1 Chronicles 28

Luganda (BIBU1) (BIBULIYA ENTUKUVU)

← Chapter 27 Jump to: Chapter 29 →

1Awo Dawudi n'akunga abakungu bonna mu Yisirayeli bakuŋŋaanire mu Yeruzaalemu: abakulu b'ebika, abakulu b'ebibinja ebyaweerezanga kabaka, abagabe b'enkumi, abagabe b'ebikumi, abaakuliranga ebintu n'amagana ga kabaka n'aga batabani be, abakungu b'omu lubiri, abatabaazi abazira n'abantu abalina obusobozi obw'enjawulo.

2Kabaka n'ayimirira ku magulu ge n'agamba nti: “Baganda bange era abantu bange, mumpulirize: Neegomba okuzimba ennyumba y'Essanduuku y'Endagaano y'Omukama mw'eneewummulira, gwe muziziko gw'ebigere bya Katonda waffe, n'enzimba ne ngitereeza.

3Kyokka Omukama yaŋŋamba nti: ‘Tojja kuzimbira linnya lyange nnyumba, kubanga oli musajja mutabaazi, wayiwa omusaayi.’

4Naye Omukama Katonda wa Yisirayeli yannonda mu nnyumba yonna eya kitange mbeere kabaka wa Yisirayeli emirembe gyonna. Yalonda Yuda abeere omukulembeze, ate mu nnyumba ya Yuda yalondamu nnyumba ya kitange, ate mu batabani ba kitange yalondamu nze, nga kwe kusiima kwe, mbeere kabaka wa Yisirayeli yenna.

5Ne mu baana bange – ate bo ddala Omukama yampa bangi - yalondamu mutabani wange Solomoni, ye y'aba atuula ku nnamulondo y'obwakabaka bw'Omukama ku Yisirayeli.

6Yaŋŋamba nti: ‘Solomoni, mutabani wo y'alizimba ennyumba yange, n'empya zange, kubanga mmulonze abeere mwana wange, nange nzija kubeera kitaawe.

7Obwakabaka bwe ndibunyweza emirembe gyonna, bw'aliba anyweredde ku kukola bye ndagira n'ennamula yange nga bw'akyakola kaakati.’

8Kale nno kati mu maaso ga Yisirayeli n'ag'ekibiina ky'Omukama kyonna, nga Katonda waffe awulira, mbakuutira: mukwatenga era mugobererenga ebiragiro byonna eby'Omukama Katonda wammwe, lwe munaatwala ensi eno ennungi ne mugirekera ne batabani bammwe abalibaddirira ng'obusika bwabwe emirembe gyonna.

9“Ggwe nno Solomoni mwana wange, manya Katonda wa kitaawo, muweereze n'omutima ogwemalizza n'omwoyo ogwagala, kubanga Omukama awenja emitima gyonna, era amanyi n'ebirowoozo byonna eby'emitima. Bw'oliba omunoonyezza, alikuwa n'omuzuula; naye bw'oliba omuvuddeko alikukasuka eri emirembe gyonna.

10Kale nno kati laba Omukama bw'akulonze, ozimbe ennyumba y'Ekitukuvu; nywera, otandike omulimu.”

11Dawudi n'ategeeza mutabani we Solomoni ekifaananyi ky'ekisasi ky'Ekiggwa n'ebigango byakyo, amaterekero gaakyo, ebisenge byayo ebya waggulu, ebisenge eby'omunda n'ekisenge ky'Entebe y'Obusaasizi.

12Yamuwa ebifaananyi byonna Mwoyo bye yali amuwadde eby'enzimba y'empya z'Ekiggwa ky'Omukama n'ebisenge okwetooloola, eby'enkuluze y'Ekiggwa kya Katonda, n'eby'enkuluze z'ebintu byonna ebisingirwa Ekiggwa.

13Yamulaga engabanya ya bakabona n'Abaleevi n'omulimu gwonna ogw'okuweereza mu Kiggwa ky'Omukama, ne ku byonna ebyeyambisibwa mu kuweereza mu Kiggwa ky'Omukama.

14Yagereka obuzito bwa zaabu obwa buli kikozesebwa ekya zaabu mu kuweereza mu mikolo egitali gimu, n'obuzito bwa ffeeza owa buli kintu ekikozesebwa ekya ffeeza mu mikolo egitali gimu:

15obuzito bwa zaabu ku lw'ebikondo by'ettawaaza ebya zaabu n'ettawaaza zaakwo, obuzito bwa ffeeza ku lw'ebikondo ebya ffeeza n'ettawaaza zaakwo okusinziira ku mulimu gwa buli ttawaaza;

16era ne zaabu wa buli mmeeza ey'Emigaati egy'Okwolesebwa; obuzito bwa ffeeza ow'emmeeza endala eza ffeeza;

17obuzito bwa zaabu omwereere ku lw'entoozo, ebibya ebimansira n'ensumbi; obuzito bwa zaabu ku lwa buli bibya ebya zaabu, n'obuzito ne ffeeza olwa buli bibya bya ffeeza;

18n'obuzito bwa zaabu omwereere ku lw'omwaliiro ogw'obubaani. Yamuwa ekifaananyi ky'ekigaali n'obuzito bwa zaabu waakwo ne ku lwa bakerubi abanjululizza ebiwaawatiro ku Ssanduuku y'Endagaano y'Omukama okugibikka.

19Dawudi n'agamba nti: “Bino byonna Omukama yabimbikkulira mu buwandiike, n'anteekako omukono gwe ntegeere bulungi ebifaananyi byabyo byonna.”

20Era Dawudi n'agamba Solomoni mutabani we nti: “Guma, nywera. Omulimu gukole, totya, totekemuka, kubanga Mukama wange Katonda wange ali naawe; talikulekerera oba okukwabulira, okutuusa ng'omulimu gwonna ogw'ennyumba y'Omukama guwedde.

21Engabanya yiiyo eya bakabona n'Abaleevi ku lw'omulimu gwonna ogukwatagana n'Ekiggwa kya Katonda, na buli yenna omukugu mu buli mulimu aliba ayagadde okukuyamba; abakungu nabo n'abantu bonna balikola ky'olagira nga baagala.”

← Chapter 27 Jump to: Chapter 29 →