump to: Chapter 15 →