1 Chronicles 24

Luganda (BIBU1) (BIBULIYA ENTUKUVU)

← Chapter 23 Jump to: Chapter 25 →

1Batabani ba Aroni baagabanyizibwamu bwe bati: Batabani ba Aroni: Nadabu, Abiwu, Eleyazari ne Yitamari.

2Nadabu ne Abiwu be baasooka kitaabwe okufa; tebaalina baana; Eleyazari ne Yitamari ne bakola nga bakabona.

3Dawudi n'abagabanyaamu ng'ayambibwako Zadoki omu ku batabani ba Eleyazari ne Akimeleki omu ku batabani ba Yitamari mu bisanja byabwe eby'okuweereza.

4Mu bazzukulu ba Eleyazari mwasangibwamu abakulu b'ennyumba za bajjajjaabwe bangi okusinga abaasangibwa mu bazzukulu ba Yitamari; Olwo aba Eleyazari ne bayawulwamu ennyumba za bajjajjaabwe kkumi na mukaaga, n'aba Yitamari ennyumba za bajjajjaabwe munaana.

5Ebisanja byabwe byaweebwa ku kalulu awatali kyekubiira, kubanga wombi mu batabani ba Eleyazari ne mu ba Yitamari mwavaamu abaweereza b'omu Kifo Ekitukuvu, n'abaweereza mu maaso g'Omukama.

6Semaaya omuwandiisi, mutabani wa Netaneli Omuleevi, yawandiika amannya gaabwe mu maaso ga kabaka n'ag'abakungu ne Zadoki kabona ne Akimeleki mutabani wa Abiyatari, n'ag'abakulu b'ennyumba za bakabona n'ez'Abaleevi eza bajjajjaabwe, ng'ennyumba emu eya bajjajjaabwe bw'eba eya Eleyazari, eddako eba ya Yitamari.

7Akalulu kaasooka kugwa ku Yowaribu, akookubiri ku Yedaaya,

8akookusatu ku Karimu, akookuna ku Seworimu,

9akookutaano ku Malukiya, akoomukaga ku Miiyamini,

10akoomusanvu ku Akkozi, akoomunaana ku Abiya,

11akoomwenda ku Yeswa, ak'ekkumi ku Sekaniya,

12ak'ekkumi n'akamu ku Eliyasibu, ak'ekkumi n'obubiri ku Yakimu,

13ak'ekkumi n'obusatu ku Kuppa, ak'ekkumi n'obuna ku Yesebewabu,

14ak'ekkumi n'obutaano ku Biluga, ak'ekkumi n'omukaaga ku Yimmeri,

15ak'ekkumi n'omusanvu ku Keziri, ak'ekkumi n'omunaana ku Appizzezi,

16ak'ekkumi n'omwenda ku Petakiya, ak'amakumi abiri ku Yekezukeli,

17ak'amakumi abiri mu akamu ku Yakini, ak'amakumi abiri mu obubiri ku Gamuli,

18ak'amakumi abiri mu obusatu ku Delaaya, ak'amakumi abiri mu obuna ku Maaziya.

19Bino bye bisanja byabwe eby'emirimu lwe baayingira mu Kiggwa ky'Omukama, nga bagoberera entereeza eyabaweebwa Aroni jjajjaabwe ng'Omukama Katonda wa Yisirayeli bwe yali amulagidde.

20Bo bazzukulu ba Leevi abaali basigaddewo: Mu batabani ba Amuramu: Subayeli; mu batabani ba Subayeli: Yekudeeya;

21mu batabani ba Rekabiya: omukulu Yissiya;

22mu Bayizuwari: Selomiti; mu batabani ba Selomiti: Yakati;

23mu batabani ba Keburoni: Yeriya y'asooka, Amariya wa kubiri, Yakaziyeli wa kusatu, Yekamewamu wa kuna;

24mu batabani ba Wuzziyeli: Mika; mu batabani ba Mika: Samuri;

25muganda wa Mika: Yissiya; mu batabani ba Yissiya: Zakariya;

26mu batabani ba Merari: Makuli ne Musi; mu batabani ba Yaaziya: Beno.

27Batabani ba Merari: mu Yaaziya: Beno, Sokamu, Zakkuri, Yiburi;

28mu Makuli: mutabani Eleyazari ataalina baana;

29mu Kisi: mutabani wa Kisi: Yerakumeeli.

30Batabani ba Musi: Makuli, Ederi ne Yerimoti. Beebo bazzukulu ba Leevi mu nnyumba za bajjajjaabwe.

31Nabo baakuba akalulu nga baganda baabwe bazzukulu ba Aroni bwe baakola mu maaso ga Dawudi kabaka ne Zadoki ne Akimeleki n'abakulu b'ennyumba za bakabona n'ez'Abaleevi eza bajjajjaabwe. Abakulu b'ennyumba za bajjajjaabwe ne bato baabwe bonna baakuba akalulu kyenkanyi.

← Chapter 23 Jump to: Chapter 25 →