1 Chronicles 23

Luganda (BIBU1) (BIBULIYA ENTUKUVU)

← Chapter 22 Jump to: Chapter 24 →

1Dawudi bwe yakaddiwa, ng'agundidde mu myaka, n'afuula mutabani we Solomoni kabaka wa Yisirayeli.

2Yakuŋŋaanya abakungu bonna mu Yisirayeli ne bakabona n'Abaleevi.

3Abaleevi abaali bawezezza emyaka amakumi asatu n'okusingawo ne babalibwa kinnoomu; baawera abasajja emitwalo esatu mu kanaana.

4Dawudi n'agamba nti: “Ku abo emitwalo ebiri mu enkumi nnya ba kuluŋŋamyanga omulimu ogw'okuweereza mu Kiggwa ky'Omukama, ate kakaaga ba kubeera baami na balamuzi;

5enkumi nnya ba kubeera baggazi, n'abalala enkumi nnya ba kuyimbiranga Mukama ku bivuga bye nakola okuyimbirako.”

6Dawudi n'abagabanya mu bitundu by'abatabani ba Leevi, kwe kugamba nti: Gerusoni, Kewati ne Merari.

7Batabani ba Gerusoni: Laadani ne Semeyi.

8Batabani ba Laadani: Yekiyeli omukulu waabwe, Zetamu ne Yoweli; be basatu.

9Batabani ba Simeyi: Selomiti, Kaziyeli ne Arani; be basatu; abo be bakulu b'ennyumba za Laadani eza bajjaajjaabe.

10Batabani ba Simeyi: Yakati, Zina, Yewusi ne Beriya; abo be batabani ba Simeyi, bali bana.

11Yakati ye yasooka, Ziza wa kubiri; bo Yewusi ne Beriya tebaalina batabani bangi, kye baava batwalibwa ng'ennyumba emu.

12Batabani ba Kewati: Amuramu, Yizuwari, Keburoni ne Wuzziyeli; be bana.

13Batabani ba Amuramu: Aroni ne Musa. Aroni, ye n'ezzadde lye, baayawulibwako emirembe gyonna baweerezenga ebitukuvu ennyo, batambirenga ebitambiro mu maaso g'Omukama, bamuweerezenga, era bawenga n'omukisa mu linnya lye ennaku zonna.

14Bo batabani ba Musa omusajja wa Katonda baabalirwa mu kika kya Leevi.

15Batabani ba Musa: Gerusomu ne Eliyezeri.

16Batabani ba Gerusomu: Subayeli, y'asooka.

17Batabani ba Eliyezeri: Rekabiya, y'asooka; Eliyezeri teyalina baana ba bulenzi balala, naye bo batabani ba Rekabiya baali bangi ekiyitiridde.

18Batabani ba Yizuwari: Selomiti, y'asooka.

19Batabani ba Keburoni: Yeriya y'asooka, Amariya wa kubiri, Yakaziyeli wa kusatu, Yekamewamu wa kuna.

20Batabani ba Wuzziyeli: Mika y'asooka, Yissiya wa kubiri.

21Batabani ba Merari: Makuli ne Musi. Batabani ba Makuli: Eleyazari ne Kisi;

22kyokka Eleyazari yafa nga talina baana ba bulenzi wabula ba buwala; Batabani ba Kisi, bannyinaabwe, ne babawasa.

23Batabani ba Musi: Makuli, Ederi ne Yeremoti; be basatu.

24Abo be bazzukulu ba Leevi mu nnyumba za bajjajjaabwe, abakulu b'ennyumba za bajjajjaabwe, abaawandiikibwa amannya gaabwe kinnoomu, buli omu okuva ku w'emyaka amakumi abiri n'okwambuka abaalina emirimu gy'okuweereza mu Kiggwa ky'Omukama.

25Dawudi yali agambye nti: “Omukama awadde abantu be Yisirayeli ekiwummulo, naye yennyini azze asule mu Yeruzaalemu emirembe gyonna.

26Awo nno Abaleevi tebakyetaaga kusitula Kisulo oba ebintu ebirala byonna ebidda ku mulimu gwakyo.

27Okusinziira ku biragiro bya Dawudi ebyasembera ddala, bazzukulu ba Leevi bonna okuva ku w'emyaka abiri n'okusingawo, baabalibwa.

28Omulimu gw'Abaleevi gwa kuyamba ku batabani ba Aroni mu kuweereza mu Kiggwa ky'Omukama: okulabirira empya, ebigango, okuyonja buli kintu ekitukuvu, n'okukola emirimu emirala gyonna mu Kiggwa kya Katonda.

29Ba kukolanga ku Migaati gy'Okwolesebwa, ku buwunga obw'ekitone eky'obuwunga, ku bugaati obw'oluwewere obutazimbulukuse, ku kufumba n'okugoya, ne ku bipimo byonna eby'obungi n'obunene.

30Ku makya ba kwebazanga era bagulumize Omukama, n'akawungeezi bakole kye kimu.

31Ate buli ku kuweereza Omukama ebitambiro ebyokye ku Sabbaato, ku mbaga y'Okuboneka kw'Omwezi, ne ku mbaga enkulu eziragiddwa, ba kuweerezanga awatali kuyosaamu nga bagoberera omuwendo gwabwe ng'etteeka bwe ligamba.

32Bwe babanga baweereza mu Kiggwa ky'Omukama, balabiriranga Weema ey'Ensisinkano, Ekifo Ekitukuvu ne baganda baabwe batabani ba Aroni.”

← Chapter 22 Jump to: Chapter 24 →