1 Chronicles 19

Luganda (BIBU1) (BIBULIYA ENTUKUVU)

← Chapter 18 Jump to: Chapter 20 →

1Oluvannyuma, Nakasi kabaka w'Abammoni n'afa; mutabani we n'amusikira ku bwakabaka.

2Dawudi n'agamba nti: “Nzija kugirira ekisa Kanuni mutabani wa Nakasi kubanga kitaawe yangirira ekisa.” Awo Dawudi n'atumayo abaweereza be bamutuusize okukubagiza olw'okufiirwa kitaawe. Naye abaweereza ba Dawudi bwe bajja ewa Kanuni mu nsi y'Abammoni okumukubagiza,

3abakungu b'Abammoni ne bagamba Kanuni nti: “Olowooza Dawudi akutumidde ab'okukukubagiza lwa kussaamu kitaawo kitiibwa, nandiki Dawudi abaweereza abasindise gy'oli bekkaanye era bazikirize n'ensi bagikette?”

4Kanuni n'addira abaweereza ba Dawudi, buli omu n'amumwako ekirevu, n'engoye zaabwe n'azisalako ebitundu okukoma mu makkati ku butuuliro, n'abagoba bagende.

5Abantu ne bagenda ewa Dawudi, ne bamubuulira ebigudde ku baweereza be; Dawudi n'asindika ababaka ab'okubasisinkana; baali batoowaziddwa nnyo. Dawudi n'abalagira nti: “Musigale mu Yeriko, okutuusa ebirevu byammwe nga bimeze, awo mulyoke mukomewo.”

6Abammoni bwe baalaba nga beekyayisizza ewa Dawudi, Kanuni n'Abammoni ne baweereza talenta lukumi eza ffeeza okupangisa ebigaali n'abeebagazi okuva e Aramu Nakarayimu, Aramu-Maaka n'e Zoba.

7Ne bapangisa ebigaali emitwalo esatu mu enkumi bbiri, wamu ne kabaka w'e Maaka n'eggye lye lyonna. N'ajja n'asiisira kumpi ne Medeba. Abammoni bo ne bakunga abatabaazi okuva wonna mu bibuga byabwe, ne bajja mu lutalo.

8Dawudi bwe yakiwulira, n'asindika Yowabu n'eggye lyonna ery'abasajja ab'amaanyi.

9Abammoni ne bavaayo, ne bataza eggye mu maaso ga wankaaki w'ekibuga kyabwe. Bo bakabaka abajja okulwana ne basigala ku ttale bokka.

10Yowabu bwe yalaba nga beetegese okumulwanyisa nga bafuluma mu maaso n'emabega, n'alonda mu bonna abatabaazi abalondobe mu Yisirayeli, n'abategeka okulumba Abaaramu;

11ekitundu ky'abantu ekyasigalawo n'akiwa Abisayi muganda we n'abategeka okulumba Abammoni.

12Yowabu n'agamba nti: “Abaaramu bwe banansinza amaanyi, ononziruukirira; n'Abammoni bwe banaakusinza amaanyi, nnaakudduukirira.

13Beera muzira; tulwane na buzira okutaasa abantu baffe n'ebibuga bya Katonda waffe; Omukama anaakola ekisaanye mu maaso ge.”

14Awo Yowabu n'eggye lye yali nalyo ne balumba okulwanyisa Abaaramu, Abaaramu ne babadduka.

15Abammoni bwe baalaba ng'Abaaramu badduse, nabo ne badduka Abisayi muganda we, ne bayingira mu kibuga. Awo Yowabu n'akomawo e Yeruzaalemu.

16Abaaramu bwe baalaba nga bakubiddwa Yisirayeli, ne baweereza ababaka ne bakuŋŋaanya Abaaramu okuva emitala w'Omugga, Sofaki omuduumizi w'eggye lya Adadeezeri ng'abakulembedde.

17Bwe baakibuulira Dawudi, n'akuŋŋaanya Yisirayeli yenna, n'asomoka Yorudani, n'ajja gye bali, n'abatambaala. Dawudi n'ataza eggye okusisinkana Abaaramu, nabo ne bamulwanyisa.

18Naye Abaaramu ne badduka Abayisirayeli. Dawudi n'atta mu Baaramu abatabaazi b'oku bigaali lusanvu, n'abatabaazi baabwe ab'ebigere emitwalo ena. N'atta ne Sofaki omuduumizi w'eggye lyabwe.

19Bakabaka bonna abaali abaweereza ba Adadeezeri bwe baalaba nga bakubiddwa Yisirayeli, ne bateeseganya n'Abayisirayeli, ne bafuuka baweereza baabwe. Abaaramu tebeegomba kuddayo kuyamba Bammoni.

← Chapter 18 Jump to: Chapter 20 →