1 Chronicles 18

Luganda (BIBU1) (BIBULIYA ENTUKUVU)

← Chapter 17 Jump to: Chapter 19 →

1Oluvannyuma, Dawudi yawangula Abafilisitiini n'abafufuggaliza ddala. N'aggya mu mikono gy'Abafilisitiini Gati n'ebyalo ebikyetoolodde.

2Yawangula Mowabu, Abamowabu ne bafuuka baweereza ba Dawudi ne bawa n'omusolo.

3Dawudi yalwanyisa ne Adadeezeri kabaka w'e Zoba, okutuuka e Kamati, lwe yali agenze okuzza mu mikono gye ensi y'oku mugga Furaati.

4Dawudi n'amuwambako ebigaali lukumi n'abeebagazi kasanvu, n'abatabaazi ab'ebigere emitwalo ebiri. Dawudi embalaasi zonna yazisala enteega, n'alekawo kikumi kyokka ez'ebigaali.

5Abaaramu b'e Damasiko bajja okudduukirira Adadeezeri kabaka w'e Zoba, Dawudi n'atta mu Baaramu abasajja emitwalo ebiri mu enkumi bbiri.

6Dawudi yassa enkambi z'abatabaazi mu Aramu ekya Damasiko; Abaaramu ne bafuuka baweereza be, ne bawa n'omusolo. Omukama yawanguzanga Dawudi yonna gye yagendanga.

7Dawudi yatwala engabo eza zaabu ezaalinga n'abagabe ba Adadeezeri, n'azireeta mu Yeruzaalemu.

8Era Dawudi kabaka n'aggya ekikomo kingi nnyo mu Tibukati ne mu Kuni, ebibuga bya Adadeezeri, Solomoni kye yeeyamba okukola Ennyanja ey'ekikomo, empagi n'ebikozesebwa ebirala eby'ekikomo.

9Towu kabaka w'e Kamati bwe yawulira nti Dawudi afufuggazza eggye lyonna erya Adadeezeri kabaka w'e Zoba,

10n'atuma mutabani we Adoramu ewa kabaka Dawudi, amulamuseeko era amukulise okulwanyisa Adadeezeri n'amuwangula, kubanga Adadeezeri yalinga alwanagana ne Towu. Adoramu n'atwala ebintu byonna ebya ffeeza, ebya zaabu n'eby'ekikomo.

11Nabyo kabaka Dawudi n'abisingira Omukama, okufaanana ne ffeeza ne zaabu bye yali aggye mu mawanga gonna: Edomu ne Mowabu, Abammoni, Abafilisitiini ne Amaleki.

12Ne Abisayi mutabani wa Zeruya yatta Abeedomu omutwalo gumu mu kanaana mu kiwonvu ky'Omunnyu.

13Yassa enkambi z'abatabaazi wonna mu Edomu, Abeedomu bonna ne bafuuka baweereza ba Dawudi. Omukama yawanguzanga Dawudi yonna gye yagendanga.

14Dawudi n'afuga Yisirayeli yonna; era Dawudi yakoleranga abantu be bonna ebikolwa eby'obutuufu n'obutuukirivu.

15Yowabu mutabani wa Zeruya nga y'aduumira eggye; Yosafati mutabani wa Akiludi nga y'akuuma ebyafaayo;

16Zadoki mutabani wa Akitubu ne Akimeleki mutabani wa Abiyatari nga be bakabona; Savusa nga ye muwandiisi;

17Benaaya mutabani wa Yoyada nga y'alabirira Abakereti n'Abapeleti; bo batabani ba Dawudi nga bakungu ku lusegere lwa kabaka.

← Chapter 17 Jump to: Chapter 19 →