1 Chronicles 29

Luganda (BIBU1) (BIBULIYA ENTUKUVU)

← Chapter 28 Jump to:

1Awo Dawudi n'ayogera eri ekibiina kyonna nti: “Mutabani wange Solomoni Katonda gwe yalonda akyali muto, tannakakata; omulimu gwe munene, anti olubiri luno terutegekerwa muntu naye Mukama Katonda.

2Neeyamba byonna bye nnina ne ntegeka eby'okuzimbisa Ekiggwa kya Katonda wange: zaabu ow'okugendera ku bya zaabu, ffeeza ow'okugenda ku bya ffeeza, ekikomo eky'okukola eby'ekikomo, ekyuma eky'okukola eby'ekyuma, emiti ku lw'ebikolwa mu miti, amayinja oniki ag'okujjuzaamu, obuggyo obwa langi entobeke, amayinja gonna ag'omuwendo ne maabo.

3Okwongereza ku bino, olw'okwagala ennyo Ekiggwa kya Katonda wange, mpaddeyo ku bimu ku makula gange aga zaabu ne ffeeza bizimbe ekiggwa kya Katonda, nga tobaze byonna bye ntegese olw'ennyumba y'Ekitukuvu:

4talenta enkumi ssatu ku zaabu ow'e Ofiri, ne ffeeza omuyooyoote talenta kasanvu, ow'okumaala ku bisenge by'ebizimbe,

5ku lwa byonna ebyetaagisa zaabu ne ku lwa byonna ebyetaagisa ffeeza, eby'omulimu gwonna baffundi gwe banaakola. Ani yeewaddeyo kyeyagalire okwewongera Omukama olwa leero?”

6Abakulu b'ennyumba za bajjajjaabwe, abakulu b'ebika bya Yisirayeli, abagabe b'enkumi, abagabe b'ebikumi, n'abakungu abassibwa ku mirimu gya kabaka ne bawaayo kyeyagalire.

7Ku mulimu gw'Ekiggwa kya Katonda baawaayo zaabu wa talenta nkumi ttaano, n'omutwalo gwa dariki gumu ogwa zaabu, ffeeza wa talenta omutwalo gumu, ekikomo kya talenta omutwalo gumu mu kanaana, n'ekyuma kya talenta emitwalo kkumi.

8Buli yenna eyalina amayinja ag'omuwendo yagawaayo mu nkuluze y'Ekiggwa ky'Omukama, ne gakwasibwa Yakiyeli Omugerusoni.

9Abantu ne basanyuka olw'okulaba abakulembeze baabwe nga bwe bawaayo kyeyagalire, kubanga ebyo baali babiweerezza Omukama kyeyagalire, n'omutima ogwemalizza; ne kabaka Dawudi yennyini n'asanyuka bya kitalo.

10Dawudi n'agulumiza Omukama mu maaso g'abantu bonna, n'agamba nti: “Ogulumizibwe, Ayi Katonda wa kitaffe Yisirayeli, emirembe n'emirembe.

11Ayi Mukama, obukulu bubwo n'obuyinza, ekitiibwa, ettendo n'okutangalijja, anti byonna mu ggulu ne mu nsi bibyo. Obwakabaka bubwo, ayi Mukama, byonna obisooloobyeko ng'omutwe.

12Obugagga n'ekitiibwa bisibuka mu ggwe, ggwe ofuga byonna. Mu mikono gyo mwe muli amaanyi n'obuzira, gye giwa bonna obukulu n'amaanyi.

13Kale nno, ayi Katonda waffe, tukwebaza, tutenda erinnya lyo ery'ekitiibwa.

14“Nze ani, n'abantu bange be baani, okusobola okukuwa kyeyagalire bwe tuti? Byonna biva gy'oli, tukuwadde ebivudde mu mikono gyo.

15Mu maaso go tuli bagwira, basenze nga bajjajjaffe bonna bwe baali; ennaku zaffe ku nsi ziringa kisiikirize, omutali ssuubi.

16Ayi Mukama Katonda wange, ebintu bino byonna akafukunya bye tutegese okuzimbira erinnya lyo ettukuvu ekiggwa, byonna biva mu mikono gyo era byonna bibyo.

17Ayi Katonda wange, mmanyi nti ggwe owenja emitima, era osanyukira obutuufu; nange nno nkuweerezza bino byonna kyeyagalire n'omutima omuluŋŋamu. Ntunuulidde n'essanyu abantu bo bonna abali wano nga bakuwa kyeyagalire.

18Ayi Mukama Katonda wa bajjajjaffe Yiburayimu, Yizaake ne Yisirayeli, okwagala kuno kukuume mu mitima gyabwe emirembe gyonna, n'emitima gyabwe giwe okusigala nga gikugondera.

19Ne mutabani wange Solomoni muwe omutima ogwemalizza ku kukwatanga ebiragiro byo, empisa n'amateeka go; byonna abikole, azimbe olubiri lwe ntegekedde bino.”

20Awo Dawudi n'agamba abaali bakuŋŋaanye nti: “Mugulumize Omukama Katonda wammwe.” Bonna ne bagulumiza Omukama Katonda wa bajjajjaabwe; ne bakutama wansi, ne bavunnamira Katonda ne kabaka.

21Enkeera ne batambirira Omukama ebitambiro, ne bamuweereza ebitambiro ebyokye ku lwa Yisirayeli yenna: ente ennume lukumi, endiga lukumi, obuliga lukumi, wamu n'ebitone eby'okuyiwa, n'ebyonziira mu bungi.

22Ku olwo ne balya ne banywa mu maaso g'Omukama mu ssanyu eringi. Solomoni mutabani wa Dawudi ne bamufuula kabaka ogwokubiri, ne bamusiiga omuzigo mu maaso g'Omukama abeere omukulembeze ne Zadoki abeere kabona omukulu.

23Solomoni n'atuula ku nnamulondo y'Omukama abeere kabaka mu kifo kya Dawudi kitaawe. Ebintu byamulamira ne Yisirayeli yenna n'amuwulira.

24Abagabe bonna, n'abasajja abatabaazi ne batabani ba Dawudi bonna ne bamusuubiza obuwulize.

25Bw'atyo Omukama n'asukkulumya Solomoni mu maaso ga Yisirayeli yenna, n'amufuula kabaka ow'ekitiibwa ekingi, nga tewali kabaka wa Yisirayeli mu baamukulembera yali afunye kyenkana awo.

26Dawudi mutabani wa Yesse yali kabaka ku Yisirayeli yenna.

27Yafuga Yisirayeli okumala emyaka amakumi ana: mu Keburoni yafugiramu emyaka musanvu, ate mu Yeruzaalemu amakumi asatu mu esatu.

28Yafiira ku bukadde obulungi, ng'agundidde mu myaka, n'obugagga n'ekitiibwa; Solomoni mutabani we n'amusikira ku bwa kabaka.

29Eby'obulamu bwa Dawudi kabaka, bye yakola mu kusooka okutuusa ku nkomerero, byawandiikibwa mu kitabo ky'ebyafaayo ekya Samweli omulabi, ne mu kitabo ky'ebyafaayo ekya Natani omulanzi, ne mu kitabo ky'ebyafaayo ekya Gaadi omulabi,

30mw'osanga eby'obwakabaka bwe byonna n'obuzira bwe, n'ebyamutuukirira, ne ku Yisirayeli ne ku bwakabaka bw'ensi zonna endala.

← Chapter 28 Jump to: